Read Talaud AMOS 8 Bible Online

AMOS 8 - Talaud bible

AMOS 8

¹I ya'u naasomba sambau sondapa apia wuassu MAWU Apan Atanggaṛṛanne. I ya'u nassilo sambau sal᷊angka lal᷊oṛṛoannu manga wuan kaaluanna apan nal᷊ahate.

²MAWU naiwal᷊o, “I'o naasilo apa, Amos?” I ya'u sinumimbakka, “Sambau sal᷊angka lal᷊oṛṛoannu manga wuan kaaluanna apan nal᷊ahate.” MAWU nabbisara, “Tempone nal᷊ahate su uma-U Israel. I Ya'u tate lai mamal᷊u ṛiing-Ku wuṛṛu sarun makkuumanni mangitou.

³Su allo udde manga aantari su wal᷊en araratuanna sarun mabbal᷊i lal᷊uai. Su al᷊awo'u tampa uaseṛṛoppa manga winal᷊unanna buatte niramme ringannu mal᷊anna-l᷊annabba.”

⁴Paddaringikke, ei i yamiu apan mangngallangnga taumata asiangnga su wanua indi na'oman sara i mangitou nate!

⁵I yamiu mabbusara su watangannu sassane, “Wal᷊ine hampa al᷊annunne manga allon damea. I ite mappulu mal᷊iha-l᷊ihakka mabbul᷊u gandummi ite apia, arawe ramea udde pendamanna tawe panguddusanne. Tingngerate allon Sabat umuddussa, tadea'u i ite wotongngete mabbal᷊u'a apia? I ya'u maapulu atonna mabbalante'a mallinga ringannu sasupa'a, wuṛṛu manna'o timbanganna.

⁶Gandumma apan nal᷊eote wotongnge iwal᷊u'i ite apia ringannu aregga apan matanggakka. I ite maddea'a taumata asiangnga apan tate maawaekka awallanne, salaiwe awallassa udde tumba'u areggan sampare silope, wuṛṛu i ite mamalli si tou maola'a allangngi ite.”

⁷MAWU, Ruatan balahannu Israel, buatte nassalu, “I Ya'u mangke tawe maabul᷊i inolaanni mangitou apan dal᷊eo.

⁸Runia sarun umio'a, wuṛṛu anambon taumata naungnge massusa. Ahawellu wanua sarun mangindo wuṛṛu iwabbaretane naal᷊ihidda Sal᷊ukku Nil.

⁹Sarun a'omanna tempone i Ya'u sarun mapaatuppu matannallo sutempo allattune wuṛṛu runia mabbal᷊i marandumma sutempo allo. I Ya'u, MAWU Apan Atanggaṛṛanne, buatte nabbisara.

¹⁰Manga rameanu sarun Ta'u wal᷊uanna mabbal᷊i lullal᷊o, wuṛṛu manga aantarinu mabbal᷊i lal᷊uai. I Ya'u sarun ma'ola'a si yamiu mangiṛṛi utangngu wuṛṛu malluṛṛen laubba karongnga tattialan massusa. I yamiu sarun maola'a ere iamangnga inangnga apan lulluain papaten anangnge tinggassa. Allo udde sarun umuddussa ringannu lembon maasusa.”

¹¹MAWU Apan Atanggaṛṛanne nabbisara, “Sarun a'omanna tempone i Ya'u sarun mandantan al᷊aṛutumma su wanua indi. Taumata sarun mal᷊unussa, arawe wal᷊ine mal᷊unussa anna. Taumata sarun marau, arawe wal᷊ine maraun ua'e. I mangitou mal᷊unussa wuṛṛu maraun tanata-U.

¹²Taumata sarun lumallele wuassu sawannakka watukku timukka wuṛṛu wuassu ra'i watukku warṛṛatta tadea'u maasomba tanata-U, arawe i mangitou tawe maasomba.

¹³Su allo udde ewe'e lai manga taumata saṛṛen tumuwo apan lal᷊umannangnge lai mapia sarun mawantingnga ana waugu narou.

¹⁴Manga tumata apan nassalu ringannu paal᷊uannu Samaria mabbisara, ‘Sulal᷊ummu mongannu walahannu Dan’, ara'e ‘Sulal᷊ummu Mongannu Bersyeba’ — sarun manawo wuṛṛu tate maawuatta apia.”