Read Talaud YEHEZKIEL 8 Bible Online

YEHEZKIEL 8 - Talaud bible

YEHEZKIEL 8

¹Su allo al᷊imane wul᷊anna aiannume sulal᷊ummu tonna aiannume sutempo pamamuanganni yami, manga piaṛṛa'u taumatan Yehuda niwuangnga nirumanta su wal᷊e'u wuṛṛu niuma'ianna suadio'a ringangku. Inaṛṛombanganne taṛṛino MAWU Apan Atanggaṛṛanne sinumutta si ya'u.

²I ya'u naningngara wuṛṛu naasilo ere saṛṛen taumata. Wuassu lawanne inawa i tou ellehanna ere putungnga, wuṛṛu wuassu lawanne ire'e lullendappa ere witu'a apan wabbaresianna.

³I tou nangul᷊ukku sambau saranapa ere ta'iakka, see nangametta uta'u. Wua'udde sulal᷊ummu sondappa udde, i ya'u niwengkettu Ghaṛṛahon Duata watukku winalanganna wuṛṛu niapidda su Wal᷊en MAWU su Yerusalem, su ngara sasuttanna su rallakku lal᷊umme apan su samba'an sawannakka. Isudde pia paal᷊uanna sassubbanna apan buatte naaranta asasa'un Duata.

⁴Wua'udde i ya'u nabbiala semakka apan lullendapa apan mammasingkattu darantan Duatan Israel, ere lai buatte niasiloangku sutempo i ya'u su winggin Sal᷊ukku Kebar.

⁵Ruata nabbisara si ya'u, “Ei taumata apan mattate, pa'ellege watukku sawannakka.” I ya'u tinumuṛṛutta, wuṛṛu su samba'an mezbah maranin dal᷊anna suttanna, i ya'u naasilo paal᷊uanna apan nandantan asasa'un Duata udde.

⁶Ruata nabbisara si ya'u, “Ei taumata apan mattate, i'o maasilo apa apan tantal᷊anna nariaddi? Panutukke manga inolaanna apan maarantinna apan niola'u taumatan Israel, apan mapaarau-U wuassu Wal᷊e-U! Wette, sarun Ta'u ita'e si'o manga inolaanna apan lembon maarantinna lai.”

⁷Ana see i Ya'u niapiddu MAWU watukku ngara sumutta surallakka wuṛṛu nipasilo-Ne sambau loṛṛangnga su darandunga.

⁸Wisara-Ne si ya'u, “Ei taumata apan mattate, hewalle loṛṛangnga indi.” Napawe buatte ta'u niola'a, i ya'u naasilo sambau ngara.

⁹Wisara-Ne si ya'u, “Suttate wuṛṛu pa'ellege manga inolaanna apan lal᷊eo wuṛṛu maarantinna apan niola'i mangitou isudde.”

¹⁰I ya'u lai sinumuttate wuṛṛu na'ellega. Manga darandungngu wabbo'a udde nihambarannu al᷊awo'u hatin atoanna wuṛṛu manga winatangnga apan ipappalli waine, see lai al᷊awo'u hambarannu paal᷊uanna apan sassubbannu manga taumatan Israel.

¹¹Pitun pul᷊o su atoune piaṛṛa'u walahannu Israel isudde, nasutta lai i Yaazanya ana'i Safan. Sangkatou-sangkatou uaagassa sambau pananambunannu amania apan tuttimbulla.

¹²MAWU nabbisara si ya'u, “Ei taumata apan mattate, i'o naasilote apa apan niola'u piaṛṛa'u Israel ringannu mal᷊anna-l᷊annabba? I mangitou mattaṛṛamawu sulal᷊ummu wabbo'a apan napenen paal᷊uanna ringannu pangiananna manungku i Ya'u buatte nanantangngu wanua indi wuṛṛu tawe ma'ellega inolaanni mangitou.”

¹³See MAWU nabbisara si ya'u, “I'o sarun maasilo si mangitou ma'ola'a inolaanna apan lembon maarantinna lai.”

¹⁴Ne i ya'u niapiddu MAWU watukku ngaran sawannakku Wal᷊en MAWU wuṛṛu niapasilo-Ne si ya'u manga wawine apan lulluai papaten Dewa Tamus.

¹⁵MAWU naiwal᷊o si ya'u, “Ei taumata apan mattate, i'o naasilo olangnge udde? Ta'e manambo lai apan lembon maarantinna.”

¹⁶I ya'u niapid-De watukku rallakka sulal᷊ummu Wal᷊en MAWU. Marani ngara sasuttanna watukku wabbo'a susi, suwallattu mezbah wuṛṛu lal᷊anna, pia duan pul᷊o l᷊ima su atoune taumata. I mangitou uatal᷊iudda wabbo'a na'ukkassa, wuṛṛu ual᷊intudda watukku ra'i massubba matannallo sumabbangnga.

¹⁷MAWU nabbisara si ya'u, “Ei taumata apan mattate, i'o maasilo udde? Manga taumatan Yehuda indi tawe mawusa amungkangngu tumba'u ma'ola'a manga inolaanna apan maarantinna udde wuṛṛu ma'ola'a pallal᷊agu apan tawe umakkannu sansul᷊ungnga taumata su ahewallu wanua. I mangitou ewe'e lai ma'ola'a sarangkanambone udde isindi, sulal᷊ummu Wal᷊e-U wuṛṛu naaola'a i Ya'u lembon nasa'u lai. Pa'ellege ereapa i mangitou mallobbossa si Ya'u ringannu olangnge apan al᷊al᷊eone indi!

¹⁸I mangitou sarun mattemma asasa'u-U apan bahewalla! I Ya'u tawe mangonggollu ampunge si mangitou. Salaiwe i mangitou mangintul᷊in aal᷊iomanna si Ya'u ringannu ma'ikka-ikkatta, i Ya'u maddiri maddaringikka!”