Read Talaud YEHEZKIEL 12 Bible Online

YEHEZKIEL 12 - Talaud bible

YEHEZKIEL 12

¹MAWU nabbisara apia si ya'u, wisara-Ne,

²“Ei taumata apan mattate, i'o uatana'a suwallattu manga taumata mal᷊awangnga. I mangitou pia mata, arawe tawe maasilo; pia tal᷊inga, arawe tawe maaringikka, ana waugu i mangitou apulune lullawangnga.

³Ana waugu udde, ei taumata apan mattate, tantal᷊anna allo ta'e allatune, pandiahite manga saranapanu su lal᷊ummu sambau wungkusanna ere inanaramanna a'olaannu taumatan buanganna. Tantal᷊anna ṛabbi taambe, tantanga'e wal᷊enu su saruanni mangitou ere taumata apan iapidda su pamamuanganna. Ola'e loṛṛangnga su darandungngu wal᷊enu ringannu aellehannu taumata mal᷊awangnga udde, wuṛṛu apira'e pinampiunanna apan lal᷊oṛṛoannu manga saranapanu udde see sabbangnga wuassu loṛṛangnga udde. Pasante pinampiunanna udde su wambangngu. Amatte sulal᷊ummu wasa tuudda; taapete matanu ma'oman sara i'o tawe maasilo lal᷊anna apan a'amatannu. Wala'e ahewallu walahannu Israel maasilo sarangkanambone apan niolangngu udde, tadea'u maola'a pananaunganna si mangitou. Asinungka i mangitou sarun maatinnau manungku i mangitou udde lumal᷊awangnga.”

⁷Ana see i ya'u tinumuṛṛutte parenta MAWU si ya'u. Su allo udde lai, tantal᷊anna ta'e allattune, i ya'u nandiahite saranapa'u sulal᷊ummu sambau pinampiunanna, ere lai inanaramanne a'olaannu tumatal᷊angnga. Sutempo allo maṛṛabbite, i ya'u nallassutta loṛṛangnga ringannu lima'u su darandungngu wal᷊e'u. Ringannu wawialannu awadaalla, pinampiunanna udde ta'u nipasanna su wambangku, wua'udde i ya'u inaite.

⁸Tiṛṛabbine MAWU nabbisara si ya'u, wisara-Ne,

⁹“Ei taumata apan mattate, walahannu Israel, walahanna mal᷊awangnga udde buatte naiwal᷊o si'o apa apan tantal᷊anna mammanarannu.

¹⁰Ana waugu udde wal᷊oa'e si mangitou apa apan i Ya'u, MAWU Apan Atanggaṛṛanne nabbisara si mangitou. Tanata'U niwuna'a su ratun Yerusalem, wuṛṛu su anambon tumana'u soa udde.

¹¹Tal᷊aa'e manungku apa apan niolangngu udde lambangu apa apan sarun mariaddi si mangitou, eteudde: i mangitou sarun maola'a taumatan buanganna wuṛṛu tawananna.

¹²Su al᷊ummu ṛabbi wasa ratu mangitou sarun mamasanna pinampiunanna su wambangnga see inaite umamatta. Manga taumata sarun mallassutta loṛṛangnga su manga darandunga tadea'u i tou wotongnge maasabbangnga. I tou sarun manutubba matane ma'oman sara tawe maasilo lal᷊anna apan amatanne.

¹³Arawe i Ya'u sarun mantaingngu soma-U ipanametta si tou. See Ta'u iapidda i tou su soan Babel, wuṛṛu poiaroddi i tou sarun nate ringannu tawe maasilo soa udde.

¹⁴Anambon lal᷊oṛṛon bal᷊en araratuanna, nasutta manga mananantiro wuṛṛu mandariaga ratu sarun Ta'u isal᷊iawukka su al᷊awo'u tampa. I mangitou sarun Ta'u enggenanna wuṛṛu Ta'u pateanna.

¹⁵Sutempo i mangitou Ta'u isal᷊iawukka su pattangngannu manga walahanna waine su manga wanua awagananna, i mangitou sarun maasingkatta manungku ete i Ya'u MAWU.

¹⁶Sambageanganna addio'a wuassi mangitou sarun Ta'u iapasal᷊amatta wuassu papangalo, wuassu ṛutumma, wuṛṛu ṛiwutta, tadea'u su pattangngannu manga walahanna raho udde i mangitou sarun maatutukka manungku i mangitou buatte na'ola'a al᷊al᷊eo wahewa. Ne i mangitou sarun manga'u manungku ete i Ya'u MAWU.”

¹⁷MAWU nabbisara si ya'u,

¹⁸“Ei taumata apan mattate, pangiladde sutempo i'o umanna, wuṛṛu pangindoten atata'utta sutempo i'o ma'inumma.

¹⁹Pasingkata'e su anambon balahanna apa apan i Ya'u, MAWU Apan Atanggaṛṛanne nabbisara su tumana'u Yerusalem apan ta'e uatana'a su leta'i mangitou. I mangitou sarun mangiladda sutempo umanna wuṛṛu mangngindon atata'utta sutempo ma'inumma. Leta'i mangitou sarun mabbal᷊i maṛṛasa, ana waugu anambon taumata apan uatana'a isudde sidutu lullawangnga tita.

²⁰Manga soa apan orassa indi napenen tumanangnge sarun ṛimunsaanna wuṛṛu manga wawail᷊anna sarun mabbal᷊i wadda. Ne i mangitou maasingkatte manungku ete i Ya'u MAWU.”

²¹MAWU nabbisara si ya'u,

²²“Ei taumata apan mattate, anio taumatan Israel apulune mannul᷊en sasanato'a indi: ‘Tempo uahahanti, arawe manga nubuatta taweddu mariaddi’?

²³Ne, wal᷊oa'e si mangitou manungku i Ya'u, MAWU Apan Atanggaṛṛanne sarun mangonggollu sasimbakke indi: Sasanato'a udde sarun Ta'u pappasanna, ma'oman sara tate lai iwisara su Israel. Maola'a hahantine wal᷊oa'a si mangitou manungku tempone nia'omante, wuṛṛu suapan nubuatta sarun matipussa.

²⁴Su Israel tate lai sondappa ara'e aellega palassu,

²⁵i Ya'u, MAWU Apan Atanggaṛṛanne sarun mabbisara ringannu walahannu Israel, wuṛṛu anambon wisara-U sarun mariaddi, ringannu tawe iasoṛṛotta lai. Paddaringikka, ei ṛuanganna mal᷊awangnga! Sutempon pabbiaṛṛannu sarun Ta'u olaanna al᷊awo'a apan Ta'u niapanaungnga si yamiu. I Ya'u, MAWU Apan Atanggaṛṛanne buatte nabbisara.”

²⁶Unnu MAWU si ya'u,

²⁷“Ei taumata apan mattate, manga taumatan Israel mabbisara manungku sondappa wuṛṛu nubuannu udde wakkute mariaddi marau su allo addantane.

²⁸Ana waugu udde, wal᷊oa'e si mangitou manungku i Ya'u, MAWU Apan Atanggaṛṛanne, nabbisara: Sarangkanambone apan Ta'u niwisara sarun mariaddi, tate iasoṛṛotta lai, i Ya'u, MAWU Apan Atanggaṛṛanne buatte nabbisara!”