Read Talaud DANIEL 10 Bible Online

DANIEL 10 - Talaud bible

DANIEL 10

¹Su tonna atallune pammarentan Ratu Koresh su Persia, sambau tanata niapasingkatta si Daniel ara'e Beltsazar. Tanata udde atonna, arawe tumaniten masahadda passuṛṛanne. Sutempo mattinsahadda madde'a massunna Daniel nanengkamma tal᷊aane su ola'u atappasannu tanata udde sulal᷊ummu sambau sondappa.

²Sutempo udde i ya'u tantal᷊anna mabartapa tallun kamisa naṛṛattubba.

³Al᷊annune sutempo udde i ya'u tawe umanna anna apan matemangnga ara'e lai ṛemessa; i ya'u tawe ma'inumma anggore, wuṛṛu tawe lai maaṛṛo uta'a.

⁴Su allo dauan pul᷊o appatta wul᷊anna paarerone su tonna udde, i ya'u tantal᷊anna uarisikka su winggin Sal᷊ukku Tigris apan wahewalla udde.

⁵I ya'u naningngara, ana see i ya'u naasilo sangkatou apan ual᷊uṛṛen peddeta wuassu linen wuṛṛu wawa'issu lawassa wuassu wul᷊awanna tutune.

⁶Waddangnge lukkena ere permata, hatine ere semakku sawallo, wuṛṛu matane lukkenggamma naal᷊ihidda putungnga.

⁷Tumba'u i ya'u sassane apan naasilo sondappa udde. Manga taumata apan suadio'a ringangku tawe naasilo, arawe i mangitou matta'utta na'oman sara nampattal᷊angnga wuṛṛu na'imbuni.

⁸I ya'u nitantanga isudde sassane, lapidu mannutukka aellega apan maatiangnga udde. I ya'u nallomete wuṛṛu hati'u namikkassa.

⁹Sutempo i ya'u naaringikka tingikke, nawantingke i ya'u na'oman sara nirumaram manga su leta'a.

¹⁰Wua'udde pia ta'iakka nangeṛṛetta si ya'u wuṛṛu i ya'u napabbangunna iapiddu sasengannu ta'iakka wuṛṛu wantiṛṛangku.

¹¹Mala'ekatta udde nabbisara si ya'u, “Daniel, i'o arangnguannu Ruata. Pabbuatte wuṛṛu darisikke wua'udde paddaringikke manga wisara'u indi mapia-mapia. I ya'u indi buatte nirolokka ringannu.” Sutempo i tou mabbisaran olangnge udde, i ya'u dirumarisikke ringannu mangngiladda.

¹²Wua'udde wisarane si ya'u, “Daniel, arie paata'utta. Ruata buatte naddaringikka aal᷊iomannu ro'en allo paarorone i'o nakkawessa tadea'u mapaawawon batangannu tadea'u maola'a pande. I ya'u nirumantate maola'a sasimbakku aal᷊iomannu.

¹³Mala'ekatta mallal᷊u'adda araratuannu Persia nando'appa si ya'u al᷊annune daruan pul᷊o assa su allone. Wua'udde Mikhael, sangkatou suwallattu manga piaṛṛa'u mala'ekatta, nirumanta nangontolla si ya'u. I tou ta'u nitantangnga poiaroddi, su Persia.

¹⁴I ya'u nirumanta tadea'u ma'ola'a si'o maasunna apa apan sal᷊immurine mariaddi su walahannu. Sondappa indi su ola'u allo addantane.”

¹⁵Sutempo i tou nabbisaran olangnge udde, i ya'u niumaruutta wuṛṛu tawe naawisara.

¹⁶Wua'udde mala'ekatta apan ere lihiddu taumata udde nangul᷊ukku limane wuṛṛu nangeṛeṛetta wiwi'u. I ya'u nabbisara si tou, “Tuangku, sondappa indi naaola'a si ya'u aroddi asahadde na'oman sara i ya'u tate maal᷊ore saran kadio'a.

¹⁷I ya'u naal᷊ihidda sangkatou allangnga apan uarisikka su saruannu tuangnge. Ereapa wotongnge i ya'u maggahatton Tuangnga? Ikka'u nasuete wuṛṛu sasangngo'u marenga.”

¹⁸Ne paassa lai i tou nangeṛetta si ya'u, ana see i ya'u naapendamma ikka'u niatambanna.

¹⁹I tou nabbisara, “Ruata mandangngu si'o, ana waugu udde ariete suminggawangnga ara'e mata'utta, wette, ariaddite matohassa!” Tantal᷊anna i tou mabbisaran olangnge udde, i ya'u naapendamma lembon matohassa lai wuṛṛu nabbisara, “Otte pabbisarate, Tuangnga. Tuangnga buatte nanamba atatoha'u.”

²⁰Wua'udde i tou sinumimbakka, “Masingkattawe i'o anio i ya'u nirumata ringannu? Pandumanne eteudde tadea'u mamasingkatta si'o apa apan uaweṛṛetta sulal᷊ummu Buken Atatul᷊idda. Orassa indi i ya'u ṛinone mabbelengnga inai mapapangalo mala'ekatta mallal᷊u'adda Persia. Wua'udde mala'ekatta mallal᷊u'adda Persia. Wua'udde mala'ekatta mallal᷊u'adda Yunani sarun dumanta. Taweddu mangontolla si ya'u tumba'u Mikhael, mala'ekatta mallal᷊u'adda Israel, araratuannu.