Read Talaud YEHEZKIEL 11 Bible Online

YEHEZKIEL 11 - Talaud bible

YEHEZKIEL 11

¹Ana see i ya'u niwengkettu Ghaṛṛahon Duata wuṛṛu niapidda su ngara samba'an Ra'i su Wal᷊en MAWU. Isudde i ya'u naasilo 25 su atoune, suwallatti mangitou pia ruan katou piaṛṛa'u walahanna, eteudde Yaazanya ana'i Azur wuṛṛu Pelaca ana'i Benaya.

²Ruata nabbisara si ya'u, “Ei taumata apan mattate, eteindi manga taumata apan manggol᷊agu al᷊al᷊eo su soa indi wuṛṛu mangngonggolu al᷊aṛṛa'a apan mangngal᷊iwu.

³Ana waugu udde wal᷊oa'a tanata-U su ola'u ṛuumanna si mangitou, ei taumata apan mattate. Ana waugu i mangitou mabbisara, ‘Tate mal᷊annu lai manga wal᷊en indi sarun iapararisikki ite apia. Soa indi uddewe urinna wuṛṛu i ite ṛemessa sulal᷊umme. I ite sarun mal᷊angnganna wuassu putungnga ana waugu lal᷊indumannu urinna indi.’ ”

⁵Wua'udde Ghaṛṛahon MAWU nangooppa si ya'u, wuṛṛu i ya'u nirolokku MAWU iapawisara su taumatan Israel, “Ei walahannu Israel, i Ya'u masingkatta apa apan iwabbisaran kamiu wuṛṛu ihaagolagi yamiu.

⁶Aroddi anambone taumata apan buatte nipaten kamiu, na'oman sara manga lal᷊annu soa napenen winal᷊unanna.

⁷Ana waugu udde, i Ya'u, MAWU Apan Atanggaṛṛanne, mabbisara si yamiu: Atonna, soa indi uddewe urinna, arawe ṛemessa sulal᷊umme wal᷊inewe i yamiu, ewe'e winal᷊unannu manga taumata apan buatte nipaten kamiu! Wuṛṛu i yamiu Ta'u limbuaṛṛanna iapasabbangnga wuassu soa indi!

⁸Apa i yamiu matta'uttu hal᷊ele? Sarun Ta'u iaparanta taumata uaapiddu hal᷊ele iapapangalo si yamiu.

⁹I yamiu sarun Ta'u iapidda sumabbangnga wuassu soa wuṛṛu Ta'u itantilla su taumata raho. I Ya'u buatte nangema'u ṛuumanna mate si yamiu.

¹⁰I yamiu sarun nate sulal᷊ummu pangalo su wanuanu sassane, ne i yamiu masingkatte manungku ete i Ya'u MAWU.

¹¹Nariaddi, i yamiu tawe matammudda su soa indi, tawe ere ṛemessa sulal᷊ummu urinna. I Ya'u sarun mengenggenna wuṛṛu makkuumanni yamiu suapan tampa i yamiu isudde su wanuan Israel.

¹²Ne i yamiu masingkatte manungku ete i Ya'u MAWU wuṛṛu i yamiu Ta'u iṛṛuumanna ana waugu buatte nilumawangnga manga parenta-Ku ringannu tuttuṛṛutta manga titan balahanna maraninu.”

¹³Tantal᷊anna i ya'u mammasingkattu wisara udde, inaṛṛombanganne i Pelaca nema'a see mate. Ne niumal᷊intuddate wuṛṛu sinumal᷊ande, “Uare MAWU Apan Atanggaṛṛanne! Apa Israel lambene indi sarun patean-U?”

¹⁴MAWU nabbisara si ya'u apia,

¹⁵“Ei taumata apan mattate, i'o wuṛṛu manga hawenu sulal᷊ummu pamamuanganna tantal᷊anna ipagahatton tumana'u Yerusalem. Unni mangitou, ‘Manga taumata niwuangnga udde tumanite marau wuassu Yerusalem inai mattaṛṛamawu su MAWU. Leta'u Israel buatte nionggollu MAWU si ite.’

¹⁶Ana waugu udde, wal᷊oa'e tanata-U indi su manga hawenu sulal᷊ummu pamamuanganna, manungku ete i Ya'u apan mangapiddi mangitou marau-rau wuassu wallattu manga walahanna wuṛṛu manal᷊iawukki mangitou su manga wanua udde. Arawe tantal᷊anna i mangitou poiaroddi, i ya'u sarun uarundinganna si mangitou.

¹⁷I Ya'u, MAWU Apan Atanggaṛṛanne, mapal᷊iatta'a manungku i Ya'u sarun mangammuli mangitou wuassu manga wanua su tampa i mangitou nisal᷊iawukka, ana see mamelengngu leta'u Israel si mangitou.

¹⁸Napawe i mangitou mapul᷊ete, i mangitou sarun mandammen anambon paal᷊uanna apan dal᷊eo wuṛṛu ma'arantinna apan niasombanganni mangitou.

¹⁹I mangitou sarun Ta'u onggol᷊annu naungnga apan bakku wuṛṛu pallal᷊agu apan bakku. Naungngi mangitou apan aatikke ere watu sarun Ta'u anuanna wuṛṛu Ta'u hantiannu naungnga apan matuṛṛutta si Ya'u.

²⁰Ne i mangitou sarun matuṛṛutta su manga atorang-Ku wuṛṛu mararingikka anambon parenta-U. I mangitou sarun maola'a uma-U wuṛṛu i Ya'u sarun maola'a Ruata mangitou.

²¹Arawe manga taumata apan apulune massubba manga paal᷊uanna apan lal᷊eo wuṛṛu maarantinna sarun Ta'u iṛṛuumanna ana waugu pallal᷊agu mangitou lal᷊eo udde.” Etearoddi wisara MAWU Apan Atanggaṛṛanne.

²²Manga mala'ekatta udde mannattakke tuttalla'a wuṛṛu manga bolane lai uatantalongnga. Semakka ma'al᷊angitta mattiala daranta MAWU Israel udde ringanni mangitou.

²³Wua'udde semakka apan maal᷊angitta udde nanantangngu Yerusalem wuṛṛu nangingkatta watukku wowone su samba'an ra'in soa udde.

²⁴Sulal᷊ummu aellega udde, Ghaṛṛahon Duata namengketta si ya'u wuṛṛu namelengku ringannu manga taumata niwuangnga su Babel. Wua'udde nawul᷊ite sondappa udde.

²⁵Wua'udde i ya'u nabbatti'a su manga taumata apan niwuangnga al᷊awo'a apan nipasilo MAWU si ya'u.