Read Talaud YEHEZKIEL 33 Bible Online

YEHEZKIEL 33 - Talaud bible

YEHEZKIEL 33

¹MAWU nabbisara apia si ya'u, wisara-Ne,

²“Ei taumata apan mattate, wal᷊oa'e su walahannu manungku napawe i Ya'u mandantan pangalo su sambau wanua, eteindi apan sarun mariaddi. Tumana'u wanua udde sarun mamile suwallatti mangitou sangkatou mandariaga.

³Amungkangngu mandariaga udde maasilo seetta rumanta, i tou mapatuntingikku tatialan asasilaka tadea'u anambon taumata mandiahite.

⁴Isai-sai apan maaringikka tatialan silaka udde arawe tawe maddaringikka, wuṛṛu seetta nirumantate wuṛṛu mamate si tou, ne i tou nate ana waugu sal᷊ane sassane. Unnu wisara i tou nangareggan tatialan silaka udde, i tou sarun masal᷊amatta.

⁶Arawe amungkangngu mandariaga udde naasilo seetta nirumanta wuṛṛu i tou tawe napantuntingikku tatialan silaka, see seetta namate manga taumata marosa udde, winabbawa su ola'u papate mangitou Ta'u ipandansilanna si tou.

⁷Ei taumata apan mattate, i'o Ta'u pileanna maola'a mandariaga walahannu Israel. Wal᷊oa'a si mangitou tatagu indi:

⁸Amungkangngu i Ya'u mamasingkatta manungku sangkatou taumata lal᷊eo sarun mate, arawe i'o tawe napanaungngi tou tadea'u i tou mamal᷊u pallal᷊agune ma'oman sara i tou masal᷊amatta, ne i tou sarun mate ta'e sangkatou apan marosa. Arawe pandansilanannu papatene sarun Ta'u doronganna si'o.

⁹Amungkangngu i'o mapanaungngu taumata lal᷊eo udde wuṛṛu i tou maddiri mangillol᷊o ma'ola'a al᷊al᷊eo, i tou sarun nate ere sangkatou apan marosa, arawe i'o sassane sarun masal᷊amatta.”

¹⁰MAWU nabbisara si ya'u, “Ei taumata apan mattate, sul᷊ea'a su taumatan Israel wisaram mangitou indi, ‘I yami maṛṛasa ana waugu uapasanna rosa wuṛṛu al᷊al᷊eong kami. Ereapa i yami wotongne mabbiakka?’

¹¹Wal᷊oa'a si mangitou manungku sulal᷊ummu arang-Ku, Ruata apan biakka, MAWU Apan Atanggaṛṛanne, i Ya'u tawe mal᷊uassa amungkangngu taumata lal᷊eo mate; arawe i Ya'u mappulu manantangngu manga rosane tadea'u i tou sidutu wiakka. Ei walahannu Israel, uddita'e ma'ola'a rosa! Anio i yamiu mappulu nate?

¹²Ne, taumata mattate, wal᷊oa'e su taumatan Israel manungku amungkangngu taumata mapia ma'ola'a rosa, ne apapiane dorone udde tawe maatulungnga si tou. Amungkangngu taumata lal᷊eo naddote ma'ola'a rosa, i tou tawe iṛṛuumanna wuṛṛu amungkangngu taumata mapia ma'ola'a rosa, tawe masal᷊amatta.

¹³Wotongnge mariaddi i Ya'u buatte naddiandi sarun manal᷊amatta taumata mapia, arawe amungkangngu i tou mannattakke ma'ola'a rosa wuṛṛu uaantimma manungku i tou sarun masal᷊amatta ana waugu apapiane dorone udde, i tou nial᷊iwune. I Ya'u tate lai mannaungnga apapiane apan dorone niolangnge wuṛṛu i tou sarun mate ana waugu manga rosane.

¹⁴Wotongnge mariaddi i Ya'u buatte napanaungngu taumata lal᷊eo manungku i tou sarun mate. Arawe napawe i tou maddote ma'ola'a rosa wuṛṛu mannattakke ma'ola'a apapia wuṛṛu naṛṛino, tul᷊addane ere i tou napawelengngu saranapa wua nihadden taumata, ara'e saranapa apan buatte nita'one see tinumuṛṛutte su manga tita apan mangngapiddu pabbiaṛṛanna, ne i tou tawe nate.

¹⁶I Ya'u tate lai mannaungnga manga rosane apan buatte niolangne, wuṛṛu i tou sarun mabbiakka ana waugu pallal᷊agune naṛṛino wuṛṛu mapia.

¹⁷Arawe walahanna udde mabbisara manungku inolaang-Ku udde tawe matul᷊idda! Sumbal᷊i ete inolaanni mangitou apan tawe matul᷊idda.

¹⁸Passa lai Ta'u isul᷊e, maungku amungkangngu taumata mapia mannattakke ma'ola'a al᷊al᷊eo, i tou sarun nate ana waugu udde.

¹⁹Amungkangngu taumata lal᷊eo maddote ma'ola'a rosa, wuṛṛu mannattakke ma'ola'a apapia wuṛṛu naṛṛino, i tou sarun mabbiakka ana waugu udde.

²⁰Salaiwe aroddi walahannu Israel mabbisara manungku inolaang-Ku tawe matul᷊idda. Atonna, i Ya'u sarun makkuungngi mangitou sambau-sambau tumuṛṛuttu inolaanne.”

²¹Su allo al᷊imane wul᷊anna mapul᷊o, sulal᷊ummu tonna mapul᷊o dua sutempo i yami niwuanga, sangkatou apan naal᷊assanga wuassu Yerusalem nirumanta wuṛṛu namasingkatta si ya'u manungku soa udde nanawote.

²²Su ṛabbi sutempo i tou taambe nirumanta, i ya'u naapendampe taṛṛino MAWU. Nariaddi sutempo taumata udde nirumanta ringangku, i ya'u napagahattote wuṛṛu tate nimoune.

²³MAWU nabbisara si ya'u,

²⁴“Ei taumata apan mattate, manga taumata apan uatana'a su winalal᷊annu manga soa su leta'u Israel mabbisara, ‘i Abraham naasomba ahewallu leta'a indi, sumbal᷊i i tou tumba'u sangkatou. I ite indi manambo reenganne, nariaddi leta'a indi mabbal᷊i pussa'ang kite.’ ”

²⁵Ana waugu MAWU Apan Atanggaṛṛanne nandolo'u napapasingkattu tanata-Ne indi si mangitou, “I yamiu u'inassa ṛemessa apan ta'e pia daṛṛane; i yamiu massubba paal᷊uanna wuṛṛu ma'ola'a pamamate. Waṛṛani atonna i yamiu mangnga'u leta'a indi pussaanu.

²⁶I yamiu mangngasakku hal᷊elenu. Inolaannu udde maarantinna. I yamiu sarangkanambone ma'ola'a pasasandaga. Ta'e waṛṛani lai i yamiu manga'u leta'a indi pussa'anu?

²⁷Waugu i Ya'u, Ruata apan biakka MAWU Apan Atanggaṛṛanne, manga taumata apan uatana'a su manga tuiddu soa udde sarun maten hal᷊ele. I mangitou apan uatana'a su manga wadda'a sarun inasannu winatangnga mal᷊aṛṛaga. I mangitou apan uaimbuni su manga wowone wuṛṛu manga loṛṛangnga sarun mate ana waugu al᷊aṛṛusa'itta.

²⁸Wanua udde sarun Ta'u olaanna wadda'u anne apan mal᷊annabba, wuṛṛu taṛṛino apan ipammunga mangitou sarun masue. Manga wowone su Israel sarun mabbal᷊i mal᷊annabba ma'oman sara tawe saran sangkatou waṛṛani umamatta isudde.

²⁹Sutempo i Ya'u makkuumannu walahanna udde ana waugu manga rosa mangitou wuṛṛu ma'ola'a wanua udde mal᷊anna-l᷊annabba, i mangitou masingkatte manungku ete i Ya'u MAWU.”

³⁰MAWU nabbisara, “Ei taumata apan mattate, i'o nabbal᷊ite ipaggahatton taumata sambalahannu sutempo i mangitou pasi passomba marani manga tanda batun soa ara'e su saruannu manga ngaran bal᷊e. I mangitou nabbisara sangkatou ringannu waine, ‘Wette i ite maddaringikka tanata MAWU allo indi.’

³¹I mangitou nirumanta manambo-nambo wuṛṛu ana waugu uma-U i mangitou niuma'ianna maddaringikka manga wisaranu, arawe apa apan niparentanu tawe tuṛṛutanni mangitou. Wiwikki mangitou tumba'u mapasabbangu wisaran pa'aapulu, arawe naungngi mangitou tumba'u maṛṛingiddu auntunganna.

³²I'o sassunnanna sangkatou mangangantari aantarin pa'aapulu apan tingikke matelengnga wuṛṛu pande mannal᷊angnga kecapi. Atonna i mangitou maddaringikka manga wisaranu arawe tawe tumuṛṛutta.

³³Sarangkanambone apan ta'u niwisara udde sarun mariaddi, wuṛṛu napawe tempone nia'omante, i mangitou sarun maasingkatta pia sangkatou nabi suwallatti mangitou.”