Read Talaud REENGANNA 19 Bible Online

REENGANNA 19 - Talaud bible

REENGANNA 19

¹MAWU nandolokki Musa wuṛṛu i Harun

²iapaonggolu manga atoranna indi su walahannu Israel: Panganute sambau sapi esakka wawine wambul᷊une maṛṛamu apan tawe sangkulle wuṛṛu taambe nipaatta niapapasanna winabbawa.

³Tantil᷊a'e sapi udde si Imam Eleazar. Winatangnga udde ṛinone iapidda su liuddu paddasananna ana see ṛatanna su saruannu imam.

⁴Ana see Imam Eleazar ṛinone manganu addio'a daṛṛan binatangnga udde wuṛṛu iwokka paapitu su Rasannu MAWU.

⁵Ahewallu winatangnga udde, nasutta pisine, ṛemessa, daṛṛa wuṛṛu lal᷊oṛṛon tianne, ṛinone itambunna su saruannu imam.

⁶Wua'udde imam ṛinone manganu addio'a alu aras wuṛṛu tal᷊i maṛṛamu sambua, ana see ituntungnga sulal᷊ummu putungnga apan tantal᷊anna mannutungnga sapi maṛṛamu udde.

⁷Wua'udde imam ṛinone mangukkassa laungnge wuṛṛu mandeno. Wua'udde i tou wotongnge sumutta sulal᷊ummu paddasananna, arawe i tou ta'e ma'arantinna maddatingngu matannallo umattuppa.

⁸Taumata apan nanambunnu sapi udde lai ṛinone mabbansalla laungnge wuṛṛu mandeno; i tou lai ta'e ma'arantinna maddatingngu matannallo umattuppa.

⁹Ana see sangkatou apan tawe ma'arantinna ṛinone mangammulu awun sapi udde wuṛṛu iaddo su tampa apan baresi su liuddu paddasananna. Awu udde iaddo isudde tadea'u ṛuangannu Israel wotongnge mappaatta ipa'ola'a ua'e lal᷊aghun pangangukkassa hunan pamamappassa rosa.

¹⁰Taumata apan mangngammulu awun sapi udde ṛinone mabbansalla laungnge, arawe i tou ma'arantinna maddatingngu matannallo umattuppa. Atoranna udde ipaatta saran mal᷊annu-l᷊annu, mawae su taumatan Israel ara'e lai su taumata raho apan uatana'a namanua su pattangnganni mangitou.

¹¹Taumata apan nangeṛṛetta asuangnga mabbal᷊i ma'arantinna al᷊annune pitu allo.

¹²Su allo atallune wuṛṛu appitu i tou ṛinone mamaresi watanganne ringannu ua'e lal᷊aghu; wakkute udde i tou mawaresi. Arawe amungkangngu su allo atallune wuṛṛu appitune i tou tawe namaresi watanganne, i tou sidutu ma'arantinna.

¹³Taumata apan naeṛṛetannu asuangnga wuṛṛu tawe mamaresi watanganne uddewe ma'arantinna, ana waugu i tou taambe niwokkannu ua'e lal᷊aghu. I tou na'ola'a Rasannu MAWU ma'arantinna wuṛṛu ana waugu udde i tou tate mareengnga su al᷊aṛṛana'u Ruata.

¹⁴Amungkangngu sangkatou nate sulal᷊ummu sambau rasanna, isai-sai apan sulal᷊ummu rasanna udde ara'e sinumutta sulal᷊umme, mabbal᷊i ma'arantinna al᷊annune pitu allo.

¹⁵Anambon bowongnga wuṛṛu urinna apan tawe tataamme lai mabbal᷊i ma'arantinna.

¹⁶Suapan taumata apan naeṛṛetannu asuangngu taumata mate pateanna, ara'e nate sassane su wailla, mabbal᷊i ma'arantinna al᷊annune pitu allo. Aroddi lai taumata apan nangeṛṛetta labbingnga ara'e duṛṛi taumata nate.

¹⁷Su ipamaresi taumata apan ma'arantinna udde, ṛinone manganu awu addio'a wuassu sapi wawine maṛṛamu apan buatte tinambunna ipamappassa rosa. Awu udde ṛinone itaṛṛo sulal᷊ummu sambau urinna, ana see lal᷊inannu ua'e apan nianu wuassu ua'e mangngelekka.

¹⁸Sulal᷊ummu olangnge paaororone, eteudde amungkangngu pia taumata apan paarorone nate sulal᷊ummu rasanna, taumata apan baresi ṛinone manganu sandanna hisop, iammo sulal᷊ummu ua'e udde, ana see mamokka rasanna udde wuṛṛu al᷊awo'u saranapa apan uaraddo sulal᷊umme, wuṛṛu manga taumata isudde lai. Su olangnge aruane, eteudde napawe sangkatou naeṛṛetannu asuangnga, labbingnga ara'e duṛṛin taumata nate, taumata apan baresi udde ṛinone mamokka taumata apan ma'arantinna udde ringannu olangnge apan uasul᷊ungnga lai.

¹⁹I tou ṛinone mamokka su allo atallune wuṛṛu su allo appitune. Su allo appitune udde nasuete lal᷊aghu pangangukkasa taumata apan ma'arantinna udde. Taumata udde ṛinone mabbansalla wuṛṛu mandeno. Manattakka matannalo umattuppa i tou nawaresite.

²⁰Taumata apan nabbal᷊i ma'arantinna wuṛṛu tawe mallaghu pangangukkassa watanganne, sidutu ma'arantinna ana waugu taambe niwokkannu ua'e lal᷊aghu. I tou nanapadda Rasannu MAWU, wuṛṛu tate mareengnga al᷊aṛṛana'u Ruata.

²¹Atoranna udde ipappaatta saran mal᷊annu-l᷊annu. Taumata apan nangalassu ua'e lal᷊aghu udde ṛinone mabbansalla laungnge wuṛṛu taumata apan nawokkannu ua'e udde mabbal᷊i ma'arantinna maddatingngu matannallo umattuppa.

²²Saranapa apan nieṛṛetannu taumata apan ma'arantinna udde mabbal᷊i ma'arantinna lai, wuṛṛu taumata waine apan nangeṛṛetta lai mabbal᷊i ma'arantinna lai maddatingngu matannallo umattuppa.