Read Talaud HOSEA 8 Bible Online

HOSEA 8 - Talaud bible

HOSEA 8

¹MAWU nabbisara, “Patuntingia'e tatialan pangalo! Seetta namangalo wanua-Ku naal᷊ihidda asiaṛṛe nangametta inanne! Uma-U nilumawangnga paaire-U ringanni mangitou, wuṛṛu nilumawangnga manga tatantiro-U.

²Salaiwe i mangitou mannaggo-U Ruatan mangitou, wuṛṛu nabbisara manungku i mangitou uddewe uma-Ku apan masingka-U,

³arawe i mangitou maddiri manengkamma apa apan mapia. Ana waugu udde i mangitou sarun enggenannu seetti mangitou.

⁴Uma-U namile ratu ringannu tawe naddorongnga ṛingidda si Ya'u. I mangitou nanenegu piaṛṛa'a tawe niwal᷊o si Ya'u. I mangitou nanganu wul᷊awanna wuṛṛu sal᷊a'an mangitou wua'udde nallanginnu paal᷊uanna sassubbanna apan pangillul᷊eanne naola'a araṛṛimunsa'i mangitou sassane.

⁵I Ya'u maddantinu sapi wul᷊awanna apan sassubbannu tumana'u soan Samaria. I Ya'u mangke nasa'u atonna si mangitou. Maddatingngu tingngera i mangitou sidutu mandal᷊eo watanganni mangitou ringannu massubba paaluanna?

⁶Sapi wul᷊awanna apan sassubbanna su Samaria udde lanna'u lima taumatan Israel! Udde wal᷊ine Ruata, wuṛṛu rinone rimunsaanna!

⁷Uma-U mangngasi'u anginna ne i mangitou sarun mangitingnga tandi'a! Wawail᷊annu gandummi mangitou tawe mandirikka, ne tawe maola'a taponna tadea'u annananna. Arawe amungkangngu wawail᷊anna udde mandirikka lai, ne gandumme sarun insueannu manga walahanna waine.

⁸Naal᷊ihidda urinna apan napesangnga, aroddi lai Israel apan tate gunane, wuṛṛu naola'a walahanna wiasa ere manga walahanna waine.

⁹Naal᷊ihidda keledai matengnga apan mabbu'attikka, aroddi lai manga taumatan Israel tuttuṛṛutta apulune sassane. I mangitou madde'a sasumbala wuassu Asyur, wuṛṛu namalli paggahahawe su manga walahanna waine.

¹⁰Salaiwe aroddi i Ya'u sarun mangammulla wuṛṛu makkuumanni mangitou. Tate mal᷊annu lai i mangitou sarun sumaliomannu atataddu'a, napawe i mangitou allangannu ratun Asyur.

¹¹Lembon manambo mezbah iapararisikku taumatan Israel ipamappasa rosa, lembon manambo lai tampa pa'olaanna rosa!

¹²I Ya'u namoṛṛettu manambo atonna al᷊aṛṛa'a si mangitou, arawe sarangkanambone udde nitol᷊a'i mangitou ana waugu massunna tawe gunane si mangitou.

¹³I mangitou apulune mangngonggollu sasamba si Ya'u, wuṛṛu u'inassa ṛemessu sasamba udde, arawe i Ya'u MAWU, tawe mal᷊uassa ringannu manga sasamba udde. Orassa indi i Ya'u mannaungke rosan mangitou wuṛṛu makkuumanni mangitou ana waugu manga rosa udde; i Ya'u sarun mangirimmi mangitou mabelengnga apia su Mesir!

¹⁴Taumatan Israel mapararisikku manga wal᷊en araratuanna, arawe i mangitou naabul᷊in Mandariaddi si mangitou. Taumatan Yehuda nanamba manga soa pia tanda batune, arawe i Ya'u sarun manossokku putungnga ipanoṛṛobba manga wal᷊en araratuanna wuṛṛu manga soan mangitou sara masue.”