Read Talaud HOSEA 14 Bible Online

HOSEA 14 - Talaud bible

HOSEA 14

¹Samaria ṛinone iṛṛumanna ana waugu mandona nilumawangnga si Ya'u. Tumanangnge sarun mate sulal᷊ummu pangalo; al᷊aṛṛanangnge maradio'a sarun ilaranna, wuṛṛu manga wawine pia illoṛṛo waana tianne.”

²Pabbelengke ringannu MAWU Ruatanu, ei walahannu Israel! Rosanu buatte naaola'a si yamiu mattambal᷊ioso wuṛṛu nanawo.

³Pabbelengke ringannu MAWU wuṛṛu apira'e aal᷊iomanna indi maola'a sasambanu si Tou, “MAWU, ampungewe al᷊awo'u rosan kami, wuṛṛu sengkampe aal᷊iomanni yami indi, ne i yami sarun maddalo Si'o ere buatte pina'ireng kami.

⁴Asyur tawe mapanal᷊amatta si yami, wuṛṛu awal᷊on pangalo tawe maaontolla si yami. I yami tate lai maggahatton manga paal᷊uanna apan niola'i yami sassane manungku i mangitou Ruatan kami. Oh MAWU, I'o niumakkannu manga taumata apan tawe uatahuanna sisai-sai apan wotongnge ipangasakki mangitou.”

⁵MAWU nabbisara, “Uma-U apan sinumewadda, Ta'u al᷊apanna apia wuṛṛu Ta'u iakkanna ringannu ahewallu naungnga; i mangitou tate Ta'u wul᷊oanna apia.

⁶Su taumatan Israel i Ya'u naal᷊ihidda uranna apan maṛṛolo leta'a mamara. I mangitou sarun matti'akka ere bunga wuṛṛu ere punnu alu cemara apan mal᷊al᷊umma ramunne.

⁷I mangitou sarun mabbiakka wuṛṛu aatambanna naal᷊ihidda sasuanna apan maddanna su al᷊awo'u rannane, naal᷊ihidda punnu alu zaitun aṛṛamage hal᷊urune mawangngi ere punnu alu cemara!

⁸I mangitou sarum mabbelengnga ringang-Ku wuṛṛu matana'a sulal᷊ummu lal᷊u'arang-Ku. Ringannu mal᷊ihakka i mangitou sarun aatambanna lal᷊umanangnge, naal᷊ihidda gandumma apan tinumuwo su wawail᷊anna apan masuwukka wuṛṛu naal᷊ihidda wawail᷊annu anggore. Naal᷊ihidda ua'en anggore Libanon aranni mangitou tinumelengnga.

⁹Taumatan Israel sarun mandammen manga paal᷊uanna apan sassubbanne; i mangitou Ta'u paddul᷊iananna wuṛṛu Ta'u daringiṛṛanna aal᷊iomanne. Naal᷊ihidda aaluanna apan uasaṛṛihalo rongngane, i Ya'u sarun manirungnga si mangitou. Ete i Ya'u punnu al᷊awo'u al᷊amatti mangitou. I Ya'u, MAWU, buatte nabbisara.”

¹⁰Antimanna anambon taumata apan pande maasunna apa apan uawoṛṛetta isindi, wuṛṛu maatutukka. Manga tatantiro wuassu MAWU uddewe naaṛṛino, wuṛṛu taumata apan susi mabbiakka tuttuṛṛuta manga tatantiro udde. Arawe taumata marosa tawe maddaringikka na'oman sara i mangitou nattanggul᷊ewakka wuṛṛu nawal᷊atta.