Read Talaud YEHEZKIEL 24 Bible Online

YEHEZKIEL 24 - Talaud bible

YEHEZKIEL 24

¹Su allo appul᷊one, wul᷊anna mapul᷊o, sulal᷊ummu tonna assione sutempo i yami niwuangnga, MAWU nabbisara si ya'u,

²“Ei taumata apan mattate, woṛṛeta'e tanggalu allo indi, ana waugu allo indi ratun Babel manattakke mamangalo Yerusalem.

³I Ya'u, MAWU, pia sambau sasumandingnga iapasingkatta su uma-U apan apulune lumawangnga: Lal᷊ina'a ua'e sulal᷊ummu awali ana see wuntal᷊a'e su putungnga.

⁴Taṛṛoa'e ṛemessa sulal᷊umne ṛemessa apan apianne temange; ṛemessu wambangnga wuṛṛu ṛemessu palange see manga duṛṛi apan manambo taggal᷊alukke.

⁵Paata'e ṛemessu domba apan matawa wuṛṛu muda tambai lai alune su sunggilla. Wala'a pahogoṛṛa'a wuṛṛu sumopa ua'ene lantute ṛemessa udde ringannu manga duṛṛine.”

⁶MAWU Apan Atanggaṛṛanne nabbisara, “Nasilakate soa apan nepenen taṛṛa pate udde! Soa udde naal᷊ihidda urinna nitaianna apan tawe niraddassa. Ṛemessa apan uataṛṛo sulal᷊umme nisabbangnga passampoto, na'oman sara taweddu nallambe.

⁷Su soa udde nariaddite pamamate, arawe daṛṛane tawe nabboso su leta'a, ewe'e su watu apan maatikka, na'oman sara tawe iasooppa.

⁸Daṛṛa udde Ta'u niwala isudde na'oman sara wotongnge aellehanna wuṛṛu maddorongnga wawal᷊inne.”

⁹MAWU Apan Atanggaṛṛanne nabbisara, “Nasilakate soa apan napenen taṛṛa pate udde! I Ya'u sassane sarun mangatokku alu ipanambunna.

¹⁰Tambaite alune! Alawete putunge! Lantute ṛemenne! Rammea'e sawone! Tambona'e manga duṛṛine!

¹¹Orassa indi addoa'e urinna witu'a apan tawe loṛṛone udde su putungnga wuṛṛu wala'e ma'oman sara maṛṛamutta. Napawe taine natutungke, urinna udde sarun mawaresi apia tumuṛṛuttu atorannu agama.

¹²Arawe tawe anambon taine mawul᷊i matutungngu putungnga.

¹³Ei Yerusalem, manga inolaannu apan dal᷊eo buatte nalluhuda watangannu. Ia'o buatte na'annamma mamaresi si'o, arawe tawe gunane, waugu i'o sidutu lal᷊eo. I'o tate mawaresi apia ma'oman sara i Ya'u mapasabbangngu asasa'u-U si'o.

¹⁴I Ya'u, MAWU Apan Atanggaṛṛanne buatte nabbisara. Nia'omante tempone si Ya'u mammanara. I Ya'u sarun tawe maabul᷊in paddarosanu wuṛṛu tawe lai mangampungnga ara'e umakkannu. I'o sarun iṛṛuumanna uasul᷊ungngu al᷊awo'u inolaannu. I Ya'u MAWU Apan Atanggaṛṛanne buatte nabbisara.”

¹⁵MAWU nabbisara si ya'u,

¹⁶“Ei taumata apan mattate, ringannu mamaṛṛoro i Ya'u sarun mangal᷊appa taumata apan arangnguang-Ku. Arawe i'o tawe wotongnge lumallu wuṛṛu lumuai, ara'e lai mamalan allom matanu ual᷊aikka.

¹⁷Arie ma'oman sara lal᷊uainu aringiṛṛanna. Arie umamatta tawe tatindungu pua, arie tawe apampakku ledda, ere taumata apan lullal᷊o. Arie lai hatinu taapanna, wuṛṛu arie umanna rotin lal᷊al᷊o.”

¹⁸Marua allo maṛṛanggapa i ya'u nabbisarate su walahanna udde wuṛṛu ṛabbine awingku nate. Tiṛṛabbine i ya'u na'ola'a apa niparenta si ya'u.

¹⁹Lal᷊oṛṛon soa naiwal᷊o, “Anio Iamangnga na'ola'a arendi? Apa atappasanne udde si yami?”

²⁰Ana see ta'u niwisara si mangitou, “MAWU nandolo'u

²¹iapapasingkattu tanata indi si yamiu: I yamiu mammungan atatohassu Wal᷊e MAWU. I yamiu apulune ma'ellega wuṛṛu inai isudde, arawe MAWU sarun mandal᷊eo Wal᷊en-Ne. Wuṛṛu lal᷊oṛṛon amonannu apan ta'e dario'a, apan uatana'a su Yerusalem, sarun pateanna sulal᷊ummu pangalo.

²²Ana see i yami ma'ola'a ere apa apan ta'u niola'a orassa indi. I yamiu sarun tawe manaappa hatinu ara'e umanna rotin lal᷊al᷊o.

²³I yamiu sarun tawe umamatta ringannu tawe tatindungu pua ara'e apampakku ledda, tawe lumallu ara'e lumuai. I yamiu sarun lembon maṛṛasa ana waugu manga rosanu; i yamiu sarun sumal᷊iomanna sangkatou ringannu waine.

²⁴Ne i ya'u, Yehezkiel sarun maola'a tul᷊adda si yamiu; i yamiu sarun ma'ola'a ere lai ta'u niola'a orassa indi. MAWU nabbisara manungku amungkangngu olangnge udde mariaddi, i yamiu sarun maasingkatta manungku ete i Tou MAWU Apan Atanggaṛṛanne.”

²⁵MAWU nabbisara si ya'u, “Ne, taumata apan mattate, sarun Ta'u anuanna wuassi mangitou Wal᷊e-U apan matohassa udde, apan buatte naola'a ilalluassa wuṛṛu ilallala'i mangitou, wuṛṛu apan a'ellehanna wuṛṛu tattemboanni mangitou ringannu al᷊al᷊uassu naungnga. See i Ya'u sarun manganu al᷊aṛṛana'i mangitou.

²⁶Su allo i Ya'u ma'ola'a olangnge udde, sangkatou apan naatal᷊angnga wuassu papate udde sarun dumanta, wuṛṛu mangapiddu watti'a udde si'o.

²⁷Su allo udde lai i'o sarun maawisara apia wuṛṛu tate imoune apia. See i'o sarun maggahatton taumata udde. Etearoddi i'o sarun maola'a tul᷊adda si mangitou; ne i mangitou maasingkatte manungku ete i Ya'u MAWU.”