Read Talaud YEHEZKIEL 37 Bible Online

YEHEZKIEL 37 - Talaud bible

YEHEZKIEL 37

¹I ya'u naapendamma taṛṛino MAWU, wuṛṛu Ghaṛṛaho-Ne nangapi'u sinumossokka su wawal᷊anne apan napene manga duṛṛi.

²I ya'u niehettu MAWU mammal᷊iwutta wawal᷊anne udde, wuṛṛu i ya'u naasilo manungku su ahewallu wawal᷊anne udde uatal᷊eṛṛonga manga duṛṛi apan tumaniten manambo wuṛṛu naaige atonna.

³MAWU naiwal᷊o si ya'u, “Ei taumata apan mattate, wotongngewe manga duṛṛi indi mabbiakka apia?” I ya'u sinumimbakka, “MAWU Apan Atanggaṛṛanne, tumba'u I'o apan masingkatta.”

⁴Wua'udde MAWU nandolo'u mamasingkattu tanata-Ne su manga duṛṛi apan naaige udde,

⁵“I Ya'u MAWU Apan Atanggaṛṛanne maniuppu singangu sulal᷊ummu waddangnge tadea'u i mangitou mabbiakka apia.

⁶Ta'u iaddo lantikka wuṛṛu ṛemessa si'o wuṛṛu i yamiu Ta'u wa'isannu pisi. I yamiu Ta'u onggol᷊annu singangu ma'oman sara mabbiakka. Ne i yamiu masingkatte manungku ete i Ya'u MAWU.”

⁷Wua'udde i ya'u Yehezkiel nabbisara su manga duṛṛi udde uasul᷊ungngu parenta MAWU. Wuṛṛu tantal᷊anna i ya'u mabbisara udde, i ya'u naaringikka tingikka uaṛṛateanna, ana waugu duṛṛi udde mannatakke massampa'a sambau ringannu waine.

⁸Tantalanna i ya'u mannutukka, manga duṛṛi udde mannattakke pia lantikke wuṛṛu ṛemessa, ana see pia pisine lai arawe manga waddangnge udde taambe sasangngone.

⁹Ruata nabbisara si ya'u, “Ei taumata apan mattate, pabbisarate su anginna. Wal᷊oa'e manungku i Ya'u, MAWU Apan Atanggaṛṛanne namarenta si tou tadea'u rumanta wuassu al᷊awo'u pappi'uanne, tadea'u maniuppu sasangngo sulal᷊ummu manga waddangnga apan nate udde tadea'u i mangitou mabbiakka apia.”

¹⁰Ne i ya'u nabbisara uasul᷊ungngu parenta MAWU ne anginna lai nattiuppen sasangngo sulal᷊ummu manga waddangnga udde ana see i mangitou nabbiakka wuṛṛu dirumarisikka. Reenganni mangitou tumaniten manambo, wotongnge ipallanginnu sambau ammul᷊annu tantara apan bahewalla.

¹¹Ruata nabbisara si ya'u, “Ei taumata apan mattate, manga duṛṛi indi atappasanne walahannu Israel. I mangitou sussal᷊iomanna manungku i mangitou naaiga, tawe antimma wuṛṛu tate allo addantane.

¹²Ana waugu udde pani'atte su uma-U Israel udde manungku i Ya'u, MAWU Apan Atanggaṛṛanne sarun mamu'a labbingi mangitou. I Ya'u sarun mapasabbangngi mangitou wua isudde wuṛṛu memelengngi mangitou su leta'u Israel.

¹³Napawe i Ya'u buatte na'ola'a sarangkanambone udde, uma-U sarun maasingkatta manungku ete i Ya'u MAWU.

¹⁴I Ya'u sarun maniuppu sasangngo sulal᷊ummu waddangngi mangitou tadea'u ipamiakka si mangitou, ana see i mangitou Ta'u iwala matanata'a su wanuane sassane. Ne i mangitou masingkatte manungku ete i Ya'u MAWU. I Ya'u MAWU buatte nabbisara wuṛṛu atonna sarun ma'ola'a.”

¹⁵MAWU nabbisara apia si ya'u,

¹⁶“Ei taumata apan mattate, anute sambau ta'inna wuṛṛu woṛṛeta'e manga wisara indi al᷊iurosone, ‘Araratuannu Yehuda’. Ana see panganu sambau ta'inna lai waine, wuṛṛu woṛṛeta'e al᷊iurosone: ‘Araratuannu Israel’.

¹⁷Wua'udde aggasse ta'inna darua udde aroddi olangnge ma'oman sara manga pentakke massampa'a wuṛṛu maola'a ta'inna sambau.

¹⁸Napawe walahannu maiwal᷊on atappasanne,

¹⁹wal᷊oa'a si mangitou, manungku i Ya'u, MAWU Apan Atanggaṛṛanne sarun manganu ta'inna apan naola'a sumandingngu Israel wuṛṛu isampa'a ringannu ta'inna apan mannumandingngu Yehuda. Ta'inna darua udde Ta'u olaanna sambau wuṛṛu Ta'u iṛṛamissa sulal᷊ummu lima-U.

²⁰Agasse ta'inna darua udde wuṛṛu pasiloa'a su walahanna udde.

²¹Ana see wal᷊oa'e si mangitou manungku i Ya'u, MAWU Apan Atanggaṛṛanne sarun mangul᷊e apia anambon walahang-Ku wuassu manga wanua suapa i mangitou buatte nanu. I mangitou sarun Ta'u iammulla wuṛṛu Ta'u iapidda apia watukku wanua mangitou sassane.

²²I mangitou sarun Ta'u olaanna sambau walahanna su leta'a udde, su panenteannu Israel. I mangitou sarun parentannu sangkatou ratu, wuṛṛu tate matahia maola'a darua walahanna ara'e araratuanna.

²³I mangitou tate mandal᷊eo watanganni mangitou ringannu ma'ola'a rosa wuṛṛu massubba manga paal᷊uanna apan maarantinna. I Ya'u sarun mamallossi mangitou wuassu al᷊awo'u tal᷊engko apan naaola'a si mangitou nangal᷊uandaga si Ya'u. I Ya'u sarun mapaasusi mangitou; i mangitou sarun maola'a uma-U, wuṛṛu i Ya'u Ruatan mangitou.

²⁴I mangitou sarun i'aukka su al᷊ungngu sangkatou ratu ere i Ratu Daud apan sarun mamarenta saran mal᷊annu-l᷊annu. Ringannu satia i mangitou sarun tumuṛṛutta manga tita-U. Wuṛṛu saran mal᷊annu-l᷊annu i mangitou see papapulunni mangitou sarun mamanua su leta'a udde, leta'a apan Ta'u nionggolla si Yakub wuṛṛu niwanuannu iupungngu al᷊amona mangitou.

²⁶I Ya'u sarun makkiinnu sambau pa'aire ringanni mangitou apan manohassa atatammudi mangitou saran mal᷊annu-l᷊annu. I Ya'u sarun mangal᷊amatta wuṛṛu manamba reenganni mangitou. Su leta'i mangitou sarun Ta'u iapararisikka Wal᷊e-U apan sidutu poiaroddi saran mal᷊annu-l᷊annu.

²⁷I Ya'u sarun manata'a suadio'a ringanni mangitou, i Ya'u sarun maola'a Ruata mangitou wuṛṛu i mangitou uma-U.

²⁸Napawe Wal᷊e-U uddete su pattangnganni mangitou saran mal᷊annu-l᷊annu, ne manga walahanna waine masingkatte manungku i Ya'u, MAWU apan buatte namile Israel maola'a uma-U sassane.”