Read Talaud HOSEA 7 Bible Online

HOSEA 7 - Talaud bible

HOSEA 7

¹MAWU nabbisara, “Suapan i Ya'u mappulu mangundamma uma-U Israel wuṛṛu mamelengngu ola'u pabbiaṛṛanni mangitou, ne apan Ta'u aellehanna tumba'u al᷊al᷊eo wuṛṛu rosan mangitou. I mangitou ual᷊al᷊inga, i mangitou sussutta su wal᷊en taumata maddea'a manna'o, wuṛṛu i mangitou mangngaṛṛo su manga lal᷊anna.

²Tawe saran paasa sinumambbi sulal᷊ummu ṛingiranni mangitou manungku i Ya'u sarun mannaungnga al᷊awo'u al᷊al᷊eo udde. Arawe manga rosan mangitou uapal᷊iwutta si mangitou na'oman sara i Ya'u naasilo ringannu matualaga.”

³MAWU nabbisara, “Ringanu wawahia wuṛṛu inolaana apan dal᷊eo tumanangnge mattinsahadda malluassa naungngu ratu wuṛṛu manga temboanannu araratuanna.

⁴I mangitou sarangkanambone taṛṛa awusu wuṛṛu taumata apan tawe satia. Ararantinni mangitou naal᷊ihidda putungnga sulal᷊ummu sungilla apan tawe niṛṛunuttu. Maaola'a roti tantal᷊anna tamponna taambe nasaddia lol᷊oanna.

⁵Su allon andeangngu ratu, na'ola'a ratu wuṛṛu manga tembonanne na'inumma anggore na'oman sara niwu'anne wuṛṛu na'ola'a inolaanna apan longonna. Panginsuenne ratu mallal᷊umanna'a ringannu manga taumata apan nampabbaha udde.

⁶Naal᷊ihidda putungnga sulal᷊ummu sungilla aroddi lai ṛiinna lal᷊eo wuṛṛu asasa'un mangitou niṛṛumenggama sulal᷊ummu naungnga su al᷊o'engngu ṛabbi, wuṛṛu napawe marua allo sinumal᷊oi nabbal᷊i ṛenggammu putungnga apan mannoṛṛobba.

⁷Sulal᷊ummu naungngu asasa'une, i mangitou namate manga piaṛṛa'i mangitou. Anambon ratun mangitou buatte nipate nallal᷊isansunna. Arawe salaiwe ola'i mangitou nabbal᷊ite aroddi al᷊eone, taweddu saran sangkatou apan niumaliomanna si Ya'u maiontolla.”

⁸MAWU nabbisara, “Walahannu Israel nassanggal᷊oma ringanu manga walahannu ual᷊indonganni mangitou, na'oman sara i mangitou nabbal᷊i ere roti apan nal᷊aha tumba'u samba'a.

⁹I mangitou tawe maatutukka manungku ete ana waugu pasasanggaal᷊oma ringannu manga walahanna udde, ne nawul᷊ite atatohassi mangitou. Panginsuenannu pabbiaṛṛanni mangitou maranite, arawe i mangitou wagga.

¹⁰Awawungan taumatan Israel aasiloanna ringanu matualaga wuṛṛu maola'a tialan pasasal᷊an mangitou. Salaiwe sarangkanambone udde buatte natipussa, i mangitou tawe lai maddea'a si Ya'u, ara'e mabbelengnga ringang-Ku, MAWU Ruatan mangitou.

¹¹Israel uapapal᷊ele tawe atanaanne naal᷊ihidda merpati apan woddo. Paarororne manga taumatane naddorongnga sumbala su Mesir, wua'udde i mangitou tinumal᷊angnga ringannu Asyur!

¹²Arawe suapan i mangitou sumabbi, i Ya'u sarun mantaingngu sedda wuṛṛu manamentta si mangitou ere taumata manametta manu'u winalanganna. I Ya'u sarun makkuumanni mangitou ana manga al᷊al᷊eon mangitou apan buatte Tau niasingkatanna.

¹³Nasilakate i mangitou, ana waugu i mangitou buatte nanantang-Ku. I mangitou sarun maṛṛimunsa'a ana waugu buatte nilumawangnga si Ya'u. I Ya'u mappulu manal᷊amatta si mangitou, arawe patataṛṛamawun mangitou mangke awusu atonna.

¹⁴I mangitou tawe atonna-tonna umal᷊iomanna si Ya'u. Amungkangngu i mangitou umal᷊iomanna, i mangitou mattingka wal᷊atta su tampan tattiil᷊anna, wuṛṛu lulluai ere a'olaannu manga taumata apan tawe mangimanna si Ya'u. Amungkangngu i mangitou umal᷊iomanna maddorongnga gandumma wuṛṛu anggore, i mangitou mallesa watanganne ere a'olaannu manga taumata apan massubba monganna. I mangitou atonna-tonna lullawangnga si Ya'u!

¹⁵Salaiwe ete i Ya'u apan nabbuwunna wuṛṛu nanohassa si mangitou, arawe i mangitou naamulla lumawangnga si Ya'u.

¹⁶I mangitou mangke sidutu uatantalongnga manga monganna apan atonna-tonna tawe uatahuanna taṛṛino saran kaddio'a. I mangitou tate ipangasakka naal᷊ihidda darangeanna apan nilumonto'a. Manga piaṛṛa'i mangitou mabbisara ringannu mawunga, ana waugu udde i mangitou sarun pateannu hal᷊ele, wuṛṛu ilallange manga taumatan Mesir.”