Read Talaud YEHEZKIEL 30 Bible Online

YEHEZKIEL 30 - Talaud bible

YEHEZKIEL 30

¹MAWU nabbisara apia, wisara-Ne,

²“Ei taumata apan mattate, pani'atte wuṛṛu wal᷊oa'e su walahannu Mesir apa apan i Ya'u MAWU Apan Atanggaṛṛanne nabbisara si mangitou. Sal᷊andete wuṛṛu lalluaite arendi: Uare! Allo MAWU maranite! I tou ringannu mal᷊ihakka sarun mammanara. Allo marandumma wuṛṛu pia binabbawa, tempone manga walahanna sarun manengkamma ṛuumanna.

⁴Asasilaka apan wahewalla sarun maṛṛia'a su Sudan. Su Mesir sarun pia pangalo. Manga sasamba sarun matontongnga; ahewallu wanua nipangaṛṛoanna wuṛṛu niola'a winalal᷊anna.

⁵Sulal᷊ummu pangalo udde sarun iapate lai manga tantara nissewanna wuassu Sudan, Lidia, Libia, Arab, Kub wuṛṛu lai wuassu walahang-Ku sassane.”

⁶MAWU Apan Atanggaṛṛanne nabbisara, “Wuassu Migdol su sawannakka maddatingngu Aswan su timukka, anambon hawe Mesir sarun mapul᷊idda sulal᷊ummu pangalo. Wuṛṛu tantara Mesir apan mawunga udde sarun maṛṛimunsa'a uatal᷊eṛṛonga. I Ya'u MAWU Apan Atanggaṛṛanne buatte nabbisara.

⁷Wanua udde sarun mariaddi wanua apan tawe damene suwallattu manga wanua mal᷊annabba waine lai, wuṛṛu manga soane sarun mabbal᷊i manga tuidda.

⁸Sutempo i Ya'u nanoṛṛobba Mesir wuṛṛu namate anambon hawene, i mangitou masingkatte manungku ete i Ya'u MAWU.

⁹Napawe allo udde nia'omante, wuṛṛu Mesir naṛṛimunsa'e, i Ya'u sarun mandolokku manga daroloṛṛanna ringannu manga apalla ipamaṛṛindu'a manga taumatan Sudan apan tawe antage udde, ne i mangitou sarun mata'utta. Atonna, allo udde sarun dumanta!”

¹⁰MAWU Apan Atanggaṛṛanne nabbisara, “I Ya'u sarun mapaatti Ratu Nebukadnezar wuassu Babel ipakkimunsa'a anambon pa'aalan Mesir.

¹¹I Nebukadnezar suadio'a ringannu tantarane apan tawe ampungne sarun dumanta wuṛṛu makkimunsa'a leta'a udde. I mangitou sarun mamangalo Mesir ringannu hal᷊ele, wuṛṛu manga winal᷊unanna sarun uatal᷊eṛṛonga su wanua udde.

¹²I Ya'u sarun mapaamaran Sal᷊ukku Nil wuṛṛu manantillu ahewallu Mesir su manga taumata lal᷊eo. Manga taumata raho sarun Ta'u irolokka iapaṛṛimunsa'a wanua udde. I Ya'u, MAWU, buatte nabbisara.”

¹³MAWU Apan Atanggaṛṛanne nabbisara, “I Ya'u sarun makkimunsa'a manga paal᷊uanna wuṛṛu manga monganna su Memfis. Tate lai ratu su Mesir. Anambon tumanangne sarun Ta'u olaanna matta'utta.

¹⁴Ahewallu Mesir timukka sarun Ta'u olaanna mal᷊annaba wuṛṛu soan Soan su sawannakka sarun Ta'u soṛṛowanna. Tebe inangngu soa udde sarun Ta'u iṛṛuumanna,

¹⁵wuṛṛu paa'alane sarun Ta'u ṛimunsaanna. I Ya'u sarun mamallossu asasa'u-U si Pelusium, soa apan nabbal᷊i tanda batu Mesir,

¹⁶wuṛṛu soa udde sarun lembon matataṛṛangnga. Atonna, i Ya'u sarun manoṛṛobba Mesir. Manga darandungngu soa Tebe sarun maṛṛa'a wuṛṛu soa udde sarun sanggiurannu manawangnga.

¹⁷Manga umbasannu soa Heliopolis wuṛṛu Bubastis sarun mate sulal᷊ummu pangalo, wuṛṛu manga wawine sarun sametanna.

¹⁸Sutempo i Ya'u manginsue awawantugu Mesir wuṛṛu manganu taṛṛinone apan ipammungane, Tahpanhes sarun oopannu ararandumma wuṛṛu manga wawinene sarun sametanna.

¹⁹Etearoddi i Ya'u sarun makkuumannu Mesir, ne i mangitou masingkatte manungku ete i Ya'u MAWU.”

²⁰Su allo appitune wul᷊anna paarorone sulal᷊ummu tonna mapul᷊oassa sutempo i yami niwuangnga, MAWU nabbisara si ya'u,

²¹“Ei taumata apan mattate, i Ya'u buatte namaddi ta'iakku ratu Mesir, wuṛṛu taweddu apan mama'issa ta'iakke udde ara'e maṛṛamissa tadea'u umul᷊e wuṛṛu mabbal᷊i matohassa ipangagassa hal᷊ele apia.

²²I Ya'u MAWU Apan Atanggaṛṛanne nabbisara: i Ya'u indi seettu ratun Mesir, wuṛṛu ta'iakke ruan ba'a sarun Ta'u paddianna, mawae iapa ta'e matohassa ara'e lai iapa napaddite. Ne hal᷊ele udde sarun manawo wuassu limane.

²³I Ya'u sarun manal᷊iawukku taumatan Mesir su ahewallu runia.

²⁴Ana see Ta'u tohassanna ta'iakku ratun Babel, wuṛṛu Ta'u iaddo hel᷊ele-U su limane. Arawe ta'iakku ratu Mesir sarun Ta'u paddianna ma'oman sara i tou sumal᷊iomanna wuṛṛu mate su saruannu ratun Babel, seenne.

²⁵Atonna, ratu Mesir sarun Ta'u iapaal᷊ome, arawe ratun Babel sarun Ta'u tohasanna. Napawe i Ya'u mangonggollu hal᷊ele-U si tou, wuṛṛu i tou mamatte watukku Mesir, i mangitou sarun maasingkatta manungku ete i Ya'u MAWU.

²⁶I Ya'u sarun manal᷊iawukku manga taumatan Mesir su ahewallu runia. Ne i mangitou masingkatte manungku ete i Ya'u MAWU.”