Read Talaud DANIEL 8 Bible Online

DANIEL 8 - Talaud bible

DANIEL 8

¹Su tonna atallune pamamarentan Ratu Belsyazar, i ya'u naasomba sondappa aruane.

²Sulal᷊ummu sondappa udde inauranna i ya'u poite su propinsi Elam, su Susan, inangu soa Persia. I ya'u uarisikka maranin Sal᷊ukku Ulai,

³wuṛṛu su winggin sal᷊ukka udde niasiloanna sambau domba esakka apan pia tandungnge mal᷊o'engnga, sambau mallo'enganna wuṛṛu mabbakkuanna wuassu waine.

⁴I ya'u naasilo domba esakka udde mannandu'a watukku waṛṛatta, sawanakka wuṛṛu timukka. Tawe saran sambau winatangnga lai apan wotongnge maaro'appa ara'e maatal᷊angnga wuassu taṛṛionne. I tou ma'ola'a walate apulun naungnge wuṛṛu nabbal᷊i mawunga.

⁵Tantal᷊anna i ya'u ma'ellenga si tou, niasiloanna ambingnga mendangenna tuttattal᷊angnga wuassu samba'a waṛṛatta mammal᷊intaddu runia. Aroddi al᷊ihakke tatal᷊angnge na'oman sara leddane tawe mangeṛṛetta late'a. Su wallattu matane ruan ba'a sambau tandu'a apan maaherangnga.

⁶Ambingnga mendangngenna udde nangudanin domba esakka apan ta'u niasiloanna su winggin sal᷊ukka udde ana see namangalo ringannu maṛṛagissa watukku ringanni tou.

⁷I ya'u nanutukka i tou namangalo domba esakka udde. I tou aroddi aṛṛaginne na'oman sara nanumbu'a domba esakka udde, wuṛṛu namaddi tandungnge ruan bua. Domba esakka udde tawe naal᷊ore mando'appa. I tou natuntungnga su leta'a wuṛṛu manke lakkindanna, tawe saran sangkatou apan mantul᷊ungnge.

⁸Ambingnga mendangenna udde aatambanna ahewalle. Arawe napawe i tou na'omate su pattaal᷊annu taṛṛinone, nappaddite tandungnge apan masallakka udde, ana see su tampa udde tinumuwote appattu wau tandu'a apan mallo'enganna, sambau-sambau watukku tampa apan uapapaṛṛala.

⁹Wuassu wallattu sambau tandu'a udde tinuwuwote tandu'a addio'a apan nabbal᷊i lembon masallakka wuṛṛu taṛṛinone naddatingngu timukka, watukku ra'i wuṛṛu watukku leta'a apan maṛṛansangnga.

¹⁰Tandu'a udde aatambanna lembon asallakke na'oman sara lembon matohassa ipamangalo tantaran surga eteudde manga winatangnga, ewe'e lai manga pira suwallanne niwaretane su leta'a wuṛṛu mangke niṛṛindane.

¹¹Ewe'e lai i tou mannal᷊u'atta panglima tantaran surga, napaaddon sasamba ia'onggolla miallo-miallo apan ia'onggolla su panglima udde, wuṛṛu napaaṛṛan wal᷊en patataṛṛamawuanna si tou.

¹²Ana see manga taumata poiaroddi mannattakke ma'ola'a rosa wuṛṛu tawe mangonggollu manga sasamba apan buatte niema'a su leta'a. Tandu'a udde mahessi sulal᷊ummu al᷊awo'u inolaanne.

¹³Wua'udde i ya'u naaringikka sangkatou mala'ekatta nabbisara iapa waine, “Maddatingngu tiangngera sarangkanambone apan aasiloanna sulal᷊ummu sondapa udde aasiloanna? Maddatingngu tingngera tantaran surga wuṛṛu wal᷊en patataṛṛamawuanna udde mangke laṛṛindanna?”

¹⁴I ya'u naaringikka mala'ekatta sangkatou lai sinumimbakka, “Maddatingngu 1.150 su alonne lai. Su al᷊annunne udde sasamban bawallo wuṛṛu sasamban marua allo tate iongolla. Wua'udde wakutte wal᷊en patataṛṛamawuanna sarun isul᷊e apia.”

¹⁵Sutempo i ya'u tantal᷊anna mattinsahadda maddea'a massunna atappasannu sondappa udde, inaṛṛombanganne uarisikka su saruangku sangkatou apan naal᷊hidda taumata.

¹⁶I ya'u naaringikka tingikka apan nabbisara su samba'an Sal᷊ukku Ulai, wisarane, “Gabriel, tal᷊aa'e si tou sondamme udde.”

¹⁷Wua'udde Gabriel apan uarisikka su saruangku udde nangundani'u. I ya'u nabbal᷊i aroddi ata'unne, na'oman sara i ya'u naṛṛa'a. Unni Gabriel si ya'u, “Ei taumata apan mattate, i'o rinone masingkatta manungku sondapa udde mammasingkatta su ola'u pangudusannu runia.”

¹⁸Tantal᷊anna i tou mabbisara, ia'unawantingnga. Arawe i tou nangagassa si ya'u wuṛṛu nantulungku dirumarisikka apia. Wua'udde i tou nabbisara,

¹⁹“I ya'u sarun mamasingkatta si'o apa apan sarun mariaddi sal᷊immurine maola'a pangillul᷊eannu asasa'un Duata. Ana waugu sondapa udde mapal᷊iatta'u panguddusannu runia.

²⁰Domba esakka apan aellehannu udde, apan pia tandungnge darua, mabal᷊o araratuannu Media wuṛṛu Persia.

²¹Ambingnga mendanggenna udde mabbal᷊on araratuannu Yunani, wuṛṛu tandu'a apan al᷊o'enganne suwallattu darua matane uddewe ratune apan paarorone.

²²Su appatta tatandungnge apan sinumabbangnga napawe tandu'a paarorone udde napaddi, atappasanne manungku araratuannu Yunani sarun matahia mabbal᷊i appatta araratuanna, arawe saran sambau tawe ere atohassu araratuanna apan paarorone udde.

²³Su panguddusannu manga araratuanna udde, napawe al᷊al᷊eo niatambante, ne sarun dumanta sangkatou ratu apan puane maattikka wuṛṛu pande mamahia.

²⁴I tou sarun maola'a matohassa atonna, arawe wal᷊ine ana waugu atatohanne sassane. I tou sarun mandantan papate apan maata'utta wuṛṛu al᷊awo'u apa apan niolangnge sarun mahessi. I tou sarun mamate manga taumata matohassa wuṛṛu umattu Ruata.

²⁵Ana waugu i tou maa'alla, manga wawahiane sarun mahessi. I tou sarun mamungan batanganne, wuṛṛu ringannu tawe mapanaungnga dorone i tou sarun mamate manambo taumata. Ewe'e lai i tou waṛṛani mando'appa Ratu Apan Ahewal᷊anne. Arawe i tou sarun rimunsaanna ringannu tawe atatohassu taumata.

²⁶Sondappa su ola'u sasamban bawallo wuṛṛu marua allo apan buatte nital᷊a'a si'o udde, atonna-tonna sarun mariaddi. Arawe sarangkanambone udde sarun mariaddi sutempo addantane apan ta'e marau; nariaddi arie pabbattia'a su saran sangkatou taumata.”

²⁷Wua'udde i ya'u naapendamma nallome ana see nirumadda'a manga pira allo al᷊annune. Wue udde nabbangunte i ya'u wuṛṛu nammanarate manga manara'u apia su ratu. Arawe i ya'u sussinggawangnga maṛṛingiddu manga sondappa udde wuṛṛu mangke tawe maasunna manga sondappa udde.