Read Talaud YEHEZKIEL 10 Bible Online

YEHEZKIEL 10 - Talaud bible

YEHEZKIEL 10

¹Ana see i ya'u na'ellega watukku atuppa apan roso su pua manga mala'ekatta udde, wuṛṛu i ya'u naasilo sambau apan ere adderan araratuanna wuassu watu nilam.

²Wua'udde Ruata nabbisara su taumata apan uapeddettu linen udde, “Suttate suwallattu manga bola su al᷊ungngu manga mala'ekatta udde, wuṛṛu panganute sangkangkumma waṛṛan putungnga. Wua'udde sal᷊iawuṛṛa'e waṛṛa udde su soa.” I tou tinumuṛṛutta, wuṛṛu i ya'u mangke mannutukka si tou.

³Sutempo i tou sinumutta, manga mala'ekatta udde tantal᷊anna uarisikka su samba'an timukku Wal᷊en MAWU. Ammul᷊annu winabbawa namene rallakka sulal᷊umme wuṛṛu su ahewallu Wal᷊en MAWU.

⁴Semakka ma'al᷊angitta apan mammasingkattu daranta MAWU natuakka wuassu manga mala'ekatta udde wuṛṛu na'ingkatta watukku ngara sasuttanna su Wal᷊en MAWU, na'oman sara rallakke nabbal᷊i masema-semakka.

⁵Tingikku sal᷊iappakku papaiddu manga mala'ekatta udde aaringiṛṛanna sara rallakka su liudde, naal᷊ihidda tingikku Ruata Apan Atanggaṛṛanne.

⁶Napawe MAWU nandolokku taumata apan uapedettu linen udde nanganu sangkangkumma waṛṛan putungnga wuassu wallattu manga bola su al᷊ungngu manga mala'ekatta udde, taumata udde sinumutta wuṛṛu dirumarisikka suwallattu sambau manga bola udde.

⁷Ana see sambau suwallattu mala'ekatta napasuttan limane sulal᷊ummu putungnga apan su pattangnganni mangitou, namurutta manga piran paddi waṛṛa wuṛṛu nionggolla su taumata apan uapedettu linen udde. Taumata udde nanengkamma see inaite.

⁸I ya'u naasilo manungku su al᷊ungngu papaidda suapan mala'ekatta udde pia sambau apan lihidde ere ta'iakku taumata.

⁹I ya'u naasilo lai manga mala'ekatta udde sambau-sambau pia sambau bola su sandiṛṛanne. Appatta bola udde uasul᷊ungnga, wuṛṛu lullendappa ere permata maṛṛamaga. Sambau-sambau pia bola waine apan uaware su pattangnganne.

¹¹Ringannu aroddi manga mala'ekatta udde wotongnge umamatta su appatta lal᷊anna. I mangitou wotongnge inai suapan tampa ipaapulu mangitou, ringannu tawe mamal᷊elongngu wadangne.

¹²Ahewallu wadangngi mangitou, liudde, limane, papaidde wuṛṛu manga bolane lai napene mata.

¹³I ya'u naaringikka manungku manga bola udde isassaggo “utinnu limpul᷊ussa”.

¹⁴Suapan mala'ekatta udde uatahuanna appata hati apan uapapaṛṛala. Hati paarorone eteudde hatin bantenga, aruane hatin taumata, atallune hatin singa, wuṛṛu aippanne hatin rajawali.

¹⁵Ete manga mala'ekatta udde apan dorone ta'u nasiloanna su winggin Sal᷊ukku Kebar. Suapan manga mala'ekatta udde umal᷊ore ara'e mani'akka papaidde, ire'e watukku winalanganna wuṛṛu tumalla'a watukku saruanne ara'e matta'alla, manga bola udde sidutu uatantalongnga, ana waugu tataṛṛinoannu manga mala'ekatta udde.

¹⁸Wua'udde semakka lullansiangnga apan mammasingkattu darantam MAWU nanantangngu ngara sasuttanna su Wal᷊en MAWU wuṛṛu nangingkkatta ringannu manga mala'ekatta udde.

¹⁹I ya'u naasilo manga mala'ekatta udde nani'akka papaidde wuṛṛu tinumalla'a nanantangngu leta'a see inaite, wuṛṛu manga bolane lai uatantalongnga. Wua'udde i mangitou nattaalla maranin ngara sasuttanna su Wal᷊en MAWU su samba'an ra'i, arawe semakka lullansiangnga sidutu su wowo mangitou.

²⁰I ya'u naanaungnga manungku eteudde manga mala'ekatta apan dorone ta'u niasiloanna bowa su al᷊ungngu Ruatan Israel, su winggin Sal᷊ukku Kebar.

²¹Manga mala'ekatta udde sambau-sambau uatahuanna appata hati, ruan pare papaidda, wuṛṛu lai sambau apan naal᷊ihidda ta'iakku taumata su al᷊ungngu manga papaidda udde.

²²Hatin mangitou uasul᷊ungngu lai hatin manga mala'ekatta apan ta'u niasiloanna su winggin Sal᷊ukku Kebar. Sambau-sambau sidutu u'amatta matul᷊idda watukku saruanne.