Read Talaud DANIEL 3 Bible Online

DANIEL 3 - Talaud bible

DANIEL 3

¹Su sambau tempo Ratu Nebukadnezar nallanginnu sambau paal᷊uanna wul᷊awanna apan atanggakke 27 metere wuṛṛu al᷊alakke maranin 3 metere. I tou napararisikku paal᷊uanna udde su wawal᷊annu Dura su propinsi Babel.

²Wua'udde ratu nannote anambon ratun bageangnga, manga gubernure, bupati mananantiron araratuanna, bendahara, mallaṛṛuungnga, mapapanden mallaṛṛuungnga, wuṛṛu anambon tembonannu wageangngu leta'a tadea'u rumanta mallaghun paddarohan paal᷊uanna apan buatte niapararisikke udde,

³niumal᷊iatate mandariaga ratu ringannu tingikka apan ma'ikkatta, “Manga tuṛṛangnga wuassu al᷊awo'u walahanna, ṛuangannu walahanna wuṛṛu wahasa! Paddaringikke parentan datu indi:

⁵Napawe trompetta manungtingikka, tatantalongannu tingikku, wansi, kecapi, rebab, gambus, serdam, wuṛṛu manga tingikku musikka waine, manga tuṛṛangnga ṛinone umal᷊intudda massubba paal᷊uanna wul᷊awanna apan buatte niaparisikki Ratu Nebukadnezar.

⁶Isai-sai apan tawe tinumuṛṛutta parenta indi, lapiddu ituntungnga su pandu'u patungnga apan tantal᷊anna lukkenggamma.”

⁷Ne napawe naaringikka manga alattu musikka udde niapatuntingikka, manga taumata wuassu al᷊awo'u walahanna, ṛuangannu walahanna wuṛṛu wahasa, niumal᷊intudda wuṛṛu nassubba paal᷊uanna wul᷊awanna udde.

⁸Manga pira taumatan Babel nappaattu tempone udde ipanilaka taumatan Yahudi.

⁹I mangitou nabbisara si Ratu Nebukadnezar, “Mabbiakke Tuangku saran mal᷊annu-l᷊annu!

¹⁰Tuangku sassane buatte napasabbangngu parenta manungku paal᷊ihakka napawe manga musikka iapatuntingikka, anambon taumata ṛinone umal᷊intudda wuṛṛu massubba paal᷊uanna wul᷊awanna udde,

¹¹wuṛṛu isai-sai apan tawe tinumuṛṛutta parenta udde sarun ituntungnga su pandu'u putungnga apan tantal᷊anna lukkenggamma.

¹²Arawe manga pira taumatan Yahudi apan buatte nitantil᷊anni Tuangku parenta su propinsi Babel tawe naddaringikka parentan Tuangku udde. I mangitou eteudde Sadrakh, Mesakh wuṛṛu Abednego. Manga taumata udde maddiri massuba manga monganni Tuangku wuṛṛu maddiri lai massubba paal᷊uanna wul᷊awanna apan niapararisikki Tuangku.”

¹³Naaringikka udde ratu nasa'ua tonna, see namarenta tadea'u siri tallu udde iapidda iapasaruanna si tou.

¹⁴Ratu naiwal᷊o si mangitou, “Sadrakh, Mesakh wuṛṛu Abednego! Atonna i yamiu maddiri mssubba manga mongangku wuṛṛu maddiri lai umal᷊intudda su paa'luanna wul᷊awanna apan buatte ta'u niapararisikka udde?

¹⁵Ne, orassa indi, i yamiu mappulu umal᷊intudda wuṛṛu massubba paal᷊uanna udde sutempo musikka manuntingikka? Amungkangngu i yamiu maddiri, i yamiu sarun ituntungnga sulal᷊ummu pandu'u putungnga pan tantal᷊anna lukkenggamma. Wuṛṛu monganna suapa apan wotongnge manal᷊atta si yamiu wuassu taṛṛino'u?”

¹⁶Sadrakh, Mesakh wuṛṛu Abednego sinumimbakka, “Tuangnga apan mawantuga, i yami tawe maannamma manahekku watanganni yami.

¹⁷Amungkangngu Ruata apan sassubbanni yami wotongnge manal᷊amatta si yami wuassu pandu'a apan tantal᷊anna lukkenggamma udde wuṛṛu wuassu taṛṛinon Tuangku — ne i Tou sarun ma'ola'a udde.

¹⁸Arawe unnu wisara i Tou tawe ma'ola lai, rinone Tuangku maasingkatta manungku i yami maddiri lai maddalo monganni Tuangku wuṛṛu maddiri lai massubba paal᷊uanna wul᷊awanna apan niapararisikki Tuangku udde.”

¹⁹Ne sinumabbangke asasa'un Ratu Nebukadnezar su saruanni Sadrakh, Mesakh wuṛṛu Abednego, na'oman sara hatine maṛṛamutta. I tou namarenta tadea'u pandu'a olaanna paapitu al᷊osone wuassu wiasane.

²⁰Wua'udde i tou nandolokku manga pira taumata apan atohasanne wuassu tantarane iapaṛṛapussa si Sadrakh, Mesakh wuṛṛu Abednego, see iapatuntungngi mangitou sulal᷊ummu pandu'a apan lukkenggamma udde.

²¹Tawe nal᷊annu siri tallu niṛṛapusse ringannu uapedetta nasuungnga, eteudde ringannu kameja, juba, araposa wuṛṛu laubba waine, ana see nituntungnga sulal᷊ummu pandu'a apan lukkenggamma udde.

²²Ana waugu parentan datu aroddi aṛṛagginne, ne pandu'a udde buatte niapal᷊oso ringannu mal᷊oso-l᷊oso na'aman sara ṛenggammu putungnga maapate lai taumata apan mannal᷊uru si Sadrakh, Mesakh wuṛṛu Abednego watukku pandu'a.

²³Etearoddi, siri tallu apan raṛṛapusanna udde nawontolla sulal᷊ummu pandu'a apan lukenggamma udde.

²⁴Inaṛṛombanganne Ratu Nebukadnezar mengke niṛṛumoro. I tou nabbuatte ringannu mal᷊ihakka wuṛṛu niumui su manga mamanarane, “Wal᷊inewe i ite tanginna naṛṛapussa siri tallu taumata wuṛṛu nanuntungngi mangitou sulal᷊ummu putungnga udde?” I mangitou sinumimbakka, “Mangke atonna, Tuangku.”

²⁵Sasimbakku ratu, “Arawe anio i ya'u naasilo siri appatta apan u'aamatta su pattangngannu putungnga udde? I mangitou tawe raṛṛapusanna wuṛṛu mangke tawe apa-apa. Wuṛṛu iapa aiappanne udde lihidde naal᷊ihidda monganna.”

²⁶Wua'udde i Nebukadnezar nangudanin ngaran pandu'a udde wuṛṛu nabbisara, “Sadrakh, Mesakh wuṛṛu Abednego, manga allangngu Ruata Apan Atanggaṛṛanne! Sabbangke wuassu pandu'a udde!” Ne i mangitou sinumabbangke.

²⁷Anambon tepellu ratu, manga gubernure, bupati, wuṛṛu manga mamanarane waine namal᷊iwutta siri tallu taumata udde wuṛṛu naasilo manungku i mangitou mangke tawe niaṛṛetannu putungnga. Uta'i mangitou tawe natutungnga, wuṛṛu laubbi mangitou tawe nasoṛṛobba, ewe'e lai hal᷊urun timbulla tawe niasimbuananna si mangitou.

²⁸Ana see ratu nabbisarate, “Paddalote Ruata apan sassubbanni Sadrakh, Mesakh wuṛṛu Abednego. I Tou buatte nandolokku mala'ekan-Ne iapasal᷊amatta siri tallu allang-Nge apan mangngimanna si Tou. I mangitou buatte nilumawangnga parenta'u wuṛṛu mappianne nate wuassu massubba ara'e maddalo al᷊awo'u monganna tabbene'e Ruatan mangitou sassane.

²⁹Anna waugu udde i ya'u mamarenta manungku suapan taumata wuassu walahanna, ṛuangannu walahanna ara'e al᷊awo'u wahasa, apan nabbisaran asal᷊uandaga su surannu Ruata apan sassubbanni Sadrakh, Mesakh wuṛṛu Abednego, sarun tattaranna wuṛṛu wal᷊ene sarun iapaṛṛa'a wuṛṛu olaanna ombon sapadda. Ana waugu tawe monganna apan wotongnge maaola'a apan buatte niola'u Ruata udde.”

³⁰Wua'udde ratu napasa'en pangkatti Sadrakh, Mesakh wuṛṛu Abednego, na'oman sara i mangitou naola'a manga mamanara apan atanggaṛṛanne su propinsin Babel.