Read Talaud REENGANNA 21 Bible Online

REENGANNA 21 - Talaud bible

REENGANNA 21

¹Arad eteudde sambau soa su wageangngu timukku wanua Kanaan. Su tempo ratun soa udde naaringikka manungku taumatan Israel nirumanta sumabbi lal᷊annu Atarim, i tou inaite namangalo si mangitou wuṛṛu nanametta siri pira taumata suwallati mangitou.

²Ana see taumatan Israel naddiandi arendi su MAWU, “Amungkangngu I'o mangonggolu aauntungnga si yami su walahanna udde, i mangitou wuṛṛu manga soan mangitou sarun ṛimunsaanni yami sara masue.”

³MAWU nanengkamma darorongngu taumatan Israel wuṛṛu nantul᷊ungngi mangitou namaddon taumatan Kanaan. Ne taumatan Israel namate manga taumatan Kanaan udde see manga soan mangitou, ana see tampa udde nissago mangitou Horma.

⁴Wua'udde taumatan Israel nanantangken Wowon Hor, wuṛṛu nanganu lal᷊anna mattuddan Eṛṛessannu Akaba, tadea'u mamal᷊iwutta wageangngu leta'u Edom. Arawe su tangngan dal᷊anna, walahanna udde niasueannu asasabarene,

⁵wuṛṛu sussamboṛṛete su Ruata wuṛṛu si Musa. I mangitou nabbisara, “Anio I'o nangapiddi yami sinumabbangnga wuassu Mesir? Apa tadea'u mamate si yami su wadda'a indi? Isindi tawe anna, wuṛṛu ua'e lai tawe. Yami nuallen anna apan mal᷊esabba indi!”

⁶Ne MAWU nandantan manga atoanna mawisa su pattangngannu walahanna udde. Manambo taumatan Israel nate niim manga atoanna udde.

⁷Ana see walahanna udde nirumantate sinumaruanna si Musa wuṛṛu nabbisara, “Yami buatte na'ola'a rosa ana waugu sussamboṛṛe su MAWU wuṛṛu si'o. Al᷊iomante su MAWU tadea'u manga atoanna iapaarau wuassi yami.” Ne i Musa niumal᷊iomannu walahanna udde.

⁸Ana see MAWU nandolokki Musa niapal᷊anginnu sambau atoanna wuassu atta'a wuṛṛu niaddo su sambau pati'anna. Suapan taumata apan nipul᷊issu atoanna, sarun mapia amungkangngu maasilo atoanna wuassu atta'a udde.

⁹Ne i Musa na'ola'a atoanna wuassu atta'a wuṛṛu niaddo su sambua pati'anna. Suapan taumata apan nipul᷊issu atoanna, wotongnge mapia amungkangngu ma'ellega atoanna witu'a udde.

¹⁰Taumatan Israel niumamatte apia, ana see naddasante su soa Obot.

¹¹Napawe nanantangken tampa udde, i mangitou naddasanna su lanna'u niahohaṛṛanni Abarim su wadda'a samba'an da'i wuassu wageangngu leta'u Moab.

¹²Wua'udde i mangitou naddasanna su Wawal᷊annu Zered.

¹³Wua'isudde i mangitou inaite lai wuṛṛu naddasanna su samba'an Sal᷊ukku Arnon, su wadda'a apan addone su leta'u taumatan Amori. Sal᷊ukku Arnon udde naola'a passarannu leta'u taumatan Moab wuṛṛu leta'u taumatan Amori.

¹⁴Ana waugu udde sulal᷊ummu ‘Wuken Pangalo MAWU’ uawoṛṛetta: “.... Ampungngu Waheb, su leta'u Sufa wuṛṛu manga wawal᷊anne; Sal᷊ukku Arnon

¹⁵wuṛṛu manga welene apan uawannada maddatingngu leta'u Ar wuṛṛu watukku passarannu leta'u taumatan Moab.”

¹⁶Wua'isudde i mangitou inaite watukku tampa apan isassago Beer, atappasanne manga paṛṛihi. Isudde MAWU buatte nabbisara si Musa, “Doloṛṛa'e ṛuanganna paammul᷊a'a; i Ya'u sarun mangonggolu ua'e si mangitou.”

¹⁷Su tempo udde walahannu Israel mangngantarin antari indi, “Ore manga paṛṛihi, pasabbanga'e ua'enu, yami sarun manal᷊oho ṛingannu antari.

¹⁸Paṛṛihi apan nial᷊i manga matatimmade wuṛṛu manga piaṛṛa'u walahanna nial᷊i ta'innu piaṛṛangnge wuṛṛu ringannu ta'inna tatialan taṛṛino mangitou.” Wuassu wadda'a i mangitou nangingkatte watukku Matana,

¹⁹wuṛṛu wua'isudde watukku Nahaliel, ana see watukku Bamot,

²⁰wua'udde watukku wawal᷊annu leta'u taumatan Moab, su al᷊ungngu puiddu Wowon Pisga apan uasaruanna watukku wadda'a.

²¹Ana see walahannu Israel nandolokku manga daroloṛanna ringanni Sihon, ratun Amori, iapapasingkattu tanata indi,

²²“Wala'awe yami sumabbi su wanuan Tuangnga. Yami wuṛṛu winatangngi yami sarun tawe manewadda wuassu lal᷊anna wuṛṛu tawe sumutta su manga wawail᷊anna ara'e manga waillu anggore ara'e ma'inumma ua'e manga paṛṛihi. Yami sarun tawe manewadda wuassu lal᷊anna wahewalla maddatingngu yami sumabbangnga wuassu wageangngu leta'i Tuangku.”

²³Arawe i Ratu Sihon tawe namalan manga taumatan Israel sumabbi wanuane. I tou nangammulu tantarane ana see inaite watukku Yahas su wadda'a wuṛṛu namangalote taumatan Israel isudde.

²⁴Arawe sulal᷊ummu pangalo udde manambo tantaran Amori nipaten taumatan Israel. Ana see taumatan Israel naapangaṛṛo leta'i mangitou wuassu Sal᷊ukku Arnon maddatingngu Sal᷊ukku Yabok, eteudde passarannu leta'u taumatan Amon, ana waugu passaranna udde matohassa riagane.

²⁵Ringannu aroddi taumatan Israel naapangaṛṛo anambon soa taumatan Amori, nasutta Hesybon wuṛṛu anambon soa maradio'a isudde maranine, ana see i mangitou natana'e isudde.

²⁶Hesybon eteudde soan Datu Sihon. I tou buatte napapangalo ratun Moab wuṛṛu nangaṛṛo letangnge na'oman sara Sal᷊ukku Arnon.

²⁷Ana waugu udde mapapande pia sasanato'a arendi, “Rantate watukku Hesybon, watukku soan Datu Sihon. Yami ma'apulu ma'ellega soa indi iapararisikka wuṛṛu limbakkuanna apia.

²⁸Sambau arariadianna wuassu soa indi tantaran i Sihon namangalo naal᷊ihidda putungnga. Apan nakkimunsa'a soan Ar su Moab, wuṛṛu nanahuanna manga wuidda su al᷊o'engngu Arnon.

²⁹Ore walahannu Moab, i'o nasilakate! Matataṛṛamawu si Kamos, i'o matete! I'o niwalan mongannu mabbal᷊i tumatal᷊angnga, manga wawinenu mabbal᷊i taumata nisamettu ratun Amori.

³⁰Arawe orassa indi natete papapulunni mangitou, su al᷊o'engngu lal᷊anna wuassu Hesybon watukku Dibon, wuassu Nasyim watukku Nofah maranin Medeba.”

³¹Ringannu aroddi walahannu Israel namanuate su wageangngu leta'u taumatan Amori.

³²Wua'udde i Musa nandolokku manga taumata inai maddea'a lal᷊anna apan apianne pamangaloanne soan Yaezer. Ana see taumatan Israel nangaṛṛo soa udde see lai manga soa maradio'a maranine wuṛṛu nallimbuakka taumatan Amori apan uatana'a poiaroddi.

³³Wua'udde taumatan Israel nabbeṛṛo wuṛṛu niumamatte nattudda watukku Basan. Ratun Og wuassu Basan inaite ringannu tantarane mamangalo taumatan Israel su soa Edrei.

³⁴MAWU nabbisara si Musa, “Arie pa'ata'utta si tou. I Ya'u sarun mangonggolu auntunganna si'o. I'o sarun mamaddon tou, anambon tumanangnge wuṛṛu wanuane. Ola'awe i tou ere lai i'o namangalo si Ratun Sihon apan uaparenta su Hesybon.”

³⁵Ne taumatan Israel namaddo wuṛṛu namate si Ratu Og, manga anangnge wuṛṛu anambon tumanangnge; taweddu natantangnga. Wua'udde i mangitou namanuate su wanua udde.