Read Talaud YEHEZKIEL 17 Bible Online

YEHEZKIEL 17 - Talaud bible

YEHEZKIEL 17

¹MAWU nabbisara si ya'u, “Ei taumata apan mattate, wattia'e su manga taumatan Israel sasumandingnga,

²apan i Ya'u, MAWU Apan Atanggaṛṛanne mamasingkatta si mangitou: Pia sambau manu'a asiaṛṛe apan wambul᷊une maṛṛansanga wuṛṛu papaidde mal᷊alakka see matohassa. I tou tinumalla'a su wowon Libanon, nanappo lal᷊uwo punnu alu cemara,

⁴see niapidde wuṛṛu niaddo su soan pabbal᷊u'anna apan marame.

⁵Wua'udde i tou nanganu lai sambau sasuanna apan ta'e wakku wuassu leta'u Israel, wuṛṛu nisuanne su wawail᷊anna apan masuwukka, apan tawe atalannu ua'e.

⁶Sasuanna udde nabbal᷊i punnu anggore apan tinumuwo mawawo arawe tinumondo marau. Manga rannane watukku asiaṛṛe udde, wuṛṛu manga ṛamunne uapansakka mal᷊al᷊umma su leta'a. Punnu anggore udde mapaṛṛampunga atonna.

⁷Tantal᷊anna udde pia manu'a asiaṛṛe wawalla apan baine; papaidde mal᷊alakka wuṛṛu wambul᷊une maappalla. Wua'udde punnu anggore udde nattarangngu manga ṛamunne wuṛṛu manga rannane watukku manua'a asiaṛṛe apan wakku udde ringannu antimma manu'a udde sarun mangonggollu mannamboannu lai ua'e wuassu apan pia su wawail᷊anna udde.

⁸Sumbal᷊i punnu anggore udde nasuante su leta'a apan masuwukka ringannu ua'e apan manambo, na'oman sara i tou wotonge maddongnga manambo, mabbua marasai, wuṛṛu maola'a punnu anggore apan mapia.

⁹Ne, i Ya'u, MAWU Apan Atanggaṛṛanne, naiwal᷊o: Wotonge punnu anggore udde mabbiakka wuṛṛu a'atambanna? Wal᷊inewe manu'a asiaṛṛe apan paarorone sarun mangabutta si tou ringannu manga ṛamunne, mani'o wuane, mamaddi manga rannane wuṛṛu mamalan tou tumolangnga? Tawe mappanduma ikkatta manambo ara'e walahanna apan matohassa ipangabutta aal᷊uanna udde sara manga ṛamunne.

¹⁰Atonna i tou i tou nasuante matohassa, arawe wotongnge i tou tumuwo sarangkal᷊o'enge see aatambanna? Wal᷊inewe i tou sarun tumolangnga napawe tiupannu anginna Ra'i? Wal᷊inewe i tou sarun maṛṛangu su tampa i tou nisuanna?”

¹¹MAWU nabbisara si ya'u,

¹²“Iwal᷊oite su manga lumal᷊awanga udde, apa i mangitou maasunna atappasannu sasumandinga udde. Wal᷊oa'a si mangitou manungku ratun Babel buatte nirumanta su Yerusalem, wuṛṛu naṛṛootta ratun Yehuda see manga mamanaran soa udde watukku Babel.

¹³See i tou namile sangkatou wuassu amonannu ratun Yehuda udde, na'ola'a pa'aire ringanni tou, wuṛṛu i tou nirolokka massalu tadea'u sidutu satia si tou. Ratun Babel udde nanametta manga taumata wahahewalla,

¹⁴tadea'u araratuannu Yehuda tate mapabbangunna apia, wuṛṛu maola'a wataṛṛu manungku paaire udde atonna-tonna matipussa.

¹⁵Arawe ratun Yehuda namangalo see nandolokku darol᷊oṛṛanna inai su Mesir tadea'u maasomba awal᷊o wuṛṛu tantara apan manambo. Apa i tou sarun maauntungnga? Apa i tou sarun iwala maal᷊assanga? Tawe mariaddi i tou massinaaddu paaire ringannu tawe iṛṛuumanna.

¹⁶Ana waugu i Ya'u, Ruata apan biakka, MAWU Apan Atanggaṛṛanne, ratun Yehuda sarun mate su Babel, ana waugu i tou buatte nassinaaddu sasalune wuṛṛu nilumawangnga paairene ringannu ratun Babel apan buatte niapa'aianni tou su adderan araratuanna.

¹⁷Ewe'e lai manga tantaran Mesir apan matohassa udde, tawe maapatul᷊ungngi tou wuassu saruannu manga taumatan Babel apan nangundu'u leta'a wuṛṛu naal᷊i manga hote pamateanna anambon taumata.

¹⁸Ana waugu i tou buatte nilumawangnga sasalu wuṛṛu paairene, i tou tawe maatal᷊angngu watanganne.

¹⁹Sulal᷊ummu arang-Ku, Ruata apan biakka, MAWU Apan Atanggaṛṛanne, ratun Yehuda sarun Ta'u iṛṛuumanna ana waugu buatte nilumawangnga pa'airene ringannu ratun Babel, sumbal᷊i i tou buatte nassalu sulal᷊ummu arang-Ku ipanipussa pa'airene udde.

²⁰I Ya'u sarun mamataddu soma ipanametta si mangitou. I tou sarun Ta'u iapidda su Babel wuṛṛu Ta'u iṛṛuumanna poiaroddi, ana waugu i tou tawe satia si Ya'u.

²¹Tantarane apan apianne sarun mate sulal᷊ummu pangalo wuṛṛu ingana'a naatal᷊angnga sarun massal᷊iawukka su anambon tampa. Ne uma-U maasingkatte manungku i Ya'u, MAWU buatte nabbisara.”

²²Eteindi apan niwisara MAWU Apan Atanggaṛṛanne, “Wuassu punnu alu cemara apan al᷊angkasanne, sarun ta'u sappoanna lal᷊uwone see Ta'u paddianna sambau rannane apan ta'e wakku; Ta'u isuanna ranna udde su wowone apan manunggakka watukku winabbawa.

²³Su wowone apan atanggaṛṛanne su Israel, i tou Ta'u ipasi'a. Poiaroddi i tou sarun mallal᷊uwo, wuṛṛu mangonggollu wuane, see maola'a alun cemara apan mawantuga. Al᷊awo'u hati manu'u winalanganna sarun massal᷊akka sulal᷊umme wuṛṛu massirungnga su al᷊ungne.

²⁴Al᷊awo'u alu su wanua sarun maasunna manungku ete i Ya'u MAWU. Alu apan al᷊angkasanne Ta'u tuwanganna; alu apan mawawo Ta'u iapatuwo matanggakka. Alu apan mapia ta'u iapaaṛṛagassa; wuṛṛu alu apan naṛṛangu Ta'u onggol᷊annu lal᷊uwo wuṛṛu bungane. I Ya'u, MAWU, buatte nabbisara, al᷊awo'u wisara-U sarun matipussa.”