Read Talaud YEHEZKIEL 35 Bible Online

YEHEZKIEL 35 - Talaud bible

YEHEZKIEL 35

¹MAWU nabbisara si ya'u,

²“Ei taumata apan mattate, wontohete wanua Edom.

³Wal᷊oa'e su tumanangne apa apan i Ya'u MAWU Apan Atanggaṛṛanne nabbisara si mangitou, ‘I Ya'u indi seennu, e tumana'u penenteannu Edom! Letangngu sarun Ta'u olanna mal᷊annabba tawe lal᷊oṛṛone, wuṛṛu manga soanu sarun mabbal᷊i winalal᷊anna. Ne i yamiu masingkatte manungku ete i Ya'u MAWU.

⁵Ro'en dorone i yamiu masseettu Israel wuṛṛu namala mangitou laṛṛatanna sutempo i mangitou niarantannu asasilaka maola'a ṛuumanna panginsueanne wuassu rosa mangitou.

⁶Ana waugu udde, waugu i Ya'u, Ruata apan biakka, MAWU Apan Atanggaṛṛanne, papate uddewe pal᷊addu pabbiaṛṛannu, wuṛṛu i yamiu tawe maal᷊assangnga wuassi tou. I yamiu nassal᷊ate ana waugu ma'ola'a pamamate, ne pamamate udde lai mangngenggenna si'o.

⁷Manga soanu su panenteannu Edom sarun Ta'u olaanna mal᷊annaba wuṛṛu suapan taumata apan umamatta isudde sarun Ta'u pateanna.

⁸Manga wowone sarun Ta'u omboannu manga winal᷊unannu, wuidda wuṛṛu wawal᷊anne sarun Ta'u peneannu sol᷊en pangalo.

⁹Wanuanu sarun ta'u olaanna wadda'a mal᷊alangnga saran mal᷊annu-l᷊annu, wuṛṛu manga soanu tate atanaannu taumata apia. Ne i yamiu masingkatte manungku ete i Ya'u MAWU.

¹⁰I yamiu mabbisara manungku mawae Yehuda ara'e Israel ringannu letangnge sambau-sambau uddewe pussa'anu, wuṛṛu manungku i yamiu sarun manahuanna salaiwe i Ya'u, MAWU, uddewe Ruata mangitou.

¹¹Ana waugu udde, waugu i Ya'u, Ruata apan biakka, MAWU Apan Atanggaṛṛanne, i Ya'u sarun mabbal᷊issa unen naungnga si yamiu, ana waugu i yamiu massa'u, mallobbossa wuṛṛu maddantinnu uma-U. I mangitou sarun maasingkatta manungku i yamiu sarun Ta'u iṛṛuumanna ana waugu inolaannu su saruanni mangitou.

¹²Ne i yamiu masingkatte manungku i Ya'u, MAWU, naaringikke aal᷊uandagu sutempo i yamiu mabbisara: Manga wowon Israel nabbal᷊ite mal᷊annabba wuṛṛu nitantilla maola'a pabbawiakki ite.

¹³Ei walahannu Edom, moṛṛongngi yamiu mal᷊oangnga wuṛṛu mabbisara ringannu mawunga si Ya'u. I Ya'u naaringikke sarangkanambone udde.

¹⁴I Ya'u MAWU Apan Atanggaṛṛanne nabbisara: Ahewallu runia sarun mal᷊uassa sutempo ahewallu wanuanu Ta'u olaanna wadda'a apan mal᷊annabba,

¹⁵ere lai i yamiu mal᷊uassa sutempo maasilo Israel passa'a-U, nabbal᷊i mal᷊annabba. Manga wowon Seir, ewe'e lai ahewallu leta'u Edom sarun mabbal᷊i mal᷊annabba. Ne anambon taumata sarun maasingkatta manungku ete i Ya'u MAWU.’ ”