Read Talaud YEHEZKIEL 25 Bible Online

YEHEZKIEL 25 - Talaud bible

YEHEZKIEL 25

¹MAWU nabbisara si ya'u,

²“Ei taumata apan mattate, wontohete wanua Amon.

³Doloṛṛa'e walahanna udde maddaringikka apa apan i Ya'u, MAWU Apan Atanggaṛṛanne mabbisara si mangitou, ‘I yamiu mal᷊uassa ma'ellega Wal᷊e-U nilal᷊eo wuṛṛu leta'u Israel nohohakka see walahannu Yahudi niṛṛootta watukku pamamuanganna.

⁴Ana waugu udde i yamiu Ta'u iwala iwaddo manga ṛuanganna walahanna wuassu wadda'u Ra'i. I mangitou sarun mapararisikku manga rasanna su wanuanu ana see mamanuate isudde. I mangitou sarun umanna manga wuang kalunu wuṛṛu ma'inumma susun binatangngu.

⁵Soan Raba sarun Ta'u wal᷊uanna maola'a tampa pamadul᷊iananna unta, wuṛṛu ahewallu wanua Amon mabbal᷊i tampa pamadul᷊iananna domba. Ne i yamiu masingkatte manungku ete i Ya'u MAWU.’ ”

⁶MAWU Apan Atanggaṛṛanne nabbisara, “i yamiu mattal᷊o'appa lapiddu massal᷊aingnga lulluassa. I yamiu mangngadio'a leta'u Israel.

⁷Ana waugu udde i yamiu sarun Ta'u itantilla su manambo walahanna apan sarun mangaṛṛo wuṛṛu maṛṛampassa anambon darotongngu. I yamiu sarun Ta'u pateanna aroddi olangnge, ma'oman sara tate maola'a sambau walahanna wuṛṛu tate lai uatahuanna wanua sassane. Ne i yamiu masingkatte manunku ete i Ya'u MAWU.”

⁸MAWU Apan Atanggaṛṛanne nabbisara, “Moab mabbisara manungku Yehuda udde nassul᷊ungngu manga walahanna waine.

⁹Ana waugu udde manga soa apan mannahekku manga passarannu wanua Moab sarun Ta'u iwala pangaloannu seetta nasutta manga soa apan aṛṛansanganne, eteudde: Bet-Yesimot, Baal-Meon wuṛṛu Kiryataim.

¹⁰I Ya'u sarun mamala manga ṛuangannu walahanna wuassu wadda'u ra'i mamaddo Moab suadio'a ringannu wanua Amon, na'oman sara Moab tate maola'a sambau walahanna.

¹¹I Ya'u sarun makkuumannu Moab, ne i mangitou masingkatte manungku ete i Ya'u MAWU.”

¹²MAWU Apan Atanggaṛṛanne nabbisara, “Walahannu Edom buatte na'ola'a pasasal᷊a wahewalla ana waugu tumanite maṛṛagissa su Yehuda, ere inolaanna ipabbal᷊issa.

¹³Ana waugu udde i Ya'u mangal᷊iata manungku i Ya'u sarun makkuumannu Edom wuṛṛu mamate suapan taumata wuṛṛu suapan binatangnga poiaroddi. Ahewallu wanua udde, wuassu soa Teman maddatingngu soan Dedan, Ta'u olaanna mal᷊annabba; tumanangnge sarun mate sulal᷊ummu pangalo.

¹⁴Walahang-Ku Israel sarun Ta'u ipaatta ipabbal᷊issa naungnga lal᷊eo su Edom, wuṛṛu Edom sarun olaanna ringannu asaddatu asasa'u-U. Edom sarun maasingkatta ereapa temangnge maola'a tuddan asasa'u-U. I Ya'u MAWU Apan Atanggaṛṛanne buatte nabbisara.”

¹⁵MAWU Apan Atanggaṛṛanne nabbisara, “Manga taumatan Filistin buatte nabbal᷊issa al᷊al᷊eo naungnga ringannu maṛṛagissa su saruannu seetti mangitou apan mal᷊annute wuṛṛu namate si mangitou ringannu napenen araratinna.

¹⁶Ana waugu udde i Ya'u sarun mamangalo manga taumatan Filistin wuṛṛu mamate si mangitou. Suapan taumata lambene su wageangngu leta'u salleannu Filistin sarun Ta'u pateanna.

¹⁷I Ya'u sarun makkuumanni mangitou ringannu lembon mawakkatta wuṛṛu mapasopan al᷊al᷊eo naung-Ku ma'oman sara mawusa. Napawe i mangitou naapendampe asasa'u-U, i mangitou naasingkatte manungku ete i Ya'u MAWU.”