Read Talaud YEHEZKIEL 14 Bible Online

YEHEZKIEL 14 - Talaud bible

YEHEZKIEL 14

¹Manga pira wuassu piaṛṛa'u walahannu Israel nirumanta ringangku ma'iwal᷊o apulu MAWU.

²Ana see nabbisarate MAWU si ya'u,

³“Ei taumata apan mattate, manga taumata indi buatte nanantillu watanganne su paal᷊uanna na'oman sara i mangitou nanawote sulal᷊ummu rosa. Manui mangitou maiwal᷊o si ya'u?

⁴Ana waugu udde, wal᷊oa'e si mangitou manungku i Ya'u, MAWU Apan Atanggaṛṛanne nannanata arendi, ‘Suapan taumatan Israel apan buatte nanantillu watanganne su paal᷊uanna wuṛṛu namala batanganne manawo sulal᷊ummu rosa, ana see rumanta maddorongnga tatantiro su sangkatou nabi, sarun Ta'u simbaṛṛanna sassane ringannu sasimbakke apan suṛṛinone su manga paal᷊uanne apan manambo udde!

⁵Anambon paal᷊uanna udde buatte napaaraun uma-Ku wua dingang-Ku, arawe antimanna ringannu sasimba-Ku udde uma-U sarun mabbelengnga ringang-Ku.’

⁶Pasingkata'a lai su taumatan Israel manungku i Ya'u, MAWU Apan Atanggaṛṛanne nabbisara si mangitou, ‘Awal᷊ute wuassu manga rosanu, wuṛṛu tantanga'e manga paal᷊uannu apan ma'amuta udde.’

⁷Suapan taumatan Israel ara'e taumata raho apan uatana'a suwallattu walahannu Israel, apan nangindau-U wuṛṛu nanantillu watanganne su paal᷊uanna, ana see naddorongnga tatantiro su sangkatou nabi, sarun Ta'u simbaṛṛanna sassane.

⁸I Ya'u sarun mando'appa si tou wuṛṛu ma'ola'a si tou tul᷊adda su taumata waine. I Ya'u sarun mallimbuakka si tou wuassu ammul᷊annu uma-U, ne uma-U masingkatte manungku ete i Ya'u MAWU.

⁹Amungkangngu sangkatou nabi buatte niwahianna na'oman sara mangonggollu sasimbakka nassal᷊a, ete i Ya'u apan namahia si tou. I Ya'u MAWU Apan Atanggaṛṛanne sarun mallimbuakka si tou wuassu manga taumatan Israel.

¹⁰Mawae nabi udde ara'e i mangitou apan maddorongnga tatantirone, sarun maasomba ṛuumanna apan uasul᷊ungnga.

¹¹Sarangkanambone udde Ta'u olaanna tadea'u taumatan Israel tate mangindau-U wuṛṛu lai tate malluhudda watanganne ringannu rosa. Ringannu aroddi i mangitou sarun maola'a uma-U, wuṛṛu i Ya'u maola'a Ruata mangitou.” I Ya'u, MAWU Apan Atanggaṛṛanne buatte nabbisara.

¹²MAWU nabbisara si ya'u, “Ei taumata apan mattate,

¹³amungkangngu sambau wanua pia dosane wuṛṛu tawe satia si Ya'u, i Ya'u sarun makkuumannu wanua udde. I Ya'u sarun makkimunsa'a wal᷊ingkakku pangadoannu anna, mandantan al᷊aṛṛutumma wuṛṛu mamate mawae taumata aroddi lai winatangnga.

¹⁴Salaiwe i Nuh, i Danel wuṛṛu i Ayub uatana'a su tampa udde, ne apapia mangitou tallu tumba'u wotongnge mapanal᷊amatta niawa mangitou sassane. I Ya'u, MAWU Apan Atanggaṛṛanne buatte nabbisara.

¹⁵Wotongnge mariaddi i Ya'u maparanta manga winatangnga mal᷊aṛṛaga iapatambon tumana'u wanua udde, na'oman sara leta'a udde na'ola'a tehamanna wuṛṛu tawe saran sangkatou waṛṛani umamatta isudde.

¹⁶Salaiwe i Nuh, i Danel wuṛṛu i Ayub uatana'a isudde, ana waugu i Ya'u, Ruata apan biakka, MAWU Apan Atanggaṛṛanne, i mangitou tawe maapanal᷊amatta sisai-sai, ewe'e lai ana'i mangitou sassane tawe. Tumba'u i mangitou sassane apan masal᷊amatta, ewe'e wanua udde sarun maola'a wadda'u anne.

¹⁷Wotongnge mariaddi i Ya'u mandantan pangalo su wanua udde, wuṛṛu i Ya'u mangirimmu manga ahidda lutangnga apan apianne ipamate mawae taumata aroddi lai winatangnga.

¹⁸Wuṛṛu salaiwe ingana'a siri tallu tanginna uatana'a isudde, ne ana waugu i Ya'u, Ruata apan biakka, MAWU Apan Atanggaṛṛanne, i mangitou tawe maapanal᷊amatta sisai-sai, ewe'e lai ana'i mangitou sassane lai tawe. Tumba'u i mangitou sassane apan masal᷊amatta.

¹⁹Wotongnge mariaddi i Ya'u mandantan ṛiwutta su wanua udde, wuṛṛu Ta'u iapasabbangnga asasa'u-U su saruanne ma'oman sara mawae taumata aroddi lai winatangnga sarun mate.

²⁰Wuṛṛu salaiwe i Nuh, i Danel wuṛṛu i Ayub uatana'a isudde, ne ana waugu i Ya'u, Ruata apan biakka, MAWU Apan Atanggaṛṛanne, i mangitou tawe maapanal᷊amatta sisai-sai, ewe'e lai ana'i mangitou sassane tawe. Tumba'u i mangitou sassane apan masal᷊amatta ana waugu apapia mangitou.”

²¹MAWU Apan Atanggaṛṛanne nabbisara, “I Ya'u mangema'u appatta ṛuumang-Ku apan asaddatanne su Yerusalem ipamate mawae taumata aroddi lai winatangnga. Ṛuumanna udde eteudde: pangalo, al᷊aṛṛutumma, winatangnga mal᷊aṛṛaga wuṛṛu ṛiwutta.

²²Unnuwisara piaddu naatal᷊angnga wuṛṛu nanal᷊amatta manga anangne, ellehewe i mangitou napawe i mangitou rumanta ringannu. Pa'ellege ereapa al᷊al᷊eone i mangitou, ne i yamiu sarun maatutukka manungku naṛṛinote inolaang-Ku nakkuumannu Yerusalem.

²³See lai i yamiu sarun maasunna manungku al᷊awo'u inolaang-Ku udde pia pangiananne. I Ya'u MAWU Apan Atanggaṛṛanne buatte nabbisara.”