Read Talaud YEHEZKIEL 22 Bible Online

YEHEZKIEL 22 - Talaud bible

YEHEZKIEL 22

¹MAWU nabbisara si ya'u, wisara-Ne,

²“Ei taumata apan mattate, i'o nariahite makkuungngu soa apan napene ringannu pamamate udde. Ta'ea'e si tou al᷊awo'u inolaanne apan ma'arantinna.”

³MAWU Apan Atanggaṛṛanne nandolo'u niapapasingkattu tanata indi su Yerusalem, “I'o nassal᷊a ana waugu buatte namate wuassu tumanangngu sassane, wuṛṛu buatte nandal᷊eo watangannu ringannu massubba manga paal᷊uanna niolangngu sassane. Ana waugu udde tempo pakkuungannu maranite wuṛṛu su ola'u watangannu maranite masue. I'o Ta'u iwala maola'a punnu aal᷊uandaga wuṛṛu papal᷊age su manga walahanna wuṛṛu su anambon banua.

⁵I'o a'al᷊uandahannu manga wanua apan marau wuṛṛu marani ana waugu i'o sidutu lullawangnga tita wuṛṛu atoranna.

⁶Anambon piaṛṛa'u Israel mangngasakku atatohanne sassane wuṛṛu ma'ola'a pamamate.

⁷Tawe saran sangkatou wuassu tumanangngu mangaddata hagurangnge. I'o mammahia taumata raho wuṛṛu manganu untungnge wuassu asasusan bawine wal᷊u wuṛṛu asisi timpal᷊ussa.

⁸Manga tampa patataṛṛamawuanna si Ya'u nilal᷊eonu wuṛṛu allon Sabat tawe iareganu.

⁹Suwallattu tumanangngu pia manga taumata taṛṛa sondo apan apulune mallobbossa taumata waine tadea'u iṛṛuumanna pateanna. Piaddu lai apulune u'inassa ṛemessa apan buatte nionggolla su manga monganna. Piaddu lai apulune ma'ola'a pasasandaga.

¹⁰Piaddu mammono'a wuṛṛu mattiilla ringannu inangnga uatangne, wawine apan a'amatannu radda'u wawine,

¹¹awingngu taumata waine ara'e mananambone ara'e tuari uapapaṛṛala inangnga.

¹²Piaddu lai apan naola'a mamamate wabbaeṛṛanna, taṛṛal᷊inga wuṛṛu taṛṛa woddo manga taumata sambalahanne. I mangitou sarangkanambone na'abul᷊i-U te. I Ya'u MAWU Apan Atanggaṛṛanne buatte nabbisara.

¹³Arawe orassa indi i Ya'u sarun mandissa manga mangangaṛṛo wuṛṛu mamamate si yamiu.

¹⁴Ta'e waṛṛaniwe ara'e ta'e matohassawe i'o mamatten limanu napawe i Ya'u nuddusse makkuumannu? I Ya'u, MAWU Apan Atanggaṛṛanne buatte nabbisara wuṛṛu i Ya'u sarun mapaamattu apa apan buatte Ta'u niwisara.

¹⁵I Ya'u sarun manal᷊iawukku tumanangngu su ahewallu wanua wuṛṛu walahanna, wuṛṛu i Ya'u sarun mapaaddon inolaannu apan dal᷊eo udde.

¹⁶I'o sarun al᷊uandahannu manga walahanna waine, ne i'o naasingkatte manungku ete i Ya'u MAWU.”

¹⁷MAWU nabbisara si ya'u,

¹⁸“Ei taumata apan mattate, manga taumatan Israel udde tawe gunane si Ya'u. I mangitou naal᷊ihidda sapaddu atta'a lal᷊o'anna, naal᷊ihidda witu'a, timah, atta'a wuṛṛu timah ma'itumma apan nallambe napawe sal᷊a'a niwaresite sulal᷊ummu sunggilla.

¹⁹Ne orassa indi, i Ya'u, MAWU Apan Atanggaṛṛanne mabbisara si yamiu manungku i mangitou naal᷊ihidda logamma apan tawe gunane udde. Su ereapa sambatu sal᷊a'a, witu'a, atta'a, timah ma'itumma wuṛṛu tima mawira nitambunna sulal᷊ummu sunggilla waresianna, aroddi lai i mangitou sarun Ta'u iammulla wuṛṛu Ta'u iapidda su Yerusalem. Asasa'u-U apan bahewalla sarun mangonossi mangitou naal᷊ihidda putungnga nangonosu manga logamma.

²¹Ore, i Ya'u sarun mangammulli mangitou su Yerusalem, makkunuttu putungngu asasa'u-U su alungngi mangitou, na'oman sara i mangitou mangke umonossa.

²²Naal᷊ihidda sal᷊a'a nionossa su sunggilla, aroddi lai i mangitou sarun ionossa su Yerusalem. Ne i mangitou maasingkatte manungku i Ya'u, MAWU, buatte namallossu asasa'u-U si mangitou.”

²³MAWU nabbisara apia si ya'u, wisara-Ne,

²⁴“Ei taumata apan mattate, wal᷊oa'a su taumatan Israel manungku leta'i mangitou narosate, wuṛṛu ana waugu udde i Ya'u nasa'u wuṛṛu makkuumanne.

²⁵Manga piaṛṛangnge naal᷊ihidda singa apan mammassinga napawe tumambo wiakke. I mangitou mammate tumanangnge, mangngaṛṛo anambon darotongnga wuṛṛu pa'aala apan niasangkal᷊anni mangitou wuṛṛu naaola'a manambo wawine wal᷊u.

²⁶Manga imam Israel nilumawangnga manga tita-U wuṛṛu nalluhudda manga saranapa apan niṛṛa'e si Ya'u. I mangitou waggate ma'ellega suapa apan botongnge wuṛṛu apa apan isassingadda. Wuṛṛu lai i mangitou tawe mangaṛṛa'a tumanangnge tadea'u masingkatta ma'ellega suapa apan baresi wuṛṛu suapa apan dal᷊eo tumuṛṛuttu atorannu agama. I mangitou tate mangareggan allon Sabat. Ringannu aroddi i Ya'u nilobbosannu walahannu Israel.

²⁷Manga tembonanne su pamarenta ere serigala apan mammaṛṛu wiakke. I mangitou ma'ola'a pamamate tumba'u ana maddea'a auntunganna.

²⁸Manga nabi mammuni manga rosa udde; i mangitou naal᷊ihidda taumata apan mammuṛṛa darandungnga apan kotoṛṛe. Manga aellegi mangitou awusu, aroddi lai manga pani'atti mangitou. I mangitou mangnga'u manungku tanata apan niapasingkatti mangitou uddewe apan nisengkammi mangitou wuassu MAWU Apan Atanggaṛṛanne, sumbal᷊i i Ya'u mangke tawe nabbisara si mangitou.

²⁹Manga taumata ala mammahia wuṛṛu mangngaṛṛo. I mangitou ma'ola'a taumata asiangnga ringannu walate apulu wuṛṛu mangnganu auntunganna wuassu taumata raho.

³⁰Suwallattu taumatan Israel udde, i Ya'u maddea'a taumata apan botongne mapararisikku darandungnga, ara'e dumarisikka su manga tampa apan manga darandung naṛṛa'a ipanahekku wanua udde napawe i Ya'u makkimunsa'e sulal᷊ummu sasopan asasa'u-U; arawe tawe saran sangkatou apan Ta'u niasangkal᷊anna.

³¹Ana waugu udde orassa indi Ta'u iapassabangnga asasa'u-Ku su saruanni mangitou, wuṛṛu naal᷊ihidda putungnga i Ya'u sarun mamate si mangitou ana waugu al᷊awo'u inolaanni mangitou. I Ya'u MAWU Apan Atanggaṛṛanne buatte nabbisara.”