Read Talaud HOSEA 5 Bible Online

HOSEA 5 - Talaud bible

HOSEA 5

¹MAWU nabbisara, “Paddaringikke, ei manga imam! Panutukke, ei taumatan Israel! Paddaringikke, ei manga taumata papapulunnu ratu! Ṛuumanna buatte niema'a si yamiu. Ana waugu, ṛinone i yamiu makkuungnga ringannu atatul᷊idda, arawe nawal᷊i'a i yamiu naola'a ere sedda su Mizpa, naal᷊ihidda wal᷊ati'a su Wowon Tabor,

²wuṛṛu naal᷊ihidda paṛṛabba apan mal᷊al᷊umma su Sitim. Ana waugu udde i Ya'u sarun makkuumanni i yamiu sarangkanambone!

³I Ya'u masingkattu al᷊awo'a su ola'u watangannu, ei Israel! I'o tawe mapangaddapinggnga saran sambau wuassia-U. I'o massubba paal᷊uanna wuṛṛu tate lai satia si Ya'u. Ana waugu udde, manga taumatanu tate su ṛinone lai massubba si Ya'u.”

⁴Al᷊al᷊eo apan niola'u taumatan Israel pangillul᷊eanne i mangitou tate mapabbelengnga ringannu Ruatan mangitou. I mangitou tataṛṛinoante pasasubba paal᷊uanna, na'oman sara i mangitou tate maddaringikka MAWU.

⁵Awawungan balahannu Israel aasiloanna ringannu massemakka, wuṛṛu maola'a tialan pasasal᷊an mangitou. Rosan mangitou naaola'a si mangitou natara wuṛṛu nawal᷊atta, wuṛṛu walahannu Yehuda nanawo suadio'a lai ringanni mangitou.

⁶I mangitou inaite maddea'a MAWU ringannu uaapiddu domba wuṛṛu sapi olaanna sasamba, arawe sarangkanambone udde tawe gunane. Ana waugu MAWU nanantangken mangitou, wuṛṛu i mangitou tate maasomba si Tou.

⁷I mangitou tate satia su MAWU; al᷊aṛṛana'i mangitou wal᷊ine al᷊aṛṛanangnge. Ana waugu udde, tate mal᷊annu lai i mangitou sarun pateanna suadio'a ringannu manga wawail᷊anni mangitou.

⁸Tiuppe trompetta su Gibea! Patuntungia'e tialan bawaggo mapapangalo su Rama! Pangikkuitte hahuressan pangalo su Betel! Wette taumatan Benyamin, inaite mapapangalo!

⁹Israel sarun mate, ana waugu nia'omante allone ipakkuumanni tou. Paddaringikke, ei tumanana'u Israel, olangnge udde sarun mariaddi.

¹⁰MAWU nabbisara, “I Ya'u massa'u ana waugu manga piaṛṛa'u Yehuda buatte namangalo Israel wuṛṛu nangaṛṛo letangnge. Ana waugu udde i Ya'u sarun mapaṛṛia'u ṛuumanna si mangitou ere manawangnga.

¹¹Israel niallangnga; i tou niawul᷊iannu tahuanne su letangnge sassane, ana waugu i tou mangke mammata'a ma'iontolla si sai apan ṛinone wotongnge mangontolla si tou.

¹²Ana waugu udde i Ya'u sarun makkimunsa'a walahannu Israel, wuṛṛu mamate taumatan Yehuda.

¹³Walahannu Israel wuṛṛu walahannu Yehuda naatutkka inolaanne apan dal᷊eo, ne Israel inaite watukku Asyur tadea'u maddorongnga sumbala su ratu wahewalla. Arawe i tou udde tawe ma'ontolla wuṛṛu mangapia ola'u pabbiaṛṛanni mangitou.

¹⁴Naal᷊ihidda singa apan tumambo, aroddi lai i Ya'u sarun mamangalo taumatan Israel wuṛṛu Yehuda. I Ya'u sassane sarun manggesa'a si mangitou, ana see Ta'u itantangnga. Napawe i Ya'u mamol᷊engnga si mangitou inai, tawe saran sangkatou apan wotongnge mamallossi mangitou.

¹⁵Uma-U sarun Ta'u itantangnga ma'oman sara i mangitou natimute uatataṛṛangnga ana waugu manga rosane, wua'udde rumanta maddea'a si Ya'u. Asinungka sulal᷊ummu asasusane, i mangitou sarun mattinsahadda maddea'a si Ya'u.”