Read Talaud YEHEZKIEL 13 Bible Online

YEHEZKIEL 13 - Talaud bible

YEHEZKIEL 13

¹MAWU nabbisara si ya'u,

²“Ei taumata apan mattate, tagguete manga nabin Israel apan mammasingkattu nubuatta apan niarangnge sassane. Doloṛṛa'e i mangitou maddaringikka wisara-U.”

³MAWU Apan Atanggaṛṛanne nabbisara, “Nasilakate manga nabi apan woddo udde! Ṛingiranne nia'ompante wuassu tinnaune sassane pa'ellege tumaniten awusu atonna.

⁴Ei Israel, manga nabinu udde tawe gunane, nassul᷊ungngu manga serigala apan mabbiakka su pattangngannu tuiddu manga soa.

⁵I mangitou tawe nandiaga manga tampa suapa manga darandungnge naṛṛa'a, wuṛṛu lai tawe nangapia manga tatanda'a udde. Nariaddi, Israel tawe iatahekka amungkangngu papangalo mariaddite su allo i Ya'u, MAWU rumanta makkuumanna.

⁶Manga aellegi mangitou awusu, wuṛṛu manga pani'atti mangitou tumba'u wawahia. I mangitou mangnga'u uaapiddu tanata wuassia-U, sumbal᷊i Ya'u tawe nandolokki mangitou. Ereapa wotongnge i mangitou mangngantimma pani'atti mangitou udde sarun mariaddi?

⁷I Ya'u, MAWU Apan Atanggaṛṛanne nabbisara si mangitou, ‘Manga sondappi yamiu udde awusu wuṛṛu manga pani'atti yamiu udde wawahia. I yamiu mabbisara manungku sarangkanambone udde tanata-U, sumbal᷊i Ya'u taambe saran paassa naggahattong kamiu! Ana waugu udde i Ya'u sarun maola'a ro'ammu.

⁹I Ya'u sarun makkuumanni yamiu, ei manga nabi apan mammasingkattu pani'atta awusu wuṛṛu ma'ira-ira manga sondappa! I yamiu tate lai wotongnge mangonggollu laṛṛawessa sulal᷊ummu manga ammul᷊annu uma-U. Manga rannu sarun pappasanna wuassu reengannu walahannu Israel, wuṛṛu i yamiu tate maapule su leta'a inariaddiannu. Ne i yamiu masingkatte manungku ete i Ya'u MAWU Apan Atanggaṛṛanne.

¹⁰Ei manga nabi awusu! I yamiu buatte nangal᷊iwun uma-U ringannu mabbisara manungku sarangkanambone mal᷊angnganna wuṛṛu naatokke. Sumbal᷊i wutte'e mangke tawe! Uma-U buatte napararisikku tanda batu tela apan mal᷊oangnga addone, wua'udde i yamiu rumanta wuṛṛu mamuṛṛa.

¹¹Ei, manga nabi awusu, tanda'a sarun maṛṛa'a. I Ya'u manosokku uranna masassaga. Tanda'a udde sarun tiupannu anginna wuṛṛu aṛṛiaannu uranna eisse

¹²na'oman sara maṛṛa'a, wuṛṛu suapan taumata sarun maiwal᷊o apa hunane darandungnga niwuṛṛanna udde.’ ”

¹³MAWU Apan Atanggaṛṛanne nabbisara, “Sulal᷊ummu asasa'u-U, i Ya'u sarun mandatan anginna wahewalla, uranna masaddatta wuṛṛu uranna eisse ipakkimunsa'a darandungnga udde.

¹⁴I Ya'u pia pandumma mapaṛṛa'an darandungnga apan niwuṛṛanni yamiu udde, ringannu ihohakka ma'oman sara mallambe ete mal᷊itangnge sassane. Darandungnga udde sarun maṛṛa'a wuṛṛu mamate i yamiu sarangkanambone. Ne i yamiu masingkatte manungku ete i Ya'u MAWU.

¹⁵Darandungnga udde wuṛṛu i yamiu apan buatte namuṛṛa sarun maapendamma aroddi ahewalle asasa'u-U. Wua'udde Ta'u iwal᷊o si yamiu manungku darandungnga udde nawul᷊ite, ere lai i yamiu apan namuṛṛa,

¹⁶ei manga nabi awusu! I yamiu manni'atta manungku Yerusalem mal᷊angnganna wuṛṛu naatokke, sumbal᷊i atonna-tonna tawe!” Etearoddi wisara MAWU Apan Atanggaṛṛanne.

¹⁷MAWU nabbisara, “Orassa indi, ei taumata apan mattate, innunue'o manga wawine apan mammunga ere nabi wawine su pattangngannu walahannu. Paṛṛammai'o i mangitou,

¹⁸wuṛṛu wal᷊oa'e apa apan i Ya'u, MAWU Apan Atanggaṛṛanne nabbal᷊o si mangitou: ‘Nasilakate i yamiu! I yamiu na'ola'a aonggolla su anambon taumata manga hal᷊angnga al᷊imagaru wuṛṛu manga paporongnga pia taṛṛinone tadea'u taumata apan maappaane wotongnge maakuasa wiakku taumata waine. I yamiu mappulu maatantunnu wiakka wuṛṛu papaten uma-U, wuṛṛu taṛṛino udde nipaatti yamiu maola'a auntungannu sassane.

¹⁹I yamiu buatte nangaddio'a si Ya'u su saruannu uma-U tumba'u ana waugu see maasomba pirang kangkumma jelai wuṛṛu piran paddi roti. Manga taumata apan tawe sal᷊ane, nipateng kamiu arawe manga taumata apan ṛinone mate niwalang kamiu wiakka. Ana see i yamiu namahia uma-U wuṛṛu i mangitou nangimanna si yamiu.’ ”

²⁰MAWU Apan Atanggaṛṛanne nabbisara su manga wawine apan mammunga ere nabi wawine udde, “I Ya'u maddantinna ma'ellega manga hal᷊imagaru apan nipaatti yamiu ipanantunnu wiakka ara'e papaten uma-U. Manga hal᷊imagaru udde Ta'u aṛṛoanna wuassu pulal᷊annu, wuṛṛu manga taumata apan tataṛṛinoannu sarun Ta'u ipallossa.

²¹Manga paporongnga apan pia taṛṛinone sarun Ta'u hesaanna, wuṛṛu uma-U sarun Ta'u ilinda'a wuassu wawono'a lal᷊eo wuassi yamiu saran mal᷊annu-l᷊annu. Ne i yamiu masingkatte manungku ete i Ya'u MAWU.

²²Manga taumata mapia apan maddiri Ta'u olaanna lal᷊eo, niadio'i yamiu naungnge ringannu wawahianu. Manga taumata lal᷊eo niola'i yamiu wahewalla naungnge tadea'u sidutu marosa wuṛṛu tawe iapaasal᷊amatta.

²³Orassa indi nuddusee manga sondappa awusu wuṛṛu manga pani'atta wawahianu. Ta'u iapasal᷊amatta uma-U wuassu wawonongu lal᷊eo. Ne i yamiu masingkatte manungku ete i Ya'u MAWU.”