Read Talaud YEHEZKIEL 18 Bible Online

YEHEZKIEL 18 - Talaud bible

YEHEZKIEL 18

¹MAWU nabbisara si ya'u,

²“Anio sasanato'a indi sidutu isassago su wanuan Israel? ‘Taumata timmade u'anna wuan anggore apan mapakkadda temange, arawe al᷊aṛṛana'a maṛṛangirassa isine.’

³Sulal᷊ummu arang-Ku, Ruata apan biakka, sasanato'a udde tate lai isaggo su Israel.

⁴Niawa suapan taumata uddewe tatahuanang-Ku, mawae ete niawan taumata timmadde aroddi lai niawan anange. Taumata apan marosa, ete i tou apan sarun nate.

⁵Unnuwisara pia taumata apan mapia, matul᷊idda wuṛṛu tawe awusune.

⁶I tou sarun tawe massubba paal᷊uannu taumatan Israel ara'e umanna sasamba su manga tampa passubbanna manga monganna. I tou tawe saran paassa mamono'a awingngu taumata waine ara'e matiilla suadio'a ringannu wawine apan tantal᷊anna a'amatannu radda'u wawine.

⁷I tou tawe saran paassa mallinga ara'e mangaṛṛo. Manga saranapa ere wataṛṛun taumata apan pia awallassa si tou sidutu iappawelenge. Taumata apan niamal᷊unusanna nionggolanni tou anna wuṛṛu taumata apan tawe laubba, i tou nianggilanne laubba.

⁸I tou taambe saran paassa napawallassa ringannu pia bungane. I tou maddiri ma'ola'a al᷊al᷊eo wuṛṛu sulal᷊ummu suapan pattatiakka i tou makkawessa ringannu matul᷊idda.

⁹I tou matuṛṛutta su parenta-U wuṛṛu uaagassa manga tita-U. Ete taumata ereudde apan tawe mamahia wuṛṛu sidutu uata'a wiakka. I Ya'u, MAWU Apan Atanggaṛṛanne buatte nabbisara.

¹⁰Arawe unnuwisara taumata udde uatahuanna ana'a apan apulune mangngaṛṛo, mammate, wuṛṛu ma'ola'a anambon al᷊al᷊eo waine apan

¹¹taambe saran paassa niola'u iamange. I tou sarun umanna manga sasamba su manga tampa passubbanna manga monganna. I tou mammono'a wuṛṛu mattiilla ringannu awingngu taumata waine.

¹²I tou apulune mallinga taumata asiangnga, mangngaṛṛo, mangnganu saranapa wataṛṛun taumata apan nabballassa si tou. I tou inaite su manga kuillu taumata apan tawe maaillal᷊a MAWU wuṛṛu massubba paal᷊uanna apan ma'arantinna.

¹³I tou napawallassa ringannu bungane. Apa taumata aroddi wotonge mabbiakka? Tawe! I tou buatte na'ola'a anambon inolaanna apan ma'arantinna udde, wuṛṛu i tou sarun mate! Papatene eteudde pangillul᷊eannu inolaanne sassane.

¹⁴Unnuwisara taumata apan ma'ola'a anambon al᷊al᷊eo udde pia ana'a, wuṛṛu ana'a udde maasilo anambon inolaannu iamangne, arawe tawe nangaṛṛussa udde.

¹⁵Ana'a udde maddiri massubba paal᷊uannu taumatan Israel, ara'e umanna sasamba apan nionggolla su manga tampa pasasubbanna manga monganna. I tou taambe namono'a awingngu taumata waine,

¹⁶ara'e mammaṛṛanga wuṛṛu mangngaṛṛo sisai-sai. Manga saranapa wataṛṛun taumata apan pia awallassa si tou sidutu iapawelenge. Taumata apan niamal᷊unusanna anggilanne anna wuṛṛu taumata apan tawe laubba anggilanne laubba.

¹⁷I tou taambe na'ola'a al᷊al᷊eo ara'e napawallassa ringannu pia bungane. I tou matuṛṛutta su manga tita-U wuṛṛu mararingikka parenta-Ku. Ana'a udde sarun tawe mate ana waugu rosan iamange, ewe'e sidutu wiakka.

¹⁸Ewe'e mawal᷊i'a, iamange apan apulune mammahia, mangngaṛṛo wuṛṛu ma'ola'a al᷊al᷊eo waine, sarun nate ana waugu manga rosa apan niolangnge sassane.

¹⁹Arawe asinungka pia taumata apan maiwal᷊o anio ana'a udde tawe lai suadio'a mamasanna pangillul᷊eannu manga rosan iamange. Sasimbakke eteudde, ana waugu ana'a udde mapia wuṛṛu tawe awusune. I tou matuṛṛutta su manga tita-U wuṛṛu mappaamatta ringannu satia, ne i tou sidutu wiakka.

²⁰Taumata apan ma'ola'a rosa, ete i tou apan sarun mate. Ana'a sarun tawe mamasanna pangillul᷊eannu pasasal᷊an iamange; ewe'e, iamange lai sarun tawe mamasanna pangillul᷊eannu manga rosan anange. Taumata apan mapia sarun maasomba bawal᷊inne apan mapia ana waugu inolaanne apan mapia. Wuṛṛu taumata apan dal᷊eo sarun matataṛṛanga ana waugu pangillul᷊eannu al᷊al᷊eone.

²¹Amungkangngu sangkatou apan dal᷊eo tate ma'ola'a rosa apia, wuṛṛu mannatakke tuttuṛṛutta manga tita-U, see ma'ola'a inolaanna apan mapia wuṛṛu naṛṛino, i tou sarun tawe mate.

²²Anambon rosane sarun ampunganna; i tou sarun mabbiakka, ana waugu inolaanne suṛṛinone.

²³Apa i'o maṛṛingidda manungku i Ya'u MAWU Apan Atanggaṛṛanne mal᷊uassa amungkangngu taumata lal᷊eo mate? Mangke tawe! I Ya'u mappulu i tou manantangngu manga rosane tadea'u i tou sidutu wiakka.

²⁴Arawe amungkangngu sangkatou apan mapia tate ma'ola'a apapia lai, ewe'e mannatakke ma'ola'a al᷊al᷊eo wuṛṛu al᷊awo'u inolaanna ma'arantinna apan inanaramanne a'olaannu taumata lal᷊eo, apa i tou sidutu wiakka? Tawe! Wuassu manga inolaanne apan mapia udde, tawe saran sambau apan naunganna apia. I tou sarun mate ana waugu na'ola'a rosa wuṛṛu tawe satia si Ya'u.

²⁵Asinungka piaddu mabbisara arendi, “Inolaannu MAWU na'al᷊iwu.” Paddaringikke, ei taumatan Israel! Apa manara-U niumal᷊iwu? Ete i yamiu apan naal᷊iwu.

²⁶Amungkangngu taumata apan mapia tate ma'ola'a apapia lai, ewe'e mannatakke ma'ola'a al᷊al᷊eo, i tou sarun mate, ana waugu al᷊al᷊eo apan buatte niolange.

²⁷Arawe amungkangngu taumata apan dal᷊eo tate ma'ola'a rosa apia ewe'e mannatakke ma'ola'a inolaanna apan naṛṛino wuṛṛu mapia, niawane sarun masal᷊amatta.

²⁸I tou buatte naatutukka al᷊awo'u inolaanne ana see nangillol᷊ote ma'ola'a rosa. Ringannu aroddi i tou sarun tawe mate, ewe'e sidutu wiakka.

²⁹Wuṛṛu i yamiu, ei manga taumatan Israel, i yamiu mabbisara manungku inolaannu MAWU udde naal᷊iwu. Apa inolaang-Ku naal᷊iwu, ei Israel? Tawe! Ete i yamiu apan naal᷊iwu!”

³⁰MAWU Apan Atanggaṛṛanne nabbisara, “Ei manga taumatan Israel, i Ya'u sarun makkuungngu suapan taumata uasul᷊ungngu inolaanne. Awal᷊ute wuassu manga rosanu. Arie pabbala'a rosanu makkimunsa'a watangannu.

³¹Addoa'e al᷊awo'u al᷊al᷊eo apan niola'i yamiu wuṛṛu wala'e naungnga wuṛṛu ṛingirannu mabbal᷊i wakku. Anio i yamiu ṛinone mate?

³²I Ya'u tawe mal᷊uassa amungkangngu pia sangkatou mate. Tantanga'e manga rosanu tadea'u i yamiu sidutu wiakka. I Ya'u MAWU Apan Atanggaṛṛanne buatte nabbisara.”