Read Talaud REENGANNA 23 Bible Online

REENGANNA 23 - Talaud bible

REENGANNA 23

¹Unni Bileam si Balak, “Pararisira'e su tampa indi si ya'u pitu mezbah, wuṛṛu saddiaite su tampa indi pitu sapi esakka wuṛṛu pitu domba esakka.”

²I Balak tinumuṛṛutta wisaran i Bileam si tou. Su wowon suapan mezbah udde i mangitou nangonggolu sambau sapi esakka wuṛṛu sambau domba esakka.

³Ana see i Bileam nabbisara si Balak, “Darisikke maranin sasamban Tuangku. Tantal᷊anna udde i ya'u inai ma'ellega tanne MAWU maapulu maisasomba'u ara'e maddiri. I ya'u sarun mamasingkattu al᷊awo'a apan iwisara MAWU si ya'u.” Ne i Bileam inaite sassane watukku puiddu sambau wuidda,

⁴wuṛṛu isudde Ruata nirumanta ringanni tou. Unni Bileam su Ruata, “I ya'u buatte napararisikku pitu mezbah wuṛṛu nangonggolu sambau sapi esakka wuṛṛu sambau domba esakka su wowon manga mezbah udde.”

⁵Ana see MAWU namasingkatta si Bileam wisara apan ṛinone iwal᷊on tou, wuṛṛu nandolokki tou mabelengnga apia ringanni Balak iapapasingkattu tanatan MAWU si tou.

⁶I Bileam nabelengke wuṛṛu naaratingnga i Balak ta'e uarisikka maranin sasamba itattambunna, suadio'a ringannu anambon piaṛṛa'u Moab.

⁷Ana see i Bileam nabbisaran papatta indi, “Wuassu Aram, panenteanna su samba'an da'i poiaroddi, i Balak, ratun Moab namaggo si ya'u, wisarane, ‘Rantate, pabbisarate ana waugu i ya'u. Wontohete walahannu Israel udde!’

⁸Wotongngewe i ya'u mamontoga, amungkangngu Ruata tawe mamontoga? Wotongngewe i ya'u makkuumanna, amungkangngu MAWU tawe makkuumanna?

⁹Wuassu puiddu manga wowone i ya'u ma'asilo si mangitou; wuassu manga wuidda i ya'u ma'ellega si mangitou. Pa'ellega sambau walahanna apan uaṛṛae tawe nasutta su wageangngu walahanna waine.

¹⁰Papapulunni Yakub naal᷊ihidda awu tawe iareengnga; walahannu Israel reenganne tumaniten manambo. Antimanna i ya'u mate ere sangkatou taumata matul᷊idda doronganna papate'u ere papate manga taumata udde.”

¹¹Ana see i Balak nabbisara si Bileam, “Apa sarun olaannu su saruangku? I'o ta'u niapidda iapawontoga manga seetti yami. Arawe i'o ewe'e nangal᷊amatta si mangitou.”

¹²Sasimbakki Bileam, “I ya'u mabbisara wisara apan iapawisara MAWU.”

¹³Ana see i Balak nabbisara si Bileam, “Wette i ite inaite suadio'a watukku tampa waine; wua'isudde i'o wotongnge maasilo tumba'u sambageanganna walahannu Israel. Wontohete i mangitou isudde.”

¹⁴Ne i Balak nangapiddi Bileam watukku wadda'u Zofim, su puiddu wowon Pisga. Isudde lai i tou napararisikku pitu mezbah wuṛṛu nangonggolu sambau sapi esakka wuṛṛu sambau domba esakka su wowon manga mezbah udde.

¹⁵Unni Bileam si Balak, “Atana'e isindi, maranin sasamban Tuangku, tantal᷊anna i ya'u inai maisasomba MAWU isudde.”

¹⁶MAWU naisasomban Bileam wuṛṛu namasingkatta si tou apa sarun iwisarane, ana see nandolokki tou mabelengnga apia ringanni Balak iapapasingkattu tanatan MAWU udde.

¹⁷Ne i Bileam nabelengke wuṛṛu naaratingnga si Balak ta'e uarisikka maranin sasamban tou, suadio'a ringannu manga piaṛṛa'u Moab. I Balak naiwalon wiasara apan buatte niapasingkatu MAWU,

¹⁸ana see i Bileam nabbisaran papatta indi, “Ei, Balak, ana'i Zipor, wette rantate, paddaringikke wisara'u.

¹⁹Ruata tawe ere taumata apan hampa sumassilla wuṛṛu apulune mangngawusu. Amungkangngu Ruata maddiandi i Tou sarun mangatonna! Napawe i Tou mabbisara, udde sarun matipussa!

²⁰I ya'u nirolokka mangal᷊amatta; wuṛṛu amungkangngu Ruata mangal᷊amatta, tawe ta'u aul᷊eanna apia.

²¹Si Yakub tawe nasiloanna al᷊al᷊eo; si Israel tae niasiloanna asasusa, MAWU, Ruata mangitou, uarundinganna si mangitou. I mangitou lullala'a: Tumba'u i Tou Ratu!

²²Ruata apan nangapiddi mangitou sinumabbangnga wuassu Mesir; naal᷊ihidda bantenga mal᷊aṛṛaga i Tou namangalo uasamba'a si mangitou.

²³Tawe daroa apan maaṛṛino si Yakub tawe papasi'atta apan maal᷊ore su Israel. Su ola'u walahanna udde taumata sarun mabbisara, ‘Pa'ellega al᷊aṛṛindu'a apan niola'u Ruata!’

²⁴Walahanna udde naddisikka naal᷊ihidda singa wawine, wuṛṛu uarisikka matul᷊idda naal᷊ihidda singa esakka. I tou tawe lumallowangnga tantal᷊anna taambe niuminassa seenne wuṛṛu ma'inumma daṛṛan binatangnga sasamba apan tinamboanne.”

²⁵Ana see i Balak nabbisara si Bileam, “Pa'uddita'e, amungkangngu i'o maddiri mamontoga walahannu Israel; arawe arie saran paassa mangal᷊amatta si mangitou!”

²⁶Sasimbakki Bileam, “Wal᷊inewe buatte ta'u niwal᷊o si Tuangku manungku i ya'u sarun tumuṛṛutta sarangkanambone apan niparentan MAWU?”

²⁷I Balak nabbisara, “Wette i ite watukku tampa waine. Isai masingkatta Ruata mamalanu mamontoga Israel huna'u su tampa udde.”

²⁸Ne i tou nangapiddi Bileam watukku puiddu Wowon Peor apan uasaruanna wadda'a.

²⁹Unni Bileam si Balak, “Pararisiṛṛa'e mezbah pitu su tampa indi wuṛṛu panaddiate pitu sapi esakka wuṛṛu pitu domba esakka.”

³⁰I Balak tinumuṛṛutta ere su wisaran Bileam. I tou nangonggolu sambau sapi esakka su wowon manga sasamba udde.