Read Talaud YEHEZKIEL 48 Bible Online

YEHEZKIEL 48 - Talaud bible

YEHEZKIEL 48

¹Passarannu leta'a su samba'an sawannakka makkatadda watukku ra'i manattakka wuassu Tahal᷊oangngu Tangngane mabatukku soan Hetlon, lal᷊anna suttanna watukku Hamat, soa Hazar-Enan, maddatingngu passaranna suwallattu soa Damsyik wuṛṛu soan Hamat. Manga ṛuanganna manansunna indi sambau-sambau ṛinone maasomba santampa leta'a apan mal᷊al᷊angnga wuassu passarannu ra'i mabbatukku waṛṛatta maddatingngu Tahal᷊oangngu Tangngane, sulal᷊ummu atokke manansunna indi wuassu sawannakka watukku timukka: Dan Asyer Naftali Manasye Efraim Ruben Yehuda

⁸Wageangnge manansunna wuassu leta'a udde ṛinone iṛṛae ipaatta su hausanna waine. Al᷊o'engnge ṛinone 12,5 kilometere wuassu passarannu sawannakka maddatingngu timukka. Manga passaranna su ra'i wuṛṛu waṛṛatta ṛinone al᷊o'engnge uasul᷊ungnga ringannu manga wageangnge apan nionggolla su manga ṛuangannu Israel. Wal᷊e MAWU sarun iapararisikka su wageangnge udde.

⁹Sambageanganna wuassu wageangngu leta'a udde niṛṛae wuattu MAWU, eteudde santampa leta'a su pattangnganne, al᷊o'engnge 12,5 kilometere wuṛṛu al᷊alakke 10 kilometere.

¹⁰Su wageangngu tangngane leta'a udde sarun iapararisikka Wal᷊e MAWU. Manga imam ṛinone maasomba wageangnga wuassu leta'a apan susi udde. Wageangngi mangitou eteudde 12,5 kilometere wuassu sandiṛṛannu ra'i watukku waṛṛatta, wuṛṛu lima kilometere wuassu sandiṛṛannu sawannakka watukku timukka.

¹¹Wageangngu leta'a apan niṛṛae udde sarun maola'a pussa'a manga imam papapulunni Zadok. I mangitou buatte nangimbe MAWU ringannu satia wuṛṛu tawe ere taumatan Lewi apan sanṛuanganni mangitou, apan na'ola'a rosa lai suadio'a ringannu manga taumatan Israel waine.

¹²Ana waugu udde su papapulunni Zadok ṛinone ionggolla leta'a al᷊aṛṛaene su sandiṛṛannu leta'a apan sarun ionggolla su taumatan Lewi. Wuṛṛu leta'a apan niṛṛae udde lembon na'ukkassa.

¹³Leta'u manga taumatan Lewi udde al᷊o'engnge 12,5 kilometere wuassu ra'i maddatingngu waṛṛatta, wuṛṛu al᷊alakke 5 kilometere wuassu sawannakka maddatingngu timukka wuṛṛu addone uaraddagu leta'u manga imam.

¹⁴Salaiwe sandango leta'a udde tawe iawal᷊u'i mangitou ara'e ipanal᷊iu; wageangnge apan apianne wuassu leta'u Israel tawe wotongnge ma'ingkatta su taumata waine, ana waugu leta'a udde buatte niṛṛae huna MAWU wuṛṛu maola'a pussa'a-Ne.

¹⁵Su samba'a timukka wuassu leta'a niṛṛae udde, ta'e pia lambene apan al᷊o'engnge 12,5 kilometere, wuṛṛu al᷊alakke darua setenga kilometere. Wageangnge udde tawe na'ukkassa wuṛṛu wotongnge ipaattu tumanangnge maola'a tampa atatanaanna wuṛṛu wadda'u nannal᷊o, su wageangngu tangngane ṛinone olaanna sambau soa.

¹⁶Soa udde ṛinone saṛṛene uataṛṛa wu'u appata, suapan sandiṛṛanne uuṛṛanne darua sepere appatta kilometere.

¹⁷Uapal᷊iwutta ahewallu soa udde ṛinone pia leta'a mal᷊alangnga apan al᷊alakke 125 metere.

¹⁸Su samba'an ra'i wuṛṛu waṛṛatta su soa udde pia leta'a mal᷊alangnga apan sambau-sambau uuṛṛanne l᷊ima ikalin darua setenga kilometere. Leta'a mal᷊alangnga darua udde ṛinone ipaatta pabbail᷊annu tumana'u soa.

¹⁹Manga taumata wuassu anambon ṛuangannu Israel wotongnge mabbailla su leta'a udde.

²⁰Nariaddi, ahewallu leta'a udde, nasutta leta'a apan niṛṛae wuṛṛu leta'a pa'olaanna soa, saṛṛene uataṛṛa wu'u appata uuṛṛanne 12,5 kilometere suapan sandiṛṛanne.

²¹Leta'a su samba'an waṛṛatta wuṛṛu ra'i wuassu leta'a apan niṛṛae apan nissaddia pa'olaanna Wal᷊e MAWU, manga imam, taumatan Lewi wuṛṛu soa udde, eteudde pussa'an tembonanne apan uaparenta. Su samba'an ra'in leta'a udde natambanna watukku passarannu ra'i, wuṛṛu samba'an waṛṛatta naddatingngu Tahal᷊oangngu Tangngane, wuṛṛu addone suwallattu leta'u Yehuda wuṛṛu leta'u Benyamin.

²³Leta'a su samba'a timukka wuassu leta'a niṛṛae udde, eteudde ionggolla su manga ṛuanganna waine. Ahewallu leta'a udde manattakka wuassu passarannu ra'i maddatingngu samba'a waṛṛatta masal᷊a watukku Tahal᷊oangnga Tangngane, wuṛṛu nitahia tumuṛṛuttu atokke indi wuassu sawannakka maddatingngu timukka: i Benyamin i Simeon i Isakhar i Zebulon i Gad

²⁸Su samba'a timukku leta'u Gad pia passaranna apan nanattakka wuassi taṛṛanganna Tamar sumabbi al᷊imatan kua'e Kades-Meriba, ana see watukku pal᷊onna al᷊o'engngu passarannu Mesir maddatingngu Tahal᷊oangngu Tangngane.

²⁹MAWU Apan Atanggaṛṛanne nabbisara, “Etearoddi leta'a udde ṛinone tahianna su manga ṛuangannu Israel.”

³⁰Ngara pasallanganna watukku soan Yerusalem sarangkanambone mapul᷊o dua. Appatta darandunge sambau-sambau uuṛṛanne darua sepere appatta kilometere, wuṛṛu pasallanganne tatallu. Suapan pasallanganna nisaggo tumuṛṛuttu arannu sambau ṛuangannu Israel. Manga pasallanganna su sawannakka nisago Ruben, Yehuda wuṛṛu Lewi; manga sasuttanna su darandungu ra'i nisago Yusuf, Benyamin, wuṛṛu Dan; apan poi su darandungu timukka pia manga aranna Simeon, Isakhar wuṛṛu Zebulon; wuṛṛu lai apan su darandungngu waṛṛatta nisago Gad, Asyer, wuṛṛu Naftali.

³⁵Ahewallu darandunga udde al᷊o'engnge si'o kilometere. Wuṛṛu manatakka orassa indi taumata nanagon soa udde: “PIA MAWU ISUDDE!”