Read Talaud DANIEL 9 Bible Online

DANIEL 9 - Talaud bible

DANIEL 9

¹Su tonna paarorone pamamarentan Darius taumatan Media, ana'i Ahasyweros su araratuannu Babel, i ya'u Daniel, mangke mabbasan manga buken agama. I ya'u maṛṛingidda manungku tumuṛṛutu wisaran MAWU si Nabi Yeremia, soan Yerusalem sidutu sarun mahohakka al᷊annune pitun pul᷊o su tonnane.

³Wua'udde i ya'u inumal᷊iomante ringannu atonna-tonna su MAWU Ruata, wuṛṛu sinumal᷊ande aakkan-Ne. I ya'u lai nappuasa wuṛṛu nalluṛṛen laubba karongnga see niuma'ianna su awu.

⁴Al᷊awo'u rosan balahangku ta'u nia'uanna su MAWU Ruata'u. Wisara'u, “MAWU Ruata, I'o wahewalla, wuṛṛu i yami mangngaddata Si'o. I'o sidutu mannuungngu paaire-Nu wuṛṛu mapal᷊iatta'u darangngu-Nu apan tawe panguddusanne si mangitou apan mandangngu Si'o wuṛṛu tuttuṛṛutta apa apan niparenta-Nu.

⁵I yami narosate, i yami buatte na'ola'a alaleo, wuṛṛu na'ola'a pasasal᷊a. I yami buatte namangalo wuṛṛu nilumawangnga parenta-Nu see sinumewadda wuassu manga atoran-Nu.

⁶I yami tawe maddaringikka manga nabi, manga allang-Ngu udde, apan buatte nabbisara ringanu aran-Nu su manga ratun kami, su manga piaṛṛa'a manga al᷊amona wuṛṛu su anambon walahanni yami.

⁷Oh MAWU, manara-Nu sidutu naṛṛino wuṛṛu matul᷊idda, arawe i yami sidutu mandantan asasili su watangani yami, eteudde i yami sarangkanambone apan uatana'a su Yudea wuṛṛu su Yerusalem wuṛṛu anambon taumata sambalahanni yami apan buatte nisal᷊iawukku MAWU watukku manga wanua apan marau wuṛṛu marani ana waugu i mangitou tate matuṛṛutta su MAWU.

⁸Manga ratun kami, manga piaṛṛa'a wuṛṛu iupungngu al᷊amonan kami buatte na'ola'a inolaanna apan maasili wuṛṛu narosate su saruan-Nu, oh MAWU.

⁹I'o napenen pangangampunga wuṛṛu darangngu, salaiwe i yami buatte nilumawangnga Si'o.

¹⁰I yami tawe maddaringikka tingik-Ku, oh MAWU Ruatan kami, sutempo I'o nandolokki yami mabbiakka tuttuṛṛutta manga tita apan buatte nionggollu MAWU si yami wuassu manga nabi, manga allang-Ngu udde.

¹¹Ahewallu Israel buatte nilumawangnga manga tita-Nu wuṛṛu maddiri maddaringikka tingik-Ku. I yami narosate su saruan-Nu, wuṛṛu ana waugu udde I'o nandantan wawotoga si yami apan uawoṛṛetta sulal᷊ummu Buken Musa, allang-Ngu.

¹²I'o mammanara ringannu naṛṛino ere buatte nipa'ire-Nu si yami wuṛṛu su manga tembonanni yami. Yerusalem buatte niṛṛuman-Nu lembon wahewalla wuassu al᷊awo'u soa su runia indi.

¹³Al᷊awo'u asasilaka apan uaweoṛṛetta sulal᷊ummu Titan Musa buatte niapaṛṛia'u MAWU si yami. Arawe salaiwe aroddi, oh MAWU Ruatan kami, i yami ta'e lai mannol᷊a'a malluassa naung-Nu. I yami sidutu maddiri manantangngu manga rosan kami wuṛṛu maddiri lai maddaringikka manga al᷊aṛṛang-Ngu.

¹⁴I'o, oh MAWU Ruatan kami, buatte nakkuumanni yami ringannu asasilaka apan buatte nisaddia-Nu; manara-Nu sidutu naṛṛino wuṛṛu matul᷊idda, arawe i yami tawe maddaringikka tingikku MAWU.

¹⁵Oh MAWU, Ruatan kami, I'o buatte napal᷊iatta'u taṛṛino-Nu ringannu nangapiddu uman-Nu sinumabbangnga wuassu Mesir, wuṛṛu ma'ola'a pasasal᷊a.

¹⁶I'o buatte nanahekki yami sutempon dorone, ana waugu udde ariete masa'u apia su Yerusalem, soa-Nu sassane, wuiddu MAWU apan susi. Ana waugu rosan kami wuṛṛu al᷊al᷊eo na iupungngu al᷊amonan kami, ne anambon taumata maranin kami mangngaddio'a Yerusalem wuṛṛu uman-Nu.

¹⁷Oh Ruatan kami, daringiṛṛewe aal᷊iomanna wuṛṛu sasalande'u. Welengaawe wal᷊e-Nu apan buatte niniṛṛimunsa'a udde, apiate tadea'u anambon taumata masingkatta manungku ete I'o Ruata.

¹⁸Daringiṛṛewe i yami, oh Ruata, elehetewe i yami wuṛṛu intannoiwe asasusan kami see ahahohakku soa apan isassago ringannu aran-Nu. I yami umal᷊iomanna Si'o wal᷊inewe ana waugu manga inasaharanni yami, ewe'e ana waugu I'o napenen darangngu.

¹⁹MAWU, daringiṛṛewe i yami, ampungewe i yami, lu'arewe i yami wuṛṛu pammanarate ringannu mal᷊ihakka! Ariewe mal᷊annu-l᷊annu, tadea'u anambon taumata masingkatta manungku ete I'o Ruata, Ana waugu Yerusalem wuṛṛu uman-Nu udde pussaa-Nu apan apianne.”

²⁰I ya'u sidutu u'al᷊iomanna wuṛṛu mangnga'u rosa'u wuṛṛu rosan balahangku Israel, see sinumal᷊ande su MAWU Rutta'u tadea'u mamelengngu wal᷊e-Ne apan susi.

²¹Tantal᷊anna i ya'u u'al᷊iomanna, Gabriel apan buatte ta'u niassiloanna sulal᷊ummu sonda'u apan paarorone udde, tuttalla'a mattudda ringangku. Orassa udde temponete taumata mangonggollu sasamban bawallo.

²²Wua'udde Gabriel nanal᷊a'a arendi, “Daniel, i ya'u nirumanta tadea'u massumbala si'o massunna ramalanna udde.

²³Sutempo i'o mannattakke sussal᷊ande Ruata, i Tou nangonggollu sasimbakke. I ya'u nirumanta mamasingkatta ana waugu i Tou marangngu si'o. Ne, paddaringikke paapia-pia tantal᷊anna i ya'u manal᷊a'an atappasannu sondappa udde.

²⁴Pitu ikali pitun pul᷊o su tonnane eteudde tempo apan nitantunnu Ruata ipamallossu walahannu wuṛṛu soanu apan susi udde wuassu rosa wuṛṛu al᷊el᷊eo. Al᷊awo'u rosa sarun ampunganna wuṛṛu atatul᷊idda apan saran mal᷊annu-l᷊annu sarun iaparisikka, na'oman sara sondappa wuṛṛu ramalanna udde sarun asingkatanna, wuṛṛu Wal᷊en MAWU apan susi udde sarun pattaṛṛamawuanna apia su MAWU.

²⁵Woṛṛeta'e wuṛṛu sunnaite indi: Pitu ikalin pitun pulo su tonnane sarun masue, manattakka wuassu tempone niapasabbangnga parenta ipabbangunna apia Yerusalem, maddatingngu darantan sangkatou piaṛṛa'a nipilen Duata. Su al᷊annunne pitu ikali annummu pulo dua su tonnanne manga lal᷊anna wuṛṛu manga tanda'a watun Yerusalem sarun iaparisikka apia, arawe tempo udde napenen asasusa.

²⁶Su panginsueannu tempo udde piaṛṛa'a nipilen Duata udde sarun pateanna, sumbal᷊i i tou tawe sal᷊ane. Ne nirumantate tantaran sangkatou ratu apan matohassa, ana see nakkimunsa'e soa Yerusalem see lai Wal᷊en MAWU. Panguddusannu tempo udde sarun rumanta manawangnga apan mangapiddu pangalo wuṛṛu araṛṛimunsa'a, ere buatte nitantunnu Ruata.

²⁷Ratu udde sarun makkiinnu pa'aire apan matohassa ringannu manambo taumata al᷊annune pitu tonna. Su pattangngannu tempo udde, i tou sarun mangingaddu mpangangapiddu sasamba wuṛṛu aonggolla. Wua'udde sambau apan maata'utta apan isassaggo Al᷊al᷊eo apan makkimunsa'a sarun iaddo su Wal᷊en MAWU wuṛṛu sidutu poiaroddi ma'oman sara i tou apan nangaddo isudde aṛṛiaannu papate apan buatte nitantunnu Ruata si tou.”