Read Talaud YEHEZKIEL 19 Bible Online

YEHEZKIEL 19 - Talaud bible

YEHEZKIEL 19

¹Ruata nandolo'u niapaantarin sasangitta indi hunan duang katou parinsin Israel:

²Inangngu naal᷊ihidda singa wawine apan matohassa wuṛṛu tawe sul᷊ungnge. I tou namadul᷊i manga anange suwallattu manga singa matohassa.

³Sambau suwallattu manga anangne nitantiroanne wuṛṛu niaṛṛaanne maddea'a wiakka. Ne i tou naola'e singa timmade mananametta wuṛṛu uma'inassa taumata.

⁴Manga walahanna apan naaringikka su ola'i tou naammulla tadea'u manametta si tou. I tou niasametta sulal᷊ummu paṛṛaba wuṛṛu nitawanna, ana see niapidda watukku Mesir ringannu aaitta.

⁵Tawe gunane inangnge maṛṛaddo anangne; ana see i tou naasingkatta manungku antimme nawul᷊ite. Ne manga anange waine niaṛṛaanne lai nabbal᷊i singa mal᷊aṛṛaga wuṛṛu matohassa.

⁶Ana'u singa udde nabbal᷊i timmade wuṛṛu naggaweten manga singa waine. I tou massal᷊umma manametta wiakka, wuṛṛu nabbal᷊i taṛṛa inassa taumata lai.

⁷Manga tanda batu nirombane, manga soa nihohakke. Anambon tumana'u soa mangngiladda maaringikka tingikke apan maddallu'a.

⁸Arawe manga raratuannu walahanna uatatawine nanametta si tou wuassu anambon tampa. I mangitou mantaingngu soma ipanametta si tou, wuṛṛu i tou lai niasametta sulal᷊ummu sedda mangitou.

⁹I tou niapasuttate sulal᷊ummu uṛṛungu singa wua'udde niapidda watukku wanua Babel, niapasaruanna ratu. I tou tataṛṛapanna mapia tadea'u tingikke tate iaringikka apia doso su manga wuiddu Israel apan matanggakka.

¹⁰Inangngu naal᷊ihidda punnu anggore maṛṛansanga apan tuttuwo su wailla maranin sungene. I tou naola'a mapaṛṛampunga wuṛṛu nabbua ana waugu isudde ua'e marasai.

¹¹Pengane matohassa, tawe hampa paddianna ṛinone olaanna ta'innu araratuanna. Puidde matanggakka uatantingnga mangamete manga winabbawa. I tou iaatiangngan awadaalla ana waugu i tou matanggakka wuṛṛu rongngane maappala.

¹²Arawe i tou niabuttu manga lima apan massa'u, wua'udde niema'a su leta'a. Anginna Ra'i tinumiuppa, naṛṛangute wuane apan mapia. Rannane napaddi, naṛṛangu see nitutungnga.

¹³I tou nisuanna su wadda'u anne, su leta'a annalanne wuṛṛu tawe ua'ene.

¹⁴Punnu anggore udde nilewan putungnga; ranna wuṛṛu wuane nasue nepodda. Rannane indi tate auatanne; tawe mariaddi olaanna ta'innu araratuanna. Eteudde sasangitta apan masokka-sokka ia'antarin umatta.