Read Talaud OBAJA 1 Bible Online

OBAJA 1 - Talaud bible

OBAJA 1

¹Eteindi laṛṛangngon Obaja; i tou namasingkattu tanatan MAWU Apan Atanggaṛṛanne su ola'u walahannu Edom: MAWU buatte nangirimmu daroloṛṛan-Ne ringannu manga walahanna, wuṛṛu i ite buatte naringikka tanata apan buatte niapidde ere indi, “Pandiahite inai mapapangalo! Wette i ite inaite mamangalo Edom.”

²Wuṛṛu su Edom, MAWU nabbisara, “I'o Ta'u olaanna lome, ma'oman sara lallobbosannu anambon balahanna.

³I'o niaawusuannu naungngu apan mawunga. Inangngu soanu uddewe wowon batu apan matohassa; tampa tatanaannu su puiddu wowone apan matanggakka. Ana waugu udde i yamiu maṛṛingidda, ‘Isai apan wotongnge mangema'u?’

⁴Salaiwe i'o ma'ola'a wal᷊enu ere atanggakku sal᷊aku manu'a rajawali, wuṛṛu ere atanggakku manga anumpitanna su langitta, i'o sarun Ta'u iema'a.

⁵Taṛṛa ta'o ara'e mangangaṛṛo apan nirumanta sutempo ṛabbi, tumba'u manganu saranapa apan ipaapulune. Taumata apan manni'o anggore su wailla, sidutu mangngaddo manga piran bau. Arawe i'o sarun insueannu manga seennu.

⁶Ei papapulunni Esau, i'o nipanna'oanna wuṛṛu manga darotongngu apan uawuni lai nianu.

⁷I'o niawusuannu manga hawenu, wuṛṛu nilimbuaṛṛanna wuassu wanuanu. I'o niwaddon manga hawenu, nihauannu taumata apan niumanna suadio'a ringannu. I mangitou ma'iwal᷊o su ola'u watangannu, ‘Suapate orassa indi al᷊awo'u apapandene?’

⁸Su allo i Ya'u makkuumannu Edom, manga taumata apan pande sarun Ta'u pateanna. Wuṛṛu al᷊awo'u asingkatti mangitou sarun mawul᷊i, tawe lannangnge.

⁹Manga atumannaṛṛanne wuassu Teman sarun mangiladdu atata'utta, wuṛṛu anambon tantara Edom sarun mate.”

¹⁰“Inolaannu tumaniten maṛṛagissa su saruannu manga tuṛṛangngu papupulunni Yakub. Ana waugu udde i'o sarun pateanna, wuṛṛu aal᷊uandahannu taumata su al᷊o'engngu tempo.

¹¹I'o uarisikka wuassu marau, su allo seetta naṛṛapi ngaran Yerusalem wuṛṛu namaddon soa udde. I'o mangke mal᷊anabba sutempo i mangitou naṛṛuwo paa'alan Yerusalem wuṛṛu ringanna nitahia suwallatti mangitou. I'o nassul᷊ungnga al᷊eone ringannu seetta udde.

¹²Tawe su lal᷊anne i'o lumuassu asasusan Yehuda wuṛṛu lumala'a su allo tuṛṛangngu udde nate. Tawe su ṛinone i'o mattal᷊imoṛṛonganna sutempo i tou massussa.

¹³Tawe su lal᷊anne i'o sumutta su soan uma-U, wuṛṛu mangngintul᷊in manga taumata apan tantal᷊anna uatataṛṛanga, nangillembote lai mangaṛṛo darotongnge su allon asasusane!

¹⁴Tawe su lal᷊anne i'o dumarisikka su pappengannu lal᷊anna, tadea'u mangampangnga manga taumata apan tuttal᷊angngu watanganne wuassu seetta, ara'e manantilli mangitou su ro'appa su allo i mangitou niaṛṛiaannu asasusa.”

¹⁵“Atonna, maranite allone, i Ya'u, MAWU, makkuungngu manga walahanna. Apa apan niola'i Edom sarun ipabbal᷊issa si tou. I tou sarun maapendamma lai apa apan buatte niolangnge.

¹⁶Su puiddu wowone-U apan susi uma-U buatte na'inumma ua'e apan nammasingkattu ṛuumanne. Arawe ua'en manga walahanna su runia indi mappetanna lai. Ṛuumanna udde tawe ial᷊asso'i mangitou. I mangitou sarun ma'inumma ma'iman sara masue, wua'udde i mangitou sarun mawul᷊i tawe lannangnge.”

¹⁷“Arawe su Wowon Sion, sarun piaddu masal᷊amatta, wuṛṛu wowone udde mabbal᷊i tampa apan niaṛṛae huna-U. Ne papapulunni Yakub sarun maatahuanna apia leta'a pussa'an mangitou.

¹⁸Uma-U Israel naal᷊ihidda putungnga apan nanoṛṛobba na'oman sara nasue papapulunni Esau, naal᷊ihidda putungnga nanoṛṛobba na'oman sara nasue laṛṛami su wawail᷊anna. Tawe saran sangkatou wuassu papapulunni Esau apan naatal᷊angnga. I Ya'u, MAWU buatte nabbisara!

¹⁹Manga taumatan Yehuda Timukka sarun mamanua su Edom. Manga taumata wuassu panenteanna samba'a waṛṛatta sarun mamaddon wageangngu leta'u Filistin. Ṛuanganni Benyamin sarun mangaṛṛo Gilead, wuṛṛu Israel uma-Ku sarun mamarenta ahewallu Efraim wuṛṛu Samaria.

²⁰Taumatan Israel Sawannakka sarun mabbelengnga apia wuassu pamamuanganna wuṛṛu mamanua su Fenisia maddatingngu Sarfat. Manga taumatan Yerusalem apan niwuangnga su Sardis, sarun mabbelengnga wuṛṛu manahuanna manga soa su wageangngu timukku Yehuda.

²¹Tumana'u Yerusalem apan matohassa sarun mamangalo Edom wuṛṛu mamaddone. Ne i Ya'u MAWU sarun mamarenta maola'a ratu.”