Read Talaud HOSEA 10 Bible Online

HOSEA 10 - Talaud bible

HOSEA 10

¹Israel naal᷊ihidda punnu anggore apan wuane nabbelle'a. Lembon aatambanna awawantuge, lembon aatambanna mezbah apan niolangnge. Lembon manambo anna, lembon mapia lai manga palen paal᷊uanna apan sassubbanne.

²Manga taumata apan naungnge taṛṛa l᷊inga udde, orassa indi ṛinone mamasanna pangillul᷊eannu rosane. Ruata sarun makkimunsa'a mezbah i mangitou, wuṛṛu mapaṛṛa'a manga palen paal᷊uanni mangitou.

³Tate mal᷊annu lai i mangitou sarun mabbisara, “I ite tawe datu ana waugu i ite tawe mata'uttu MAWU. Apa hunane sangkatou ratu si ite?”

⁴I mangitou mattaṛṛupassi wuṛṛu makkiinnu paaire awusu see mangngaukku paaire apan tawe gunane. Tita niwal᷊elong na'oman sara wawahia tinumuwo ere sasuanna pia sukkanne su wawail᷊anna apan buatte nipasolla.

⁵Tumana'u soa Samaria sarun mata'utta; i mangitou wuṛṛu manga imam apan mangimbe sapi wul᷊awanna su Babel udde sarun masusa wuṛṛu lumuai ana waugu al᷊awo'u araṛṛansangngu paal᷊uanni mangitou udde nawul᷊ite.

⁶Paal᷊uanna udde sarun iapidda watukku Asyur tadea'u ionggolla su ratu mawantuga. Israel tinumantalongnga hol᷊aga apan naaola'a si mangitou naasomba asasili wuṛṛu lallobbosanna.

⁷Samaria sarun maṛṛimunsa'a wuṛṛu ratune sarun iapidda ere alu sampadi apan ia'elekku ua'e.

⁸Manga kuil su manga wuidda su Betel tampan taumatan Israel massubba paal᷊uanna, sarun ṛimunsaanna. Larangnga wuṛṛu nannal᷊o sarun tumuwo su mezbah i mangitou. Ana see i mangitou sarun mangintul᷊i sarun manga wowone, “Taapete i yami!” wuṛṛu su manga wuidda, “Soopete i yami!”

⁹MAWU nabbisara, “Ro'en arariaddianna su Gibea, taumatan Israel taambe lai nangillol᷊o ma'ola'a rosa lullawangnga si Ya'u. Ana waugu udde su Gibea lai i mangitou saru aṛṛiaannu pangalo.

¹⁰I Ya'u sarun mamangalo manga taumata apan marosa udde, wuṛṛu makkuumanni mangitou. Manga walahanna sarun maammulla tadea'u mado'appa si mangitou, wuṛṛu i mangitou sarun iṛṛuumanna ana waugu rosan mangitou apan manambo udde.

¹¹Dorone Israel ere sapi saṛṛen tumuwo apan nal᷊atite mapia, wuṛṛu apulane maṛṛinda gandumma. I Ya'u salaiwe tate mangandangngu pasanganna su wongkone apan mapia udde. Arawe orassa indi i Ya'u buatte nakkawessa tadea'u mamata'i mangitou mammanara mawakkatta. Yehuda Ta'u irolokka mamajeko, wuṛṛu Israel Ta'u irolokka manisiṛṛe.

¹²Ia'unabbisara, ‘Ei Israel! Wannara'e wailla wakku hunan batangannu, pangasi'en wualannu atatul᷊idda, wuṛṛu pangitingke al᷊amatta apan mahessin araṛṛimaddu darangngunu si Ya'u. Ana waugu, temponate i'o maddea'a si Ya'u, Mawunu. I Ya'u sarun dumanta wuṛṛu manossokku manga al᷊ama-U si'o.’

¹³Arawe i'o na'ola'a al᷊aṛṛaene; i'o maddea'a ma'ola'a al᷊al᷊eo, wuṛṛu maddea'a pallal᷊inga. I'o buatte niumanna manga pabbawuan awusunu.” MAWU nabbisara apia, “Ei walahannu Israel, ana waugu i yamiu mangngasakku manga keretan pangalonu wuṛṛu anambon manga tantaranu,

¹⁴ne tumanangngu sarun aṛṛiaannu pangalo, wuṛṛu anambon tanda'a watunu sarun ṛimunsaanna. Olangnge ere su allo i Ratu Salman nanggohakku soa Bet-Arbel sulal᷊ummu pangalo, wuṛṛu nangiladda manga wawine suadio'a ringannu al᷊aṛṛanangnge.

¹⁵Eteudde apan sarun mariaddi si yamiu, ei tumana'u Betel, ana waugu i yamiu buatte na'ola'a al᷊al᷊eo apan wahewalla. Sutempo matannallo sumabbangnga, tawe mal᷊annu napawe pangalo manattakke, ratunu sarun mate.”