Read Talaud YEHEZKIEL 9 Bible Online

YEHEZKIEL 9 - Talaud bible

YEHEZKIEL 9

¹Wua'udde i ya'u naaringikka Ruata niumui, “Rantate isindi ei manga taumata apan sarun mapaamattu ṛuumang-Ku su soa indi. Apira'e manga ahiddu!”

²Sangkaṛṛindo'a sinummabbanga siri annumma wuassu samba'an liuddu ngaran Sawannakku Wal᷊en MAWU, sangkatou-sangkatou uaapiddu lutangnga. Suadio'a ringanni mangitou pia taumata uapedettu linen apan uaapiddu wawoṛṛetta. I mangitou sinumutta wuṛṛu dirumarisikka maranin mezbah witu'a.

³See semakka lullansianga apan mamasingkattu darantan Duatan Israel, natuakka wuassu manga mala'ekatta, ana see na'ingkatta wuassu tampane paarorone udde watukku ngara suttanna su Wal᷊en MAWU. Ne MAWU namago taumata apan uapeddettu linen udde, wisara-Ne,

⁴“Roote watukku al᷊awo'u pappi'uannu soa wuṛṛu tialaite pakkannu manga taumata apan uapendamma asiangnga wuṛṛu massusa ana waugu anambon inolaanna maarantinna apan niola'a su soa udde.”

⁵I ya'u naaringikka Ruata nabbisara su manga taumata waine, “Tantalonge i tou su al᷊awo'u pappi'uannu soa wuṛṛu patete suapan taumata ringannu tawe ampungne.

⁶Patete anambon taumata esakka wuṛṛu wawine, timmade wuṛṛu dario'a, hagurangnge wuṛṛu al᷊aṛṛanangnge. Arawe arie waṛṛani mangeṛṛetta sangkatou apan pia tatiala su pakkanne. Panattakke wua isindi, wuassu Wal᷊e-U indi.” Ne i mangitou nanatakke manara mangitou ringannu mammate manga piaṛṛa'u Israel apan tantal᷊anna uarisikka su Wal᷊en MAWU.

⁷Ruata nabbisara si mangitou, “Luhurete Wal᷊e-U indi! Penete manga rallake ringannu manga winal᷊unanna. Panattakke!” Ne i mangitou mannattakke mammate manga taumata sulal᷊ummu soa.

⁸Su al᷊annun pamamate udde, i ya'u isudde lai sassane. I ya'u niumal᷊intudda wuṛṛu sinumal᷊ande, “MAWU Apan Atanggaṛṛanne, aroddi nasa'u I'o su Yerusalem na'oman sara I'o mamatete anambon taumata apan ta'e uatana'a su Israel indi?”

⁹Ruata sinumimbakka, “Manga taumatan Israel wuṛṛu Yehuda buatte na'ola'a rosa apan bahewalla. I mangitou na'ola'a pamamate su al᷊awo'u tampa, wuṛṛu Yerusalem nikotorannu al᷊al᷊eo. I mangitou mabbisara manungku i Ya'u, MAWU, buatte nanantangngu wanua indi na'oman sara tate maasilo inolaanni mangitou.

¹⁰I ya'u tate umakkanni mangitou. Sarun Ta'u olaanna si mangitou apa apan niola'i mangitou su taumata waine.”

¹¹Wua'udde taumata apan uapeddettu linen udde nabelengke wuṛṛu nabbal᷊o su MAWU, wisarane, “Anambon parenta MAWU buatte niamatta.”