Read Talaud YEHEZKIEL 27 Bible Online

YEHEZKIEL 27 - Talaud bible

YEHEZKIEL 27

¹MAWU Apan Atanggaṛṛanne nabbisara si ya'u, “Ei taumata apan mattate, pangantariten antari pallal᷊abinga indi su Tirus, soa su winggin raduhanna apan mabbal᷊u'a ringannu tumana'u al᷊awo'u radduhanna: Tirus, ringannu mawunga i'o mabbisara, ‘Araṛṛama'u mangke nasuungnga!’

⁴Si'o laudda naal᷊ihidda wal᷊en. I'o niapararisikka ere apalla apan maṛṛansangnga.

⁵Darandungngu alu aras Wowon Hermon pal᷊iaṛṛannu senggonu alu cemara wuassu Libanon.

⁶Manga daralungu niola'a wuassu manga alu wahewalla su Basan. Apampakku apallu niola'a wuassu alu cemara, wuassu taṛṛanusan Siprus niranta, lal᷊ogakke gadingnga apan maarega niatokka.

⁷Senggotta wuṛṛu waneṛṛanu wuassu linen niola'u Mesir, ringannu anambon sujine. Tumaniten al᷊ussa aola'u manga rasannu, mal᷊aṛṛenessa wuassu Siprus kalurene ungu.

⁸Mandaralungngu wuassu Sidon wuṛṛu Arwad. Masanaenu sassane matatahoal᷊oangnga apan mal᷊inso'a.

⁹Manga waseng kalu apan mammanara su apalla uddewe manga base wuassu Gebal. Wuassu al᷊awo'u wanua manga apalla nirumanta ma'ola'a aukku paddaraganga.

¹⁰Manga tantara wuassu Persia, Lidia wuṛṛu Libia sinumutta tantaranu. I mangitou mangngelen allungnga wuṛṛu araposa waja mangitou su manga darandungngu soanu. I mangitou buatte nassumbala mamaddo manga seetta wuṛṛu nanamba atatelengngu.

¹¹Manga tantara wuassu Arwad uariaga su manga darandungngu; manga menaranu rariagannu manga taumata wuassu Gamad. Alungngi mangitou ua'ele uatantaga su manga darandungngu. Ete i mangitou apan nanuungngu araṛṛamagu.

¹²I'o mabbal᷊u'u manga saranapa wal᷊u'annu apan manambo-nambo watukku Spanyol, wuṛṛu maola'a wawaekke i'o nanengkamma sal᷊a'a, atta'a, timah mawira wuṛṛu timah ma'itumma.

¹³I'o mabbal᷊u'a watukku Yunani, su Tubal, wuṛṛu su Mesekh, wuṛṛu naola'a wawaekke i'o nanengkamma wuassi mangitou manga allangnga wuṛṛu manga saranapa wuassu witu'a.

¹⁴I'o nanu'addu manga saranapanu ringannu awal᷊on kereta, awal᷊o sassa'eanna wuṛṛu keledai wuassu Bet-Togarma.

¹⁵Tumana'u Rodus nabbal᷊u'a lai ringannu wuṛṛu tumana'u leta'u apanne namalli manga saranapa wal᷊u'annu ringannu gadingnga wuṛṛu watul᷊ine.

¹⁶Manga mabbawal᷊u'a wuassu wanuan Siria namalli manga saranapa wal᷊u'annu wuṛṛu auntungannu manambo atonna. I mangitou mammaekka ringannu permata wuassu watu zamrud, mal᷊aṛṛenessa maṛṛamu ungu, mal᷊aṛṛenessa pia sujine, linen al᷊ussa, permata wuassu watu koral wuṛṛu watu maṛṛamu delima.

¹⁷Yehuda wuṛṛu Israel nanu'addu saranapanu ringannu gandumma, pul᷊a, lanan zaitun wuṛṛu rampa-rampa.

¹⁸Tumana'u Damsyik namalli saranapa wal᷊u'annu wuṛṛu manga auntungannu wuṛṛu namaekka ringannu anggore wuassu Helbon, wambul᷊un domba wuassu Sahar, atta'a nisassalla wuṛṛu rampa-rampa.

²⁰Tumana'u Dedan namaekka manga saranapanu ringannu manga mal᷊aṛṛenessa apampakku manga aiananna su awal᷊o.

²¹Taumatan Arab wuṛṛu tembonannu leta'u Kedar namalli manga saranapanu ringannu ana'u domba, domba esakka wuṛṛu ambingnga. Su ipamalli manga saranapanu manga mabbawal᷊u'a wuassu Syeba wuṛṛu Raema nangapiddu manga permata, wul᷊awanna wuṛṛu rampa-rampa apan apianne.

²³Manga soan Haran, Kane, Eden, manga mabbawal᷊u'a wuassu Syeba, manga soan Asyur wuṛṛu Kilmad, sarangkanambone mabbal᷊u'a ringannu.

²⁴I mangitou mabbal᷊u'a si'o laubba mangkapia, mal᷊aṛṛenessa maṛṛamu ungu, mal᷊aṛṛenessa pia sujine, manga permadani apan rial᷊u hatine, wuṛṛu manga tal᷊i apan matohassa.

²⁵Saranapa wal᷊u'annu niapiddu wuntuannu apallu ragangnga apan wahahewalla. I'o naal᷊ihidda apalla apan mawakkatta luranne, apalla apan mammare laudda.

²⁶Manga mandaralungnga nangapiddu watukku tahal᷊oangnga mal᷊alangnga. I'o nitiupannu anginna ra'i apan masaddatta.

²⁷Al᷊awo'u saranapan ragangnga lurannu, anambon matatahal᷊oangnga see masanaenu, anambon waseng kalu wuṛṛu mabbawal᷊ungu, suapan tantara su apalla udde, i mangitou sarangkanambone nawul᷊i nawontolla sutempo i'o naṛṛodo'a.

²⁸Manga matatahal᷊oangngu mangngintul᷊i mata'utta aintul᷊ine ia'aringikka su manga apannu tahal᷊oangnga.

²⁹Orassa indi apalla udde nitantangke, anambon matatahal᷊oangngu nawitte su ammaranne.

³⁰I mangitou lulluain ola'u pabbiaṛṛannu, sassal᷊iomanna wuṛṛu lulluai ringannu massusa. I mangitou nanal᷊iawukku awu su pua wuṛṛu tinumal᷊inggi sulal᷊ummu awu tatiala massusa.

³¹Ana waugu i'o i mangitou nallunggukka pua, nalluṛṛen laubba karongnga napenen asasusa. I mangitou lulluai lullal᷊o wuṛṛu lullallun ola'u wiakku.

³²Wua'udde i mangitou nangantarin sambau antarin pallal᷊abinga, ‘Tirus, isai ro'ammu? Tirus, su tahal᷊oangnga i'o orassa indi nimoune.

³³Sutempo i'o namare laudda ringannu luranna apan nasadda-saddatta, i'o nanuungngu hausannu manga walahanna; manga ratu lai niolangngu ala.

³⁴Orassa indi i'o naṛṛodo'e, naṛṛimunsa'a su wantan tahal᷊oangnga. Anambon masanaenu wuṛṛu anambon luranna nawul᷊i suadio'a ringannu su tangngan tahal᷊oangnga.’

³⁵Anambon taumata apan uatana'a su apanne nata'utta naaringikka ola'u wiakku. Manga ratu mangitou lai lembon matta'utta; atata'utta aasiloanna su manga hati mangitou.

³⁶I'o nawul᷊i tawe baddi'a saran mal᷊annu-l᷊annu. Manga mabbawal᷊u'a su ahewallu runia nabbal᷊i niṛṛumindu'a ana waugu matta'utta sarun aṛṛiannu pal᷊addu wiakka ereudde.”