Read Talaud DANIEL 2 Bible Online

DANIEL 2 - Talaud bible

DANIEL 2

¹Su sambau ṛabbi darua su tonnane napawe Ratu Nebukadnezar mammarenta, i tou nabbal᷊iawa. Wal᷊iawane udde aroddi naasusa naungnge, na'oman sara i tou tate lai maatiilla.

²Ana waugu udde aroddi i tou namaggo taṛṛa si'atta, taṛṛa ropa, taṛṛa pasangkadda wuṛṛu manga taumata pia asingkanne, tadea'u iapatal᷊a'an wal᷊iawane udde.

³Sutempo i mangitou uarisikka su saruanne, ratu nabbisara, “I ya'u nabbal᷊iawa, wuṛṛu naungku u'ambul᷊isadda ana waugu i ya'u maapulu maasingkatta atappasanne!”

⁴I mangitou sinumimbakka sulal᷊ummu sasinaukku Aram, “Mabbiakke Tuangku saran mal᷊annu-l᷊annu! Wattia'e wal᷊iawa udde si yami, ne i yami sarun manal᷊a'an atappasanne.”

⁵Ratu sinumimbakka, “I ya'u buatte nanganu innappuanne indi: I yamiu ṛinone mamasingkattu wal᷊iawa udde si ya'u, aroddi lai atappasanne. Amungkangngu tawe, i yamiu sarun tattaranna wuṛṛu wal᷊enu sarun iapaṛṛa'a.

⁶Arawe amungkangngu i yamiu wotongnge, i yamiu sarun ta'u onggol᷊annu aonggolla apan mangkapia see lai aadata apan wahewalla. Ne, orassa indi pasingkata'e wal᷊iawa'u udde ringannu atappasanne!”

⁷I mangitou sinumimbikka apia, “Ṛinone Tuangku mamasingkatta paarorone wal᷊iawa udde si yami, wua'udde i yami mamasingkattu atapasanne.”

⁸Naaringikka udde ratu sinumbakka, “Naṛṛino ere su ṛingirangku. I yamiu tumba'u mannamba orassa, ana waugu i yamiu masingkatta manungku i ya'u pia pandumma

⁹makkuumanni yamiu sarangkanambone ringannu olangnge apan uasul᷊ungnga amungkangngu i yamiu tawe maapasingkattu wal᷊iawa udde si ya'u. I yamiu na'ire tadea'u sidutu mammahia wuṛṛu mannalangnga si ya'u ringannu antimma manungku i ya'u sarun maml᷊u innappuangku. Ne, pasingkata'e wal᷊iawa udde, ne i ya'u sarun maasingkatta manungku i yamiu wotongnge manal᷊a'an atappasanne.”

¹⁰Manga mapapande udde sinumimbakka, “ Su ahewallu runia tawe saran sangkatou apan wotongnge mamasingkattu apa apan ipaapulun tuangnga udde. Wuṛṛu taambe saran paassa sangkatou ratu, salaiwe ereapa ahewalle wuṛṛu awantuge, maddorongnga olangnge ere udde wuassu manga taṛṛa si'atta, taṛṛa ṛopa, wuṛṛu manga taumata apan pia asingkanne su wal᷊en araratuanne.

¹¹Tuangku maapulun sambau apan tumaniten masahadda. Tawe saran sangkatou apan wotongnge maautungnga tabbene'e manga monganna, arawe i mangitou tawe uatana'a suwallattu taumata.”

¹²Naaringikka udde ratu nabal᷊i nasa'u atonna wuṛṛu nangonggollu parenta tadea'u iapapate anambon mapapande apan uatana'a su Babel.

¹³Ana see parenta udde nial᷊iata, wuṛṛu anambon mapapande, nasutta lai Daniel wuṛṛu manga hawene nireaanna ana pateanna.

¹⁴Ne Daniel naisasomban Ariokh, piaṛṛa'u mandariaga ratu, apan nariahite mapaamattu ṛuumannu pamamate udde. Ringannu maadunna

¹⁵Daniel naiwal᷊o si tou, anio ratu buatte napasabbangngu parenta apan maṛṛagissa udde. Ariokh namasingkatta si Daniel apa apan buatte nariaddi.

¹⁶Ringannu nasasaṛṛawatta Daniel sinumaruanna ratu wuṛṛu sinumal᷊ande tadea'u onggol᷊annu tempo manal᷊a'an atappasannu wal᷊iawa udde.

¹⁷Darorongnge niraringiṛṛanna, wua'udde i Daniel napul᷊ete watukku wal᷊en wuṛṛu namasingkattu anambon arariadianna udde si Hananya, Misael wuṛṛu Azarya.

¹⁸I tou nandolokki mangitou umal᷊iomanna su Ruata su surga tadea'u i Tou umakkanni mangitou wuṛṛu mamasingkattu addapingngu wal᷊iawa udde. Ringannu aroddi i mangitou tawe iṛṛumanna pateanna suadio'a ringannu mapapande waine.

¹⁹Su rabbi udde lai Ruata namasingkattu addapingnga udde si Daniel sulal᷊ummu sambau sondappa. Ne Daniel naddalotte Ruata su surga,

²⁰wisarane, “Ruata udde pande wuṛṛu matohassa, dalo si Tou saran mal᷊annu-l᷊annu!

²¹Ete i Tou apan mannantunnu watianna wuṛṛu tempo, i Tou mannal᷊inggi wuṛṛu mannenegu tembonanne. Ete i Tou lai apan mangngonggollu asingkatta, see mangngonggollu pasasunna.

²²Ete i Tou apan manni'attu addapingnga apan tumaniten mal᷊al᷊unna I Tou masingkattu al᷊awo'a apan mariaddi sulal᷊ummu ararandumma.

²³Oh, Ruata raddaloannu al᷊amona'u, I'o ta'u raloanna wuṛṛu ta'u wantuhanna. Ana waugu I'o nangonggolla si ya'u asingkatta wuṛṛu atatohassa. Darorongngi yami buatte niraringiṛṛan-Nu, wuṛṛu sasimbakka su ratu buatte niwal᷊o-Nu.”

²⁴Napawe wua'udde Daniel inaite ringanni Ariokh apan buatte niparentanna iapapate mapapande su Babel. Daniel nabbisara si tou, “Ariete pappate manga mapande udde. Apira'e i ya'u sumaruanna ratu, ana waugu i ya'u mappulu mamasingkatta si tuangnga atappasannu wal᷊iawane udde.”

²⁵Ringannu nasasaṛṛawutta Ariokh nangapiddi Daniel sinumaruanna si Ratu Nebukadnezar ana see nabbisara, “Allangngu buatte naasomba suwallatu manga taumatan Yahudi apan niuwangnga sangkatou apan wotongnge mamasingkattu atappasannu wal᷊iawan Tuangku.”

²⁶Ne nabbisarate ratu si Daniel apan isassaggo lai atappasanne, “Wotongngewe i'o mamasingkatta si ya'u wal᷊iawa'u wuṛṛu lai Beltsazar?”

²⁷Daniel sinumimbakka, “ Tuangku, tawe taumata pia asingkanne, taṛṛa roa, manani'atta ara'e masasingkattu anampitanna apan wotongnge mamasingkattu olangnge udde si Tuangku.

²⁸Arawe su surga pia Duata apan manni'attu al᷊awo'u addapingnga, wuṛṛu i Tou buatte namasingkatta si Tuangku apa apan sarun mariaddi su allo addantane. Orassa indi, wotongngewe allangngu manal᷊a'an bal᷊iawa wuṛṛu sondappa apan niasiloanni Tuangku sutempo matiilla.

²⁹Sutempo Tuangku tantal᷊anna mattiilla, Tuangku nabbal᷊iawa su ola'u apan addantane. Ruata apan nani'attu al᷊awo'u addappingnga niapasilo si Tuangku apa apan sarun mariaddi.

³⁰Addapingnga indi buatte niapal᷊iatta'a su allangnga wal᷊ine ana waugu allangnga mappandeanne wuassi sai-sai, ewe'e tadea'u Tuangku wotongnge maasingkatta atappasannu wal᷊iawan Tuangku udde wuṛṛu maasunna lai ola'u lal᷊oṛṛon naungngi Tuangku.

³¹Eteindi sondapa apan niasiloanni Tuangku: Su saruanni Tuangku pia sambau paal᷊uanna! Udde tumaniten bahewalla, wuṛṛu lullendappa arawe hatine maata'utta.

³²Puane niola'a wuassu wul᷊awanna tutune, sabba'a wuṛṛu ta'iakke wuassu sal᷊a'a, lawassa wuṛṛu tapanangnge wuassu witu'a,

³³palangnge wuassu atta'a wuṛṛu laddane sambageanganna wuassu atta'a wuṛṛu sambageangenna lai wuassu leta'a maṛṛamutta.

³⁴Sutempo Tuangku tantal᷊anna mannutukka, sambau watu wahewalla napallossa wuassu rampissa, ringannu tawe nieṛṛetannu taumata, ana see nangema'a paal᷊uanna udde su leddane apan niola'a wuassu aatta'a wuṛṛu leta'a maṛṛamutta udde, na'oman sara napussa'a.

³⁵Sutempo udde lai ahewallu paal᷊uanna udde naṛṛa'a wuṛṛu naola'a ombon atta'a, leta'a maṛṛamutta, witu'a, sal᷊a'a, wuṛṛu wul᷊awanna apan naṛṛimunsa'e ere awu su tampa paṛṛindanna gandumma sutempon paddissa. Ombone udde nassal᷊iawukke nitiuppu anginna, na'oman sara tawe nanantangngu lannangnge saran addio'a. Arawe watu apan napaṛṛa'an paal᷊uanna udde nabbal᷊i lembon wahewalla ere wowone wuṛṛu namene ahewallu runia.

³⁶Eteudde wal᷊iawan Tuangku, wuṛṛu orassa indi allangnga manal᷊aaten atappasanne.

³⁷Apan mawantuga Tuangku uddewe ratu wuassu al᷊awo'u ratu; Ete Tuangku apan lembon uataṛṛino. Ruata su surga buatte nangonggollu si Tuangku araratuanna indi, taṛṛino, atatohassa wuṛṛu awawantuga.

³⁸Tuangku noilang-Nge uataṛṛino su wageangngu runia apan pia tumanangnge wuṛṛu su al᷊awo'u manu'u winalanganna wuṛṛu winatangnga waine. Tuangku sassane uddewe pua wul᷊awanna wuassu paal᷊uanna udde.

³⁹Arawe napawe araratuanni Tuangku nuddusse, sarun lumaputta araratuanna waine apan ahewalle tawe ere araratunni Tuangku. Wua'udde nilumapputte araratuanna atallune apan nisumandingngu wageangnge wuassu witu'a su paal᷊uanna udde, apan mamarenta ahewallu runia.

⁴⁰Manansunna sarun lumapputta araratuanna aiappanne, apan atohanne ere atta'a. Wuṛṛu naal᷊ihidda atta'a apan makkimunsa'a wuṛṛu mammussa'a al᷊awo'a, aroddi lai araratuanna aippanne indi sarun makkimunsa'a wuṛṛu mamussa'a manga araratuanna waine udde.

⁴¹Ledda wuṛṛu manga tal᷊imaddon paal᷊uanna apan sambageanganna niola'a wuassu leta'a maṛṛamutta wuṛṛu sambageanganna atta'a udde, mapal᷊iatta'a manungku su allo addantane araratuanna udde sarun matahia. Araratuanna udde pia atatohanne see lai ana waugu leta'a maṛṛamutta udde pia lal᷊o'ane atta'a.

⁴²Manga tal᷊imaddon ledda apan sambageanganna wuassu atta'a wuṛṛu sambageanganna lai wuassu leta'a maṛṛamutta atapasanne manungku pia bageangngu araratuanna apan matohassa wuṛṛu piaddu lai lome.

⁴³Atta'a wuṛṛu leta'a maṛṛamutta apan niluakka udde mattiala lai manungku araratuanna udde sarun maddea'a manohassa watanganne ringannu maawingngu taumatan araratuanna waine, arawe sahadda udde tawe gunane, ere atta'a lai tawe mallal᷊o'an leta'a maṛṛamutta.

⁴⁴Sutempo pamamarentan manga ratu udde, Ruata su surga sarun mapararisikku sambau araratuanna apan mattaṛṛangnga saran mal᷊annu-l᷊annu wuṛṛu sarun tawe iawaddon al᷊awo'u walahanna su al᷊awo'u tampa. Araratuanna udde sarun makkimunsa'a al᷊awo'u walahanna su al᷊awo'u araratuanna waine udde.

⁴⁵Wal᷊inewe Tuangku buatte naasilo manungku ringannu tawe nieṛṛetannu taumata, sambau watu napallossa wuassu rampissa ana see naṛṛia'a wuṛṛu nakkimunsa'a paal᷊uanna wuassu atta'a, witu'a, leta'a maṛṛamutta, sal᷊a'a wuṛṛu wul᷊awanna udde? Ruata apan wahewalla napal᷊iatta'a si Tuangku apa apan sarun mariaddi su allo addantane. Wal᷊iawa udde wotongnge pangimananna wuṛṛu tatal᷊a'an allangnga naṛṛino.”

⁴⁶Ana see niumalintuddate Ratu Nebukadnezar su saruanni Daniel wuṛṛu namarenta tadea'u Daniel addatanna wuṛṛu si tou ionggolla sasamba itattambunna see lai manga sasamba waine.

⁴⁷Ratu nabbisara, “Attonna, Daniel, Ruatanu udde ahewal᷊anne suwallattu al᷊awo'u Ruata. I tou uddewe utaṛṛino al᷊awo'u ratu, wuṛṛu manani'attu al᷊awo'u addapingnga. I ya'u masingkattu olangnge udde ana waugu i'o buatte nanala'an atappasannu addapingnga indi.”

⁴⁸Wua'udde Daniel nionggol᷊annu aiananne apan matanggaka, wuṛṛu nilantaṛṛanne ringannu manambo aonggola apan mangkapia, wuṛṛu nitenega naola'a gubernure su Babel, see niolangnge piaṛṛa'a atanggaṛṛanne su anambon mananantiro su wal᷊en araratuanna.

⁴⁹Arawe wuassu darorongngi Daniel, ratu nanantillu pamamarenta su propinsi Babel udde si Sadrakh, Mesakh wuṛṛu Abednego, tantal᷊anna Daniel sassane uatana'a su wal᷊en araratuannu ratu.