Read Talaud HOSEA 4 Bible Online

HOSEA 4 - Talaud bible

HOSEA 4

¹MAWU pia gatto ringannu tumana'u wanua indi. Ei, Israel, paddaringikka apa apan niwisara-Ne, “Su wanua indi tawe tatuṛṛutta ara'e darangngu, wuṛṛu tumanangnge tawe manga'u i Ya'u udde Ruata.

²I mangitou nassalu arawe i mangitou tawe nanipussa; i mangitou nangawusu, mammate, manna'o wuṛṛu sussandaga. Al᷊al᷊eo aatambanna, wuṛṛu pamamate ual᷊al᷊isansunna.

³Ana waugu udde wanua indi sarun maola'a maṛṛasa, wuṛṛu al᷊awo'a apan mabbiakka isudde sarun mate. Al᷊awo'u hatin binatangnga su winalanganna, su ammaranne wuṛṛu su tahal᷊oangnga sarun mate.”

⁴MAWU nabbisara, “Ei manga imam, arie piaddu mappaasal᷊a ara'e mamul᷊o uma-U, ana waugu ete i yamiu Ta'u iapasal᷊a!

⁵Allo ṛabbi i yamiu ma'ola'a pasasal᷊a, aroddi lai manga nabi. Ana waugu udde i Ya'u sarun manginsue Israel, inangngu.

⁶I yamiu, manga imam, tate maddaringikka si Ya'u, ne uma-U lai tate maddaringikka si Ya'u na'oman sara i mangitou nasilaka. I yamiu mannola'u manga al᷊aṛṛa-U. Nariaddi, i Ya'u sarunmanol᷊a'i yamiu, wuṛṛu manga anangu tawe Ta'u a'uanna maola'a manga imammu MAWU.

⁷Mallannu i yamiu aatambanna anambone, lembon marosa lai i yamiu si Ya'u, ei manga imam! Ana waugu udde olangnge sarun Tau wal᷊uanna: I yamiu sarun tate lai addatanna, ewe'e lallobbosanna.

⁸I yamiu nabbal᷊i ala ana waugu rosan uma-U, ana waugu udde i yamiu mappulu tadea'u i mangitou sidutu ma'ola'a rosa.

⁹Ne i yamiu sarun matataṛṛangnga ere lai tumanangnge! I ya'u sarun makkuumanni amiuuasul᷊ungngu manga inolaannu.

¹⁰I yamiu sarun umanna wuassu manga sasamba apan nionggolla, arawe i yamiu sidutu mal᷊unussa. I yamiu sarun massubba manga mongannu asasuwukka, arawe tumanangnge mangke tawe aatambanna, ana waugu i yamiu buatte nanantang-Ku wuṛṛu massubate manga mawu waine.”

¹¹MAWU nabbisara, “Ei uma-U, mawae anggore tabbe ara'e anggore apan wakku buatte napaawul᷊in atatohannu ipaṛṛingidda ringannu mapia.

¹²I yamiu maddorongnga tatantiro wuassu alu sampaddi! Ta'inna sambua mammasingkatta si yamiu apa apan apulu singkatanni yamiu! I yamiu naal᷊ihidda sangkatou awingnga apan sussandaga; i yamiu nanantang-Ku wuṛṛu nanantillu watangannu su manga mawu waine.

¹³Sumanga tampa pasasubbanna paal᷊uana su manga puiddu wuidda wuṛṛu wowone, i yamiu mangngonggollu sasamba, wuṛṛu mannambunnu manania su al᷊ungngu manga aaluanna wahahewalla wuṛṛu masindumunna ana waugu tampa udde mal᷊annabba. Arawe apa pangillul᷊eanne? Manga anangngu maṛṛuala nabbal᷊ite sumasandaga wuṛṛu manga mananambonu wawine maddea'a sawa waine!

¹⁴Arawe i Ya'u sarun tawe makkuumannu inolaani mangitou udde, ana waugu i yamiu sassane lai inai ringannu manga sumasandaga apan mammanara su manga kuil wuṛṛu suaddio'a ringanni mangitou i yamiu mangngonggolu sasamba su monganna. Mangke atonna wisara indi: ‘Pabbawalaga apan tawe uatahuanna pasasunna su ola'u Ruata sarun maṛṛ'a.’

¹⁵Ei i yamiu taumatan Israel, i yamiu tawe satia si Ya'u! Arawe, i Ya'u mangantimma Yehuda tawe ma'ola'a pasasal᷊a apan uasul᷊ungnga! Imbaṛṛangnga mattaṛṛamawu su Gilgal ara'e su Betel. Imbaṛṛangnga massalu poiaroddi ringannu arannu MAWU apan biakka.

¹⁶I yamiu, ei taumatan Israel, tumaniten tawe maddaringikka! Ereapa wotongnge i Ya'u mallu'adda si yamiu ere domba su wadda'u nannal᷊o?”

¹⁷Umattu Israel niawono'ante paal᷊uanna. Ana waugu udde wala'e i mangitou.

¹⁸Napawe niwu'anne ana waugu na'inumma anggore tumaniten manambo, i mangitou sussandaga ringannu maluassa. I mangitou mappianne lallobbosanna sul᷊ungnge aaddatanna.

¹⁹Ana waugu udde i mangitou sarun mawul᷊i ere nitiuppu anginna. I mangitou sarun maasomba asasili ana waugu manga sasamba apan nionggoli mangitou su manga monganna.