Read Talaud YEHEZKIEL 39 Bible Online

YEHEZKIEL 39 - Talaud bible

YEHEZKIEL 39

¹MAWU Apan Atanggaṛṛanne nabbisara, “Ei taumata apan mattate, wansaha'e i Gog, ratu mawantuga wuassu manga wanua Mesekh wuṛṛu Tubal, wuṛṛu wal᷊oa'e si tou manungku i Ya'u indi seenne.

²I Ya'u sarun mamal᷊elongi tou, wuṛṛu mangapiddi tou sumabbanga wuassu leta'a marau su sawannakka, watukku manga wowonen Israel.

³Isudde sarun Ta'u puul᷊anna darangeanne ma'oman sara mapallossa wuassu limane aiṛṛi, wuṛṛu Ta'u iapaema'a manga anaanna wuassu limane aikkatanne.

⁴Su puiddu manga wowonen Israel, i Gog suadio'a ringannu anambon tantarane wuṛṛu walahanna hawene sarun mate, wuṛṛu manga winal᷊unanni mangitou sarun Ta'u ionggolla su al᷊awo'u manu'u winalanganna wuṛṛu winatangnga mal᷊aṛṛaga iapa'inassa si mangitou.

⁵Manga tantara udde sarun mawantingnga wuṛṛu nate su manga wawail᷊anna. I Ya'u, MAWU Apan Atanggaṛṛanne buatte nabbisara.

⁶I Ya'u sarun mandatan soṛṛobba su leta'u Magog wuṛṛu su manga apanne, suapa tumanangnge mabbiakka ringannu matammuda. Ne i mangitou sarangkanambone masingkatte manungku ete i Ya'u MAWU.

⁷Arawe supattangngannu taumatan Israel, sarun Ta'u iapasingkatta arang-Ku apan na'ukkassa, wuṛṛu arang-Ku udde tate lai lal᷊eoanna. Ne manga walahanna masingkatte manungku ete i Ya'u MAWU, Ruata apan na'ukkassa wuassu Israel.”

⁸MAWU Apan Atanggaṛṛanne nabbisara, “Atonna, allo apan Ta'u nisaggo udde sarun dumanta.

⁹Tumana'u manga soan Israel sarun sumabbanga abbi mangammullu manga ahidda apan natantangnga, eteudde allungnga wuṛṛu hal᷊ele, darangeanna wuṛṛu anaanna see ta'inna papuulla. Sarangkanambone udde niola'i mangitou alu papputunganna, wuṛṛu udde wotongnge ipaatta pitu tonna.

¹⁰Nariaddi i mangitou salaiwe lasa'e mangammulu alu papputunganna su wawail᷊anna ara'e manuwangnga alu su mahurangnge, ana waugu manga lutangnga apan nitantanga udde tumaniten manambo maola'a alu papputunganna. I mangitou sarun mangaṛṛo wuṛṛu maṛṛampassa darotongngu manga taumata apan buatte nangaṛṛo wuṛṛu naṛṛampassa darotongngi mangitou. I Ya'u, MAWU Apan Atanggaṛṛanne buatte nabbisara.”

¹¹MAWU nabbisara, “Napawe sarangkanambone udde nariaddite, i Ya'u sarun mangonggolla si Gog leta'a pallabinganna su Israel, su Wawal᷊annu Pamareanna apan addone su samba'an ra'i wuassu Tahal᷊oangnga Nate. Ete isudde i Gog wuṛṛu anambon tantarane ilabbinga, wuṛṛu wawal᷊anne udde sarun isaggo ‘Wawal᷊annu Tantaran Gog’.

¹²Pitu wul᷊anna al᷊annune manga taumatan Israel sarun mal᷊otakka mallabingu anambon winal᷊unanna tadea'u leta'a udde tate malal᷊eo.

¹³Anambon tumana'u wanua sarun massumbala manara pallal᷊abinga udde; wuṛṛu ringannu udde i mangitou sarun manengkamma lal᷊antakke su allo sutempo i Ya'u naauntunga. I Ya'u, MAWU Apan Atanggaṛṛanne buatte nabbisara.

¹⁴Napawe pitu wul᷊anna udde nal᷊iudde, manga pirang katou sarun mammal᷊intaddu wanua udde iaparea'a manga winal᷊unanna apan ta'e uaseṛṛopa su leta'a, wuṛṛu amungkangngu ta'e pia, ilabbinga tadea'u pamaresianna wanua udde wuassu al᷊al᷊eo.

¹⁵Sulal᷊ummu amatanna udde, suapan i mangitou maasangkalla duṛṛin taumata, sarun tialanni mangitou su sandiṛṛanne, tadea'u manga mallal᷊abinga maasilo udde wuṛṛu mallabingu duṛṛi udde su Wawal᷊annu Tantaran Gog.

¹⁶Ringannu olangnge udde leta'a udde niwaresi wuassu al᷊al᷊eo. (Su allo sal᷊immurine, su wawal᷊anne udde sarun pia soa aranne nassul᷊ungngu tantaran Gog.)”

¹⁷MAWU Apan Atanggaṛṛanne nabbisara si ya'u, “Ei taumata apan mattate, waggoite anambon manu'u winalanganna wuṛṛu winatangnga waine tadea'u rumanta wuassu al᷊awo'u tampa umanna sasamba apan Ta'u nissadia ionggolla si mangitou. I Ya'u sarun ma'ola'a andeangnga wahewalla su manga wowon Israel, poiaroddi i mangitou sarun uminassa ṛemessa wuṛṛu ma'inumma daṛṛa.

¹⁸I mangitou sarun uminassa manga winal᷊unannu atumannaṛṛane, wuṛṛu ma'inumma daṛṛa manga tembonannu runia. Manga tumannaṛṛane wuṛṛu tembonanne udde sarun pateanna ere manga ambinga esakka, ara'e manga bantenga matawa.

¹⁹Napawe i Ya'u buatte namate manga taumata udde maola'a sasamba, manga manu'u winalanganna wuṛṛu manga winatangnga waine sarun uminassa anambon tawane ma'oman sara mammuta, wuṛṛu ma'inumma daṛṛa ma'oman sara iwu'anne.

²⁰Su medda-U i mangitou wotongnge mallaidda tianna ringannu anambon awal᷊o wuṛṛu sumasa'ene wuṛṛu ringannu manga pejuanga. I Ya'u, MAWU Apan Atanggaṛṛanne buatte nabbisara.”

²¹MAWU nabbisara, “I Ya'u sarun mapaellegu awawantu-U su manga walahanna. I mangitou sarangkanambone sarun maasilo ereapa i Ya'u mappaattu taṛṛino-U mapaamattu manga manara-U apan matul᷊idda.

²²Manattakka orassa udde taumatan Israel sarun maasingkatta manungku ete i Ya'u MAWU Ruata mangitou.

²³Wuṛṛu anambon balahanna sarun maatutukka manungku taumatan Israel nirolokka su pamuanganna ana waugu rosa mangitou su saruang-Ku. I mangitou Ta'u nitantangnga wuṛṛu Ta'u niwala niawaddo manga seetta wuṛṛu nipate sulal᷊ummu pangalo.

²⁴Ta'u iṛṛuumanna i mangitou uasul᷊ungngu ararantinna wuṛṛu al᷊al᷊eo mangitou, ana see Ta'u nitantangnga i mangitou.”

²⁵MAWU Apan Atanggaṛṛanne nabbisara, “Arawe orassa indi i Ya'u sarun umakkannu umattu Israel papapulunni Yakub, wuṛṛu ma'ola'a si mangitou su lal᷊umanna'a apia. Ringannu aroddi i Ya'u uariaga tadea'u arang-Ku sidutu aadatanna.

²⁶Napawe i mangitou matana'e apia ringannu matammudda su wanua mangitou sassane, tate saran sangkatou apan mamansaggi mangitou, i mangitou sarun maabul᷊i ereapa i mangitou buatte nipansilianna ana waugu nallobbossa si Ya'u.

²⁷I Ya'u sarun mangapiddi mangitou mabbelengnga wuassu manga wanuan seetti mangitou, wuṛṛu asasusi-U sarun asiloannu anambon balahanna ana waugu inolaang-Ku udde.

²⁸Ne uma-U masingkatte manungku ete i Ya'u MAWU Ruata mangitou. Ana waugu ete i Ya'u apan nandolokki mangitou watukku pamamuanganna wuṛṛu i Ya'u lai apan nangapiddi mangitou napul᷊e watukku wanua mangitou sassane, ringannu tawe nanantangngu saran sangkatou wuassi mangitou poiaroddi.

²⁹I Ya'u mallal᷊innu Ghaṛṛaho-U su walahannu Israel, wuṛṛu tawe manantangngi mangitou apia. I Ya'u, MAWU Apan Atanggaṛṛanne buatte nabbisara.”