Read Talaud YEHEZKIEL 20 Bible Online

YEHEZKIEL 20 - Talaud bible

YEHEZKIEL 20

¹Su allo appul᷊one wul᷊anna al᷊imane, sulal᷊ummu tonna appitune sutempo i yami niwuangnga, manga pira piaṛṛa'u Israel nirumanta ringangku maddorongnga tatantiro MAWU. Napawe i mangitou ua'iante su saruangku,

²i ya'u naaringikka MAWU nabbisara si ya'u,

³“Ei taumata apan mattate, pabbisarate si manga piaṛṛa'a udde wuṛṛu wal᷊oa'a manungku i Ya'u, MAWU Apan Atanggaṛṛanne nabbisara arendi, ‘Waṛṛani atonna i yamiu maddorongnga tatantiro si Ya'u! Ringannu arang-Ku, Ruata apan biakka, i Ya'u maddiri paddorongannu tatantiro! I Ya'u, MAWU Apan Atanggaṛṛanne buatte nabbisara.’

⁴Ei taumata apan mattate, nasaddiate i'o mkkuungngi mangitou? Ne, amata'e! Panaunga'a si mangitou al᷊awo'u al᷊al᷊eo apan buatte niola'u al᷊amona mangitou.

⁵Pasingkata'e wisara-U indi. I Ya'u buatte namile Israel wuṛṛu nassalu si mangitou. Su Mesir i Ya'u napal᷊iatta'u watangang-Ku si mangitou lapiddu nabbisara, ‘Ete i Ya'u MAWU Ruatanu.’

⁶Sutempo udde i Ya'u nassalu sarun mangapiddi mangitou sumabbanga wuassu Mesir mattuddan banua apan Ta'u nipile ionggolla si mangitou. Wanua udde ala wuṛṛu masuwukka, leta'a apan apianne su ahewallu runia.

⁷Ta'u nirolokka i mangitou nandamme manga paal᷊uanna apan ma'arantinna apan ipaapulu mangitou udde, wuṛṛu Ta'u nisingadda i mangitou malluhuda watanganne ringannu massubba manga paal᷊uanna wuassu Mesir, ana waugu ete i Ya'u MAWU Ruata mangitou.

⁸Arawe i mangitou lullawangnga si Ya'u wuṛṛu maddiri maddaringikka si Ya'u. I mangitou maddiri manddamme manga paal᷊uanna apan maarantinna udde wuṛṛu lai maddiri mangillol᷊o massubba manga paal᷊uanna wuassu Mesir. Sutempo i mangitou ta'e poiaroddi, i Ya'u nasaddiate mapasabbangngu asasa'u-U si mangitou.

⁹Arawe i Ya'u tawe na'ola'a udde, tadea'u arang-Ku tawe al᷊uandahannu manga walahanna su tampa i mangitou uatana'a. Ana waugu su saruannu manga walahanna udde, i Ya'u buatte namasingkatta manungku walahannu Israel sarun Ta'u iapidda sumabbangnga wuassu Mesir.

¹⁰See i mangitou Ta'u niapidda sumabbangnga wuassu Mesir nabatukku wadda'u anne.

¹¹Poiaroddi Ta'u nionggolla si mangitou manga parenta-U wuṛṛu Ta'u niaṛṛaannu manga tita-U apan ṛinone tuṛṛutanni mangitou, ana waugu taumata apan tuttuṛṛuta sidutu sarun wiakka.

¹²I mangitou Ta'u nirolokka mamantuga allon Sabat maola'a sambau tialan paaire-Ku si mangitou, tadea'u mapanaungnga si mangitou manungku i Ya'u MAWU, buatte naṛṛae mangitou si Ya'u.

¹³Arawe su wadda'u anne udde, i mangitou nilumawangnga manga parenta-U, wuṛṛu nanol᷊a'u manga tita-U apan maola'a wataṛṛu manungku taumata apan matuṛṛuta sidutu wiakka. I mangitou tumanite nanggal᷊usa'a allon Sabat. Ana waugu udde, su wadda'u anne udde i Ya'u nasaddiate mamallossu asasa'u-U su saruanni mangitou wuṛṛu mamate si mangitou.

¹⁴Arawe i Ya'u maddiri ma'ola'a udde waugu awawantugu arang-Ku, tadea'u arang-Ku tawe al᷊uandahannu manga walahanna apan naasilo si Ya'u nangapiddu Israel sumabbangnga wuassu Mesir.

¹⁵Su wadda'u anne udde lai i Ya'u namansagu walahannu Israel tawe Ta'u iapidda sumutta su leta'a apan ala wuṛṛu apianne su ahewallu runia.

¹⁶Wawansaga udde Ta'u niwisara ana waugu i mangitou tawe maddaringikka manga parenta-U, nilumawangnga manga tita-U wuṛṛu nanggal᷊usa'a allon Sabat. I mangitou mappianne massubba manga paal᷊uanni mangitou.

¹⁷Arawe wua'udde i Ya'u niumakkanni mangitou, na'oman sara i mangitou tawe nariaddi nipate-U su wadda'u anne udde.

¹⁸Arawe nawal᷊i'a ingana'a dario'a suwallatti mangitou Ta'u nitantiroanna arendi, ‘Imbaṛṛangnga tumuṛṛutta manga atoranna apan niola'u iupungngu al᷊amonanu. Arie mattanno anarammi mangitou wuṛṛu arie pa'ola'a rosa su watangannu ringannu massubba manga paal᷊uanni mangitou.

¹⁹Ete i Ya'u MAWU Ruatanu. Paatuṛṛutte manga tita wuṛṛu manga parenta-U.

²⁰Pangaddate allon Sabat tadea'u maola'a tatialan paaire-U si yamiu, tadea'u mapanaungngi yamiu manungku ete i Ya'u MAWU Ruatanu.’

²¹Arawe ingana'a saṛṛen tumuwo udde mal᷊awangnga si Ya'u. I mangitou lullawangnga manga tita-U wuṛṛu tawe maddaringikka manga parenta-U, apan maola'a wataṛṛu manungku taumata apan tuttuṛṛuta udde sidutu wiakka. I mangitou manggal᷊usa'a allon Sabat. Ana waugu udde i Ya'u nasaddiate mamallossu asasa'u-U su saruanni mangitou su wadda'u anne udde wuṛṛu mamate si mangitou sarangkanambone.

²²Arawe i Ya'u tawe na'ola'a tadea'u arang-Ku tawe lobbosannu manga walahanna apan naasilo si Ya'u nangapiddu Israel sinumabbangnga wuassu Mesir.

²³Su wadda'u anne udde i Ya'u nassalu manungku i Ya'u sarun manal᷊iawukki mangitou su ahewallu runia,

²⁴ana waugu i mangitou buatte nangapissa manga parenta-U, lullawangnga manga tita-U, wuṛṛu nanggal᷊usa'a allon Sabat, wuṛṛu massubba manga monganna apan raddaloannu iupungngi mangitou.

²⁵Wua'udde i Ya'u nangongolla si mangitou manga tita apan dal᷊eo wuṛṛu manga parenta apan tawe mangonggollu wiakka.

²⁶Ta'u niwala i mangitou nanggal᷊usaa'a watanganne ringannu manga sasamba mangitou sassane, ewe'e lai manga ana'a esakka pahul᷊u niola'i mangitou sasamba. Ringannu olangnge udde i Ya'u makkuumanni mangitou tadea'u i mangitou maasingkatta manungku ete i Ya'u MAWU.

²⁷Ne, taumata apan mattate, wal᷊oa'a su taumatan Israel, apa apan i Ya'u MAWU Apan Atanggaṛṛanne mabbal᷊o si mangitou: Indi sonto waine apan mapal᷊iatta'a ereapa iupungngu al᷊amonanu nangal᷊uandaga si Ya'u wuṛṛu tawe satia si Ya'u.

²⁸I Ya'u nangapiddi mangitou su leta'a apan buatte niriandi-U si mangitou. Sutempo i mangitou maasilo manga wuidda apan matanggakka wuṛṛu manga aal᷊uanna apan mapaṛṛampunga, i mangitou mangonggollu sasamba su manga tampa udde. I mangitou napasa'u-U ana waugu manga sasamba itattambunna wuṛṛu anggore sasamba mangitou.

²⁹I Ya'u naiwal᷊o si mangitou, ‘Manga tampa apan matanggakka ereapa apan tattemboanni yamiu udde?’ Ne nanattakka orassa udde manga tampa udde nisaggo ‘Manga tampa matanggakka’.

³⁰Nariaddi pasingkata'a su taumatan Israel apa apan i Ya'u, MAWU Apan Atanggaṛṛanne nabbal᷊o si mangitou. ‘Anio i yamiu na'ola'a manga rosa ere buatte niola'u iupungngu al᷊amonanu? Ere lai i mangitou, i yamiu lai mengngaṛṛussa manga paal᷊uanna apan maarantinna udde.

³¹Ewe'e naddatingngu orassa indi lai i yamiu mandantinnu watangannu ringannu nangapiddu sasamba wuṛṛu nanambunnu manga anangngu maola'a sasamba su manga paal᷊uanna. Ana see ta'e lai waṛṛani i yamiu maddorongnga tatantiro wuassia-U? Sulal᷊ummu arang-Ku, Ruata apan biakka, MAWU Apan Atanggaṛṛanne, i yamiu tawe Ta'u iwala madorongnga tatantiro wuassia-Ku.

³²I yamiu maapulu massulungngu manga walahanna waine wuṛṛu tumana'u manga wanua waine apan maasubba aaluanna wuṛṛu watu. Arawe apulunu udde tawe maola'a.’ ”

³³“Sulal᷊ummu arang-Ku, Ruata apan biakka, MAWU Apan Atanggaṛṛanne, i yamiu Ta'u iapanaungnga manungku ana waugu asasa'u-U, i yamiu sarun parentang-Ku ringannu maṛṛagissa wuṛṛu matotogga ma'oman sara i yamiu maasingkatta taṛṛino-U. I yamiu apan buatte Ta'u nisal᷊iawukka.

³⁴

³⁵See i yamiu sarun Ta'u iapidda watukku ‘Wadda'u Manga walahanna’. Poiaroddi i yamiu sarun Ta'u parikisanna ringannu uahahati,

³⁶ere lai buatte Ta'u niola'a su saruannu al᷊amonanu su Wadda'u Sinai. I Ya'u MAWU Apan Atanggaṛṛanne buatte nabbisara.

³⁷I yamiu sarun Ta'u olaanna ringannu maṛṛagissa tadea'u i yamiu tumuṛṛutta pa'aire-U.

³⁸Manga lumal᷊awangnga wuṛṛu mandal᷊al᷊eo sarun Ta'u iramme wuassu wallatti yamiu. I mangitou sarun Ta'u iapidda sumabbangnga wuassu manga wanua tampa atatanaanni mangitou orassa indi wuṛṛu tawe Ta'u iwala mabbelengnga su leta'u Israel. Ne i yamiu naasingkatte manungku i Ya'u MAWU.”

³⁹MAWU Apan Atanggaṛṛanne nabbisara, “Ei manga taumatan Israel, orassa indi walate i'o. Asal᷊a'e ma'ola'a rosa ringannu massubba manga paal᷊uannu! Arawe paanaungete manungku wua'udde i yamiu ṛinone tumuṛṛutta si Ya'u wuṛṛu tate lai mallobbossa arang-Ku apan na'ukkassa ringannu mangngapiddu sasamba su manga paal᷊uannu udde.

⁴⁰Ana waugu udde su leta'u Israel, su puiddu wowone-U apan na'ukkassa, i yamiu sarangkanambone walahannu Israel sarun massubba si Ya'u. Poiaroddi i Ya'u saru mal᷊uassa wuṛṛu mappulute manengkamma sasambanu, manga aonggolla apan apianne wuṛṛu manga darangngunu apan uaṛṛaete.

⁴¹Napawe i yamiu Ta'u niapidda sinumabbangnga wuassu manga wanua sutampa i yamiu nisal᷊iawukka, i Ya'u sarun mangammulli i yamiu wuṛṛu manengkamma al᷊awo'u sasambanu itattambunna. Ne anambon balahanna maasingkatte manungku i Ya'u indi Ruata Apan na'ukkassa.

⁴²Sutempo i yamiu Ta'u iapidda mabbelengnga su leta'u Israel, leta'a apan Ta'u pina'ire su iupungngu al᷊amonanu ne i yamiu naasingkatte manungku ete i Ya'u MAWU.

⁴³Poiaroddi i yamiu sarun maanaungnga anambon inolaanna apan maarantinna apan buatte naarosa watangannu. Ne i yamiu sarun maddantinna maanaungnga anambon arariadianna udde.

⁴⁴Sutempo i yamiu buatte Ta'u niola'a aroddi hunan awawantugu arang-Ku, wuṛṛu wal᷊ine nassul᷊ungngu ala'uannu apan dal᷊eo see inolaannu apan tawe matataṛṛino, i yamiu taumatan Israel maasingkatte manungku ete i Ya'u MAWU. I Ya'u MAWU Apan Atanggaṛṛanne buatte nabbisara.”

⁴⁵MAWU nabbisara arendi si ya'u,

⁴⁶“Ei taumata apan mattate, pa'ellege su samba'a timukka. Tagguitte leta'u timukka wuṛṛu paṛṛammaite mahurangnge poiaroddi.

⁴⁷Doloṛṛa'e mahurangnge udde maddaringikka si Ya'u MAWU Apan Atanggaṛṛanne mabbisara si tou, ‘Paddaringikka! I Ya'u sarun mapaṛṛenggammu putungnga apan manoṛṛobba sara masue suapan aal᷊uanna tatahuanannu, mawae ete naṛṛangute aroddi lai apan tuttuwo apia. Putungnga apan lukkenggamma udde tawe iapadumma. I tou sarun lumewa wuassu timukka maddatingngu sawannakka, wuṛṛu anambon taumata sarun maapendamma sal᷊ihangne.

⁴⁸I mangitou sarun maatutukka manungku i Ya'u, MAWU buatte nakkenggamma putungnga udde, wuṛṛu tawe saran sangkatou apan botongne maapadumma putungnga udde.’ ”

⁴⁹Arawe i ya'u Yehezkiel namasingkattu abaratangku wuṛṛu nabbisara, “MAWU Apan Atanggaṛṛanne, i ya'u arie paddoloṛṛa'a mabbal᷊on udde! Awada'alla sussal᷊iomanna ana waugu i ya'u mappulu mabbisara ringannu sasumandingnga na'oman sara masahadda passunnanne.”