Read Talaud HOSEA 1 Bible Online

HOSEA 1 - Talaud bible

HOSEA 1

¹Eteindi tanata apan nionggollu MAWU si Hosea ana'i Beeri sutempo araratuannu Yehuda nallal᷊isansunna paparentanni Ratu Uzia, Yotam, Ahas, see Hizkia, wuṛṛu araratuannu Israel paparentanni Yerobeam ana'i Yoas.

²Sutempo MAWU paarorone nabbisara su walahannu Israel ringannu nabbisara wuassia'u, MAWU nabbisara, “Hosea, paawingken sangkatou apan apulune sussandaga, wuṛṛu manga anangngu lai sarun mangaṛṛussa si tou. Uma-U ere lai awingngu udde; i mangitou tawe satia si Ya'u, wuṛṛu nanantang-Ku.”

³Ne i ya'u naawingken sangkatou wawine aranne Gomer ana'i Diblaim. Napawe i tou nanungkangke ana'i yami paarorone, sangkatou ana'a esakka,

⁴MAWU nabbisara si ya'u, “Saggoa'e arannu anangngu udde Yizreel ana waugu tate mal᷊annulai i Ya'u sarun makkuumannu ratun Israel ana waugu pamamate apan niola'i Yehu, al᷊amonane, su Yizreel i Ya'u sarun manguddussu pamamarentan papapulunni Yehu.

⁵Tempo udde su Wawal᷊annu Yizreel i Ya'u sarun makkimunsa'a atatohassu tantaran Israel.”

⁶Wua'udde awingku nanungkangken ana'i yami aruanne, sangkatou ana'a wawine. MAWU nabbisara si ya'u, “Hosea, anangngu udde aranne saggoa'e ‘Apan Tawe Nirangnguanna’, ana waugu i Ya'u tate lai mandangngu walahannu Israel, wuṛṛu mangke tate mangampungnga si mangitou.

⁷Arawe walahannu Yehuda sarun Ta'u rangnguanna. I Ya'u MAWU, Ruatan mangitou, sarun manal᷊amatta si mangitou, arawe wal᷊ine ringannu pangalo, wuṛṛu lai wal᷊ine ringannu hal᷊ele ara'e anaanna ara'e awal᷊o wuṛṛu sumasa'ene.”

⁸Napawe ana'i yami aruane nilaassa, awingku piate illoṛṛo apia ana see nangunsiweten sangkatou ana'a esakka.

⁹MAWU nabbisara si ya'u, “Arannu anangngu saggoa'e udde ‘Wal᷊ine Uma-U’, ana waugu taumatan Israel wal᷊ine uma-U, wuṛṛu i Ya'u wal᷊ine Ruatan mangitou.”

¹⁰Walahannu Israel sarun maola'a anambone ere anne su tahal᷊oangnga, na'oman sara i tou tawe iauukka ara'e iareengnga. Orassa indi Ruata nabbisara si mangitou, “I yamiu wal᷊ine uma-U,” arawe sarun a'omanna tempone i Tou sarun mabbisara si mangitou, “Ete i Ya'u Ruata apan wiakka wuṛṛu i yamiu al᷊aṛṛana-U!”

¹¹Walahannu Yehuda i wuṛṛu walahannu Israel sarun iapaaukka apia. I mangitou sarun manenegu sangkatou piaṛṛa'a, wuṛṛu i mangitou sarun maṛṛite wuṛṛu su lal᷊umanna'a su wanuan mangitou. Atonna, allon Yizreel sarun maola'a allo apan wahewalla!