Read Talaud DANIEL 12 Bible Online

DANIEL 12 - Talaud bible

DANIEL 12

¹Mala'ekatta apan ual᷊uṛṛen laubba linen udde nabbisara apia, “Sutempo udde sarun lumapputta mala'ekatta wahewalla Mikhael mallalu'adda walahannu. Wua'udde sarun pia tempon asasusa apan taweddu panumandinganne ro'en pia manga walahanna. Arawe anambon taumata wuassu walahannu apan aranne uawoṛṛetta sulal᷊ummu buken Duata, sarun iapasal᷊amatta.

²Manambo suwallatti mangitou apan natete sarun tate mabbiakka apia; sambageanganna lai sarun aṛṛiaannu asasusa wuṛṛu atata'utta saran mal᷊annu-l᷊annu lai.

³Manga piaṛṛa'a apan pande sarun lumansiangnga ere semakku langitta. Wuṛṛu i mangitou apan buatte nanantiro manambo taumata tadea'u ma'ola'a apapia wuṛṛu atatul᷊idda, sarun lumansiangnga ere manga anumpitanna saran mal᷊annu-l᷊annu.”

⁴Ana see mala'ekatta udde nabbisara apia si ya'u, “Daniel, tutuwa'e buke udde orassa indi, wuṛṛu reeten segele tadea'u sidutu uatutuba maddatingngu panguddusannu tempo. Manambo taumata sarun maannamma manaṛṛasidda apa apan tantal᷊anna nariaddi. Arawe sahaddi mangitou udde mangke tawe gunane.”

⁵Wua'udde i ya'u naasilo ruang katou esakka. Iapa sangkatou uarisikka su winggin sal᷊ukka samba'a indi, wuṛṛu sangkatou lai su winggin sal᷊ukka samba'a poi.

⁶Iapa sangkatou naiwal᷊o siapa apan uarisikka maddananiannu wunnu sal᷊ukka, “Tingngerate manga arariadianna apan maatingnga indi masue?”

⁷Taumata waine udde namatte na ta'iakke ruan ba'a watukku langitta. I ya'u naaringikka i tou nassalu ringannu arannu Ruata apan awasa wuṛṛu nabbisara, “Manga arariadianna udde umamatta al᷊annune tatallu setenga su tonnane. Napawe pandal᷊al᷊eo su saruannu umattu Ruata nasuete, ne masuete lai manga arariadianna apan maatiangnga udde.”

⁸Sarangkanambone apan niwisarane udde atonna ta'u niaringiṛṛanna, arawe i ya'u tawe maasuna. Wua'udde i ya'u naiwal᷊o, “Tuangnga, ereapa sarangkanambone indi sarun masue?”

⁹I tou sinumimbakka, “Roote orassa indi, Daniel, ana waugu manga wisara indi ṛinone iwuni wuṛṛu iaddapingnga maddatingngu panguddusannu tempo.

¹⁰Manambo taumata sarun iannamma wuṛṛu waresianna. I mangitou apan dal᷊eo sarun tawe maassunna wuṛṛu sidutu ma'ola'a al᷊al᷊eo; tumba'u i mangitou apan pande sarun maasunna.

¹¹Wuassu tempo sasamba mamiallo udde niapaaddo wuṛṛu sambau apan maata'utta apan isassaggo Alaleo apan makkimunsa'a udde iapararisikka, sarun mal᷊iu 1.290 su allone.

¹²Lal᷊umanna'a si mangitou apan sidutu satia maddatingngu allo 1.335.

¹³I'o Daniel, paatuṛṛutte maddatingngu panguddusanne. I'o sarun mate, arawe sarun mabbangunna tadea'u manengkamma lal᷊antakku su panguddusannu tempo.”