Read Talaud YEHEZKIEL 15 Bible Online

YEHEZKIEL 15 - Talaud bible

YEHEZKIEL 15

¹MAWU nabbisara si ya'u,

²“Ei taumata apan mattate, apate lebbene alun anggore wuassu alu waine su mahurangnge? Apa apianne alu anggore wuassu manga aaluanna su mahurangne?

³Wotongngewe alune ipa'ola'a sambau saranapa? Wotongngewe olaanna aeleanna tadea'u pangeleannu saranapa?

⁴Tawe gunane ewe'e tumba'u olaanna alu papputunganna, wuṛṛu amungkangngu ruan poto natutungke, ne tangngane maola'e munsingnga, apa ta'e pia gunane?

⁵Tate! Ewe'e lai tantal᷊anna taambe nironsolla, tawe iapaatta. Lembonete buatte nironsolla wuṛṛu natutungke su putungnga!”

⁶Ana waugu udde MAWU Apan Atanggaṛṛanne nabbisara, “Naal᷊ihidda punnu alu anggore apan nial᷊appa wuassu mahurangnge wuṛṛu nitutungnga, aroddi lai sarun Ta'u olaanna su tumana'u Yerusalem!

⁷I Ya'u sarun makkuumanni mangitou. Salaiwe i mangitou buatte naal᷊assanga wuassu putungnga, arawe putungnga lai apan mamate si mangitou. Ne i yamiu masingkatte manungku ete i Ya'u MAWU.

⁸I mangitou tawe satia si Ya'u, ana waugu udde, leta'a udde sarun Ta'u olaanna wadda'a. I Ya'u MAWU Apan Atanggaṛṛanne buatte nabbisara.”