Read Talaud REENGANNA 27 Bible Online

REENGANNA 27 - Talaud bible

REENGANNA 27

¹I Zelafehad pia siri lima ana'a wawine, eteudde i Mahla, i Noa, i Hogla, i Milka wuṛṛu i Tirza. Iamangngi Zelafehad eteudde i Hefer, iamangngi Hefer eteudde i Gilead. Iamangngi Gilead eteudde i Makhir, iamangngi Makhir eteudde i Manasye, wuṛṛu iamangngi Manasye eteudde i Yusuf.

²Siri lima ana'i Zelafehad udde inaite sinumaruanna si Musa, wuṛṛu si Imam Eleazar, see manga piaṛṛangnge wuṛṛu anambon taumata apan tantal᷊anna uaammula su ngara maranin Dasannu MAWU. Unni mangitou,

³“Iamangngi yami natete su wadda'a, i tou tawe ana'a esakka. I tou wal᷊ine mallal᷊aṛṛenggeni Korah apan nilumawangnga MAWU. Iamangngi yami udde nate ana waugu rosane sassane.

⁴Arawe anio aranne ṛinone mawul᷊i wuassu walahannu Israel tumba'u ana waugu i tou tawe papapulunna esakka? Yami onggol᷊ewe leta'a pussa'a suadio'a ringannu manga tuṛṛangngu iamangngi yami.”

⁵Ana see i Musa namasingkattu hatto mangitou udde su MAWU,

⁶wuṛṛu MAWU nabbisara si Musa,

⁷“Wisaran manga ana'i Zelafehad udde mangke suṛṛinone. Nariaddi i mangitou onggol᷊eten leta'a pussa'a suadio'a ringannu manga tuṛṛangngu iamangngi mangitou. Pussa'an Zelafehad udde ṛinone itantilla su manga anangnge wawine.

⁸Waloa'e su walahannu Israel manungku amungkangngu sangkatou esakka mate wuṛṛu tawe naasomba ana'a esakka, ne leta'a pussaane itantilla su anangnge wawine.

⁹Amungkangngu i tou tawe ana'a wawine, leta'a pussaane udde itantilla su tuṛṛangnge esakka.

¹⁰Amungkangngu i tou tawe tuṛṛangnga esakka, letangnge udde itantilla su tuṛṛangngi iamangngi tou esakka.

¹¹Amungkangngu i tou tawe tuṛṛangnga esakka, wuṛṛu tawe lai tuṛṛangngu iamangnge esakka, letangnge udde maola'a pussa'an tuṛṛangnga aranianne wuassu ṛuanganne.” Atoranna udde ṛinone tuṛṛutannu taumatan Israel maola'a atorannu tita apan niparentan MAWU si Musa.

¹²MAWU nabbisara si Musa, “Saate watukku Wowon Abarim, wuṛṛu wua isudde pa'ellege leta'a apan Ta'u ionggola su taumatan Israel.

¹³Napawe buatte na'ellega, i'o sarun mate ere iaangngu Harun,

¹⁴ana waugu su wadda'u Zin iraddua buatte nilumawangnga parenta-U. Napawe su Meriba anambon tumanangnge sussamboṛṛe si Ya'u, i yamiu maddiri mapal᷊iatta'u taṛṛino-U su saruanni mangitou su ola'u ua'e udde.” (Arariadianna indi nariaddi su al᷊imatan kua'e Meriba su Kades, su wadda'u Zin).

¹⁵Ana see i Musa niumal᷊iomanna,

¹⁶“Oh, Ruata, apan mangngonggolu wiakka su anambon apan biakka, i ya'u sumal᷊ande, ta'ea'e sangkatou apan botongnge mamiaṛṛa'u walahanna indi;

¹⁷sangkatou apan botongnge maola'a atumannaṛṛane su tempo i mangitou mapapangalo. Arie pabbala'a al᷊aṛṛanang-Ngu indi naal᷊ihidda ammul᷊annu domba apan tawe mallal᷊u'adde.”

¹⁸Unnu MAWU si Musa, “Waggoite i Yosua, ana'i Nun. I tou sangkatou apan pande. Andanga'e limanu su wowon puane.

¹⁹Pararisiṛṛa'e i tou su saruanni Imam Eleazar wuṛṛu anambon balaga. Su saruanni mangitou sarangkanambone i'o ṛinone mamasingkatta manungku i Yosua pinallol᷊ossa si'o.

²⁰Tantil᷊a'e si tou sambageanganna wuassu taṛṛinonu, tadea'u ṛuangannu Israel maddaringikka si tou.

²¹I Yosua ṛinone maddorongnga tatantiro wuassi Imam i Eleazar, wuṛṛu i Eleazar ṛinone maiwal᷊on apulu-U ringannu mappaattu Urim wuṛṛu Tumim. Ringannu olangnge udde i Eleazar mamiaṛṛa'i Yosua wuṛṛu ahewallu walahannu Israel su al᷊awo'u hatto apan saruananni mangitou.”

²²I Musa tinumuṛṛutta ere buatte nirolokku MAWU si tou. I tou napararisikki Yosua su saruanni Imam Eleazar wuṛṛu su anambon balaga.

²³Ana see i tou nangandangngu limane su wowon puan Yosua wuṛṛu namasingkatta manungku i Yosua pinallol᷊ossa si tou, ere buatte niwal᷊on MAWU si tou.