Read Talaud REENGANNA 16 Bible Online

REENGANNA 16 - Talaud bible

REENGANNA 16

¹I Korah ana'i Yizhar wuassu ṛuanganni Kehat, ṛuanganni Lewi, nilumawangnga si Musa. I tou nilal᷊imannu siri tallu wuassu ṛuanganni Ruben, eteudde i Datan wuṛṛu i Abiram manga ana'i Eliab, wuṛṛu i On ana'i Pelet, wuṛṛu lai 250 su atoune piaṛṛangnge apan tinumelengnga nipilen tumana'u wanua.

³I mangitou suadio'a inai sumaruanna si Musa wuṛṛu si Harun ana see nabbisara, “Wotongngete udde, Musa! Taumatan Israel sarangkanambone niṛṛae su MAWU, wuṛṛu MAWU indi su pattangnganni ite sarangkanambone. Arawe anio i'o massunna watangannu mattanggaṛṛanna wuassu MAWU?”

⁴Naaringikka udde, i Musa niumal᷊intudda su leta'a wuṛṛu niumal᷊iomanna su MAWU.

⁵Ana see i tou nabbisara si Korah wuṛṛu mallal᷊aṛṛenggene, “Tiṛṛabbi marua allo MAWU sarun mapal᷊iatta'a si ite isai pussa'a-Ne, wuṛṛu isai apan niṛṛaen Tou. Taumata apan nipile-Ne sarun iwala mangundanin Tou.

⁶Tiṛṛabbi marua allo i'o wuṛṛu manga mallal᷊aṛṛenggenu ṛinone manganu manga tampan putungnga, loṛṛoannu waṛṛan putungnga wuṛṛu amania, wuṛṛu apira'a watukku mezbah. I ite maṛṛadote ma'ellega tanne suwallati ite isai apan buatte nipilen MAWU. Wotongngete udde, ore manga taumatan Lewi!”

⁷

⁸Wua'udde i Musa nabbisara si Korah, “Paddaringikka, ore manga taumatan Lewi!

⁹Apa i yamiu maṛṛingidda manungku indi hatto addio'a manungku Ruatan Israel namile si yamiu wuassu manga taumatan Israel tadea'u i yamiu wotongnge mangundanin Tou, wuṛṛu mammanara su Rasan-Ne, see lai mammanara hunan taumatan Israel wuṛṛu mangimbe si mangitou?

¹⁰I'o, Korah, wuṛṛu anambon taumatan Lewi buatte naasomba aadatta wuassu MAWU — wuṛṛu orassa indi yamiu madorongnga lai mabbal᷊i imam!

¹¹Amungkangngu i'o wuṛṛu manga mallal᷊aṛṛenggenu sumamboṛṛe su saruanni Harun, mangke atonna i yamiu lullawangnga MAWU!”

¹²Ana see i Musa nandolokka nipawaggo si Datan wuṛṛu si Abiram, arawe itarua nabbisara, “Yambua maddiri rumanta!

¹³Taambe nawusa lai i'o nangapiddi yami sinumabbangnga wuassu leta'u Mesir apan masuwukka udde tadea'u mamate si yami su wadda'a indi? Rinonewe i'o mamarenta si yami lai?

¹⁴Mangke atonna i'o tawe nangapiddi yami su leta'a masuwukka, ara'e nangonggolu manga wailla si yami wuṛṛu manga waillu anggore maola'a pussa'a kami! Orassa indi maapulu lai mamahia si yami! Tawe, yami maddiri rumanta!”

¹⁵I Musa mangke nasa'u wuṛṛu nabbisara su MAWU, “MAWU arie manengkamma aonggoli mangitou. Tawe saran paassa i ya'u namaddon sangkatou suwallati mangitou; ewe'e keledai sambau lai ya'u tawe nanganu wuassi mangitou.”

¹⁶Ana see i Musa nabbisara si Korah, “Rantate tiṛṛabbi su Rasannu MAWU suadio'a ringannu 250 mallal᷊aṛṛenggenu. I Harun sarun poiaroddi lai. I yamiu ṛinone mangapiddu tampan putungngu sambau-sambau. Taṛṛoa'e amania sulal᷊umme, ana see onggol᷊a'e su MAWU.”

¹⁷

¹⁸Ne sambau-sambau nanganu tampan putungnge, tinaṛṛoannu waṛṛan putungnga wuṛṛu amania, ana see dirumarisikka su ngaran Dasanna MAWU suadio'a ringanni Musa wuṛṛu i Harun.

¹⁹Wua'udde i Korah nangammulu anambon walahanna, wuṛṛu i mangitou uarisikka uasasaruanni Musa wuṛṛu i Harun su ngaran Dasannu MAWU. Inaṛṛombanganne ṛuanganna naasilo semakku MAWU lullendappa.

²⁰Ana see MAWU nabbisara si Musa wuṛṛu si Harun,

²¹“Soṛṛotte wuassu manga taumata udde; i Ya'u mamate si mangitou orassa indi lai.”

²²Arawe i Musa wuṛṛu i Harun niumal᷊intudda nassubba wuṛṛu nabbisara, “Oh Ruata, tumba'u I'o apan mangngonggolu sasangngo su al᷊awo'a apan biakka. Amungkangngu tumba'u sangkatou apan narosa, apa I'o masa'u lai su anambon ṛuanganna?”

²³MAWU nabbisara si Musa,

²⁴“Doloṛṛa'e manga taumata mangingkatta wuassu manga rasanni Korah, i Datan wuṛṛu i Abiram.”

²⁵Ana see i Musa ringannu tatantalongannu manga piaṛṛa'u Israel, inaite su tampan Datan, wuṛṛu i Abiram.

²⁶I Musa nabbisara su manga taumatan Israel, “Pangingkatte wuassu rasannu manga taumata lal᷊eo indi wuṛṛu imbaṛṛangnga mangeṛṛetta saranapa pussa'a mangitou. Amungkangngu i yamiu tawe maddaringikka, i yamiu sarun pateanna suadio'a ringanni mangitou ana waugu manga rosa mangitou.”

²⁷Ana see manga taumatan Israel nangingkatte wuassu manga rasanni Korah, i Datan wuṛṛu i Abiram. I Datan wuṛṛu i Abiram sinumabbangke wuṛṛu tantal᷊anna uarisikka su ngaran dasannu sangkatou-sangkatou ringannu ana'a awingngi mangitou.

²⁸Ana see i Musa nabbisara, “Ringannu indi yamiu sarun maasingkatta manungku MAWU buatte nandolo'u niapaola'a sarangkanambone indi wuṛṛu manungku udde wal᷊ine apulu'u sassane.

²⁹Amungkangngu manga taumata udde mate ere su inanaramanne, tawe ṛuumanna wuassu Ruata, udde tatialane manungku i ya'u tawe nirolokku MAWU.

³⁰Arawe amungkangngu MAWU na'ola'a sambau apan taambe saran paassa niaringiṛṛanni yamiu al᷊annune indi, wuṛṛu amungkangngu leta'a mawa'a mangalluppa si mangitou suadio'a ringannu al᷊awo'u darotongngi mangitou, na'oman sara i mangitou masutta ta'e wiakka sulal᷊ummu runian taumata nate, i yamiu maasingkatte manungku manga taumata udde nilumawangnga MAWU.”

³¹Tawe nal᷊annu napawe i Musa nuddussa nabbisara, leta'a su al᷊ungngu ledda mangitou nawa'a,

³²wuṛṛu nangalluppa si mangitou ringannu amonanni mangitou see anambon mallal᷊aṛṛenggeni Korah, wuṛṛu al᷊awo'u darotongngi mangitou.

³³Ne i mangitou nawontolle ta'e wiakka sulal᷊ummu runian taumata nate ringannu al᷊awo'u darotongngi mangitou. Leta'a apan nawa'a udde nasooppa apia wuṛṛu i mangitou nawul᷊i-wul᷊i nialluppu runia.

³⁴Anambon taumatan Israel su tampa udde tinumal᷊angnga napawe naaringikka i mangitou mangngintul᷊i “Tal᷊angke! Takka i ite allupannu runia!”

³⁵Ana see MAWU nandantan putungnga nanoṛṛobba 250 su atoune apan nangonggolu sasamba amania udde.

³⁶Ana see MAWU nabbisara si Musa,

³⁷“Doloṛṛa'e i Eleazar ana'i Imam Harun paṛṛoota'a manga tampan putungnga wuassu manga lamben soṛṛobba udde wuṛṛu manal᷊iawukku awune watukku tampa waine, ana waugu tampan putungnga udde susi. Manga saranapa udde eteudde sasamba manga taumata apan buatte niṛṛuumanna nate ana waugu rosane. Manga saranapa udde susi ana waugu buatte nionggola su saruannu MAWU, ana waugu udde ṛinone sassal᷊anna mabbal᷊i passangkul᷊appa manipissa ipangoossa liuddu mezbah. Olangnge udde maola'a pananaunganna su walahannu Israel.”

³⁸

³⁹Ne Imam Eleazar nanganu manga tampan putungnga udde wuṛṛu nandolokku taumata niapasassala mabbal᷊i passangkul᷊appa manipissa ipangoossa liuddu mezbah.

⁴⁰Udde maola'a sambau pananaunganna su walahannu Israel manungku wal᷊ine wuassi Harun, tawe saran sangkatou apan botongnge rumanta watukku mezbah manutungnga amania hunan MAWU. Taumata apan nilumawangnga atoranna udde sarun pateanna ere i Korah wuṛṛu manga mallal᷊aṛṛenggene. Sarangkanambone udde olaanna ere nirolokku MAWU si Eleazar apan nitanata si Musa.

⁴¹Tiṛṛabbine anambon ṛuangannu Israel massa'u si Musa wuṛṛu si Harun. I mangitou nabbisara, “Iraddua buatte namate ṛuangannu MAWU.”

⁴²Tantal᷊anna i mangitou uaammula lullawangnga si Musa wuṛṛu Harun, i mangitou nanaile watukku Rasannu MAWU, wuṛṛu naasilo winabbawa nangoossa Rasanna udde, ana see niasiloante semakku darantan MAWU,

⁴³i Musa wuṛṛu i Harun inaite su saruannu Rasannu MAWU,

⁴⁴ana see MAWU nabbisara si Musa,

⁴⁵“Soṛṛotte wuassu manga taumata udde. I Ya'u sarun mamate si mangitou su tampa indi lai!” Itarua niumal᷊intudda nassubba,

⁴⁶ana see i Musa nabbisara si Harun, “Anute tampan putungngu, wuṛṛu loṛṛoiten waṛṛan putungnga wuassu mezbah wuṛṛu taṛṛoin amania su wowone. Apira'e paal᷊ihakke ringannu ṛuanganna wuṛṛu pa'ola'e lal᷊aghu pangangampunga rosa si mangitou. Paal᷊ihakka! Asasa'u MAWU sinumawudde wuṛṛu al᷊aṛṛusa'itta mannattakke.”

⁴⁷I Harun tinumuṛṛutta wisaran Musa. I tou tinumal᷊angnga su pattangngannu ṛuanganna apan uaammula wuṛṛu mannatakke aarunannu radda'a. Ne i Harun nangaddo amania su wowon waṛṛan putungnga, wuṛṛu na'ola'e lal᷊aghu aampungnga rosa mangitou.

⁴⁸Radda'a udde natta'alla, wuṛṛu i Harun isudde suwallatu manga taumata apan tae wiakka wuṛṛu natete.

⁴⁹Ingana'a nate su tempo udde, 14.700 su atoune, tawe nasutta i mangitou apan nate sulal᷊ummu i Korah namangalo.

⁵⁰Napawe al᷊aṛṛusa'itta udde naddote, i Harun nabelengke apia ringanni Musa su ngaran Dasannu MAWU.