Read Talaud YUNUS 1 Bible Online

YUNUS 1 - Talaud bible

YUNUS 1

¹Su allo sambau, MAWU nabbisara si Yunus, ana'i Amitai.

²Wisara-Ne, “Roote watukku Niniwe, soa wahewalla udde, tadea'u mapaanaungnga, ana waugu i Ya'u masingkatta manungku tumanangnge tumaniten dal᷊eo.”

³Arawe Yunus ewe'e lai inaite watukku tampa waine tadea'u mangindaun MAWU. I tou nanute watukku Yopa, wuṛṛu inauranna nattapare naasangkalla apalla apan inai watukku Spanyol. Napawe buatte namaekka parakene, i tou sinuma'ete su apalla, ana see massenggote suadio'a ringannu lal᷊oṛṛon apalla watukku Spanyol, tadea'u mangindaun MAWU.

⁴Yunus nilumintukka su tampa apan al᷊iuwowane wuṛṛu nilumallowangnga isudde, ana see niamatiil᷊anna mal᷊angnga. Wua'udde MAWU nandantan anginna ma'ikkatta su tahal᷊oangnga, ana see nariaddite tandi'a apan wahewalla, apan namuulla apalla udde na'oman sara maranite mapesangnga. Manga mamanaran apalla tumaniten matta'utta wuṛṛu mangngintulite maiontolla, sangkatou-sangkatou su monganne sassane. Su ipanggaingnga asasilaka lumakkubba, i mangitou namarentan lurannu apalla udde su tahal᷊oangnga.

⁶Sutempo apitennu apalla udde nilumintukka wowane, i tou naasangkalla si Yunus isudde tantal᷊anna mattiilla. Ana see i tou nabbisara, “Ṛatadde i'o wotongnge maatiilla su lal᷊ummu olangnge arendi! Otte pabbangunte! Aal᷊iomante su mongannu pa'iontolla. Isai masingkatta i tou sarun umakkanni ite ma'oman sara i ite tawe mate.”

⁷Napawe i Yunus wuṛṛu apitenna udde niumawitte rosone, manga mamanaran apalla udde nabbisara ṛundussa i mangitou, “Wette, i ite mandamen undi tadea'u i ite masingkatta isai apan massal᷊a na'oman sara i ite niaṛṛiaannu asasilaka indi!” I mangitou nandammeten undi, wuṛṛu aranni Yunus apan niaṛṛinoanne.

⁸Ana see unni mangitou si Yunus, “Atonnawe ete i'o apan pinangillul᷊eannu asasilaka indi? I'o wuassuapa? Walahannu apa? Anio i'o isindi?”

⁹Sasimbakki Yunus, “I ya'u taumatan Ibrani. I ya'u massubba MAWU Ruata su surga, apan nadiaddi tahal᷊oangnga wuṛṛu ammaranne.”

¹⁰Wua'udde i tou nabbatti'a ereapa i tou maddea'a tumal᷊angngu watangane wuasu MAWU. Naaringikka udde manga mamanaran apalla nabbal᷊i lembon matta'utta lai, wuṛṛu nabbisara si tou, “Mawunga atonna inolaannu udde!”

¹¹Tantal᷊anna udde tandi'a mangke mandi'uṛṛu, ana see anga mamanaran apalla naiwal᷊o si tou, “Apa apan ṛinone olaanni yami si'o tadea'u tandi'a indi umol᷊o?”

¹²Yunus sinumimbakka, “Rammea'e i ya'u sulal᷊ummu tahal᷊oangnga, ne tandi'a sarun umol᷊o. Ana waugu orassa indi i ya'u masingkatte, manungku ete i ya'u apan naaola'a tandi'a wahewalla indi naṛṛia'a si yamiu.”

¹³Arawe manga mamanaran apalla udde ta'e lai mattinsahadda ringannu ahewallu ikkanne mammundallu apalla udde watukku ammarenne. Arawe tandi'a lembon mandi'uṛṛu lai, na'oman sara sahaddi mangitou tawe gunane.

¹⁴Ana waugu udde i mangitou sinumal᷊ande su MAWU, “Oh MAWU, i yami sumal᷊ande, ariewe i yami mate ana waugu nanganu niawan taumata apan tawe na'ola'a pasasal᷊a su saruanni yami. Oh MAWU, I'o buatte na'ola'a apa apan ipaapulu-Nu.”

¹⁵Wua'udde i mangitou nallombotten Yunus sulal᷊ummu tahal᷊oangnga. Ne tandi'a udde nol᷊ote mandi'uṛṛu.

¹⁶Manga mamanaran apalla udde nabbal᷊i lembon matta'uttu MAWU, wuṛṛu napawe su ammarannete, i mangitou nangonggollu sasamba wuṛṛu nangimben al᷊awo'u hatin sasamba su MAWU.

¹⁷Tantal᷊anna udde MAWU napaarantan sambau inassa apan masallakka apan mangalluppa si Yunus. Ne Yunus natana'e sulal᷊ummu tiannu inassa udde tallu allo tallu ṛabbi al᷊annune.