Read Talaud REENGANNA 13 Bible Online

REENGANNA 13 - Talaud bible

REENGANNA 13

¹MAWU nabbisara si Musa,

²“Wuassuapan ṛuangannu Israel pandolokku sangkatou wuassu wallatu manga piaṛṛangnge iapa taṛṛa so'o leta'u Kanaan apan sarun Ta'u ionggola su taumatan Israel.”

³Ana waugu parentan Duata udde, i Musa nandolokki mangitou wuassu wadda'u Paran. I mangitou uddewe manga piaṛṛa'u taumatan Israel: [Ṛuanganna] — [Piaṛangnge] I Ruben — i Syamua ana'i Zakur I Simeon — i Safat ana'i Hori I Yehuda — i Kaleb ana'i Yefune I Isakhar — i Yigal ana'i Yusuf I Efraim — i Hosea ana'i Nun I Benyamin — i Palti ana'i Rafu I Zebulon — i Gadiel ana'i Sodi I Manasye — i Gadi ana'i Susi I Dan — i Amiel ana'i Gemali I Asyer — i Setur ana'i Mikhael I Naftali — i Nahbi ana'i Wofsi I Gad — i Guel ana'i Makhi

¹⁶Eteudde matataṛṛaso'o apan nirolokki Musa iapal᷊inge wanua udde. I Hosea ana'i Nun aranne niwal᷊u Musa nabbal᷊i Yosua.

¹⁷Su tempo i Musa nandolokki mangitou, i tou nananata si mangitou, “Amatte watukku sawannakka, mattuddan wageangngu timukku leta'u Kanaan, ana see nassukka watukku wageangngu wuidda.

¹⁸Innunuete, ereapa wanua udde, tanne tumanangnge manambo ara'e matul᷊u, tanne i mangitou matohassa ara'e lome.

¹⁹Parikisete lai tanne wanua udde mapia ara'e lal᷊eo, wuṛṛu tanne manga tumanangnge uatana'a su manga ampungnga tawe lal᷊indumme ara'e sulal᷊ummu manga soa apan pia tatandangnge.

²⁰Paatammudda naungngu. Ellehete tanne letangnge masuwukka wuṛṛu manambo aaluanne. Arie paabul᷊iane mapul᷊e pangapiddu addio'a manga wuan kalu apan uatuwo poiaroddi.” Su tempo udde panattaṛṛannu anggore mabbua.

²¹Ne manga taumata udde inaite watukku punnu sawannakka wuṛṛu namarikissa wanua udde manattakka wuassu wadda'u Zin su samba'an timukka watukku sawannakka na'oman sara soan Rehob, maranin dal᷊anna watukku Hamat.

²²Paarorone i mangitou inaite su wageangngu timukku wanua udde wuṛṛu na'omate su soan Hebron, atatanaannu manga taumatan Ahiman, Sesai wuṛṛu Talmai, walahanni Enak. I Hebron niapararisikka pitu tonna maṛṛoṛṛoanna wuassu soan Zoan su Mesir.

²³Ana see i mangitou na'omate su wawal᷊annu Eskol. Isudde i mangitou namopotta sandanna wuan anggore apan tumaniten mawakkata, na'oman sara ṛinone pasannanannu ruan katou su alu sambua. I mangitou lai nangapiddu manga pira wuan delima wuṛṛu wuan ara.

²⁴Tampa udde nisaggo Wawal᷊annu Eskol ana waugu ranna wuan anggore apan nipotottu taumatan Israel isudde.

²⁵Napawe buatte namarikissa wanua udde appatu pul᷊o su allone al᷊annune, matataṛṛaso'o udde nabelengke,

²⁶wuṛṛu namasingkatta si Musa, si Harun wuṛṛu anambon ṛuangannu Israel apan tantal᷊anna uaammula su Kades, su wadda'u Paran. I mangitou nabbatti'u sarangkanambone apan buatte niasiloanni mangitou wuṛṛu namasilo manga wua apan uaapidda si mangitou.

²⁷Unni mangitou si Musa, “Yami buatte namarikissa wanua udde wuṛṛu naasilo manungku letangnge ala wuṛṛu masuwukka, wuṛṛu indi addio'a manga wua poiaroddi.

²⁸Arawe tumana'u wanua udde mangkatohassa. Manga soan mangitou wahahewalla wuṛṛu pia tatandangnge. Ana see lai, yami naasilo manga taumata papapulunnu wawalla poiaroddi.

²⁹Taumatan Amalek uatana'a su wageangngu timukku wanua udde; taumatan Het, Yebus wuṛṛu Amori uatana'a su wageangngu wuidda; arawe taumatan Kanaan uatana'a su wageangngu al᷊o'engngu tahal᷊oangnga wuṛṛu su al᷊o'engngu Sal᷊ukku Yordan.”

³⁰Arawe i Kaleb napaatammudu naungngu manga taumata apan sussal᷊iomanna si Musa. Unni Kaleb, “Wanua udde ṛinone pangaloanni ite wuṛṛu aṛṛoanni ite orassa indi lai ana waugu i ite lembon mattohassanna mamaddon mangitou.”

³¹Arawe manga taumata apan nabelengnga suadio'a ringanni Kaleb udde nabbisara, “Tawe, i ite tawe maapangalo si mangitou. Tumana'u soa udde mattohasanna wuassi ite.”

³²Ana see i mangitou nanal᷊iawukken batti'a awusu su ammul᷊annu taumatan Israel su ola'u wanua apan buatte niellehanni mangitou. Unni mangitou, “Wanua udde tumaniten ma'ata'utta, ewe'e lai su tumanangnge sassane. Manga taumata apan niasiloanni yami poiaroddi wahahewalla awangnge.

³³Ewe'e lai yami naasilo manga taumata udde naal᷊ihidda wawalla, eteudde papapulunnu taumatan Enak. Isumandingnga si mangitou, yami uapendamma naal᷊ihidda saṛṛampalanna, wuṛṛu atonna etearoddi sunna mangitou si yami.”