Read Talaud REENGANNA 29 Bible Online

REENGANNA 29 - Talaud bible

REENGANNA 29

¹Su allo paarorone wul᷊anna appitune i yamiu ṛinone ma'ola'a ammulu patataṛṛamawu, wuṛṛu tawe wotongnge mammanara manara mawakkata. Su allo udde manga trompeta ṛinone iapatuntingikka.

²Onggol᷊a'e su MAWU sasamba itattambunna eteudde sambau sapi esakka wakku, sambau domba esakka, wuṛṛu pitu ana'u domba esakka uukke santonna, sambau-sambau tawe sangkule. Hal᷊urun sasamba udde ma'al᷊uassa naungngu MAWU.

³Onggol᷊a'e lai sasamba ia'imbe apan ṛinone olaanna, eteudde taponna lo'annu lanan zaitun; tatallu su kilone su sapi esakka, darua su kilone su domba esakka,

⁴wuṛṛu sangkilo su sambau ana'u domba.

⁵Onggol᷊a'e lai sambau ambinga esakka maola'a sasamba ipangampungnga rosa. Ringannu olangnge udde i yamiu na'ola'a lal᷊aghu pamamappassa rosan taumata.

⁶Manga sasamba udde maola'a sasamba itattambunna apan ionggola suadio'a ringannu sasamba ia'imbene, su allo paarorone suapan bul᷊anna. See lai maola'a tatambane su sasamba itattambunna mamiallo apan ionggola suadio'a ringannu sasamba ia'imbe wuṛṛu sasamba ua'en anggore. Hal᷊urun sasamba itattambunna udde ma'al᷊uassa naungngu MAWU.

⁷Su allo appul᷊one wul᷊anna appitune i yamiu ṛinone ma'ola'a ammulu patataṛṛamawu. Su allo udde i yamiu ṛinone mappuasa wuṛṛu tawe wotongnge mammanara.

⁸Onggol᷊a'e su MAWU sasamba itatambunna eteudde sambau sapi esakka wakku, sambau domba esakka uukke santonna, sambau-sambau tawe angngone. Hal᷊urun sasamba udde ma'al᷊uassa naungngu MAWU.

⁹Onggol᷊a'e sasamba ia'imbe apan nitantunna, eteudde taponna nilo'annu lanan zaitun: tatallu su kilone su sapi esakka, darua su kilone su domba esakka,

¹⁰wuṛṛu sangkilo su sambau ana'u domba.

¹¹Onggol᷊a'e lai ambinga esakka sambau hunan lal᷊aghu pangangampungnga rosan taumata, wal᷊ine wuassu sasamba ipangampungnga rosa wuṛṛu sasamba itattambunna mamiallo see lai sasamba ia'imbe wuṛṛu sasamba ua'en anggore apan nionggola su allo udde.

¹²Su allo mapul᷊o l᷊ima wul᷊anna appitune i yamiu ṛinone ma'ola'a ammulu patataṛṛamawu, wuṛṛu tawe wotongnge mammanara mawakkata. Al᷊annune pitu allo i yamiu ṛinone ma'ola'a ramea ipangaddata MAWU.

¹³Su allo paarorone onggol᷊a'e su MAWU sasamba itattambunna eteudde mapul᷊o tallu sapi esakka wakku, darua domba esakka wakku, wuṛṛu mapul᷊o appata ana'u domba esakka uukke santonna, sambau-sambau tawe sangkule. Hal᷊urun sasamba udde ma'al᷊uassa naungngu MAWU.

¹⁴Onggol᷊a'e lai sasamba ia'imbe apan nitantunna eteudde taponna nilo'annu lanan zaitun; tatallu su kilone su sapi esakka sambau,

¹⁵darua su kilone su ana'u domba sambau. Suadio'a ringannu sasamba ia'imbe udde ṛinone ionggola lai sasamba ua'en anggore apan pappandumanna.

¹⁶Wal᷊ine wua'udde onggol᷊a'e lai sambau ambinga esakka maola'a sasamba aampungnga rosa. Sasamba udde maola'a tatambane su sasamba itattambunna mamiallo wuṛṛu sasamba ua'e anggore.

¹⁷Su allo aruane onggol᷊a'e lai mapul᷊o dua sapi esakka saṛṛentumuwo, darua domba esakka, wuṛṛu mapul᷊o dua ana'u domba esakka uukke santonna, sambau-sambau tawe sangkule.

¹⁸Onggol᷊a'e lai suadio'a ringannu udde anambon sasamba waine ere lai pappandumanna su allo paarorone.

²⁰Su allo atallune onggol᷊a'e mapul᷊o assa sapi esakka saṛṛentumuwo, darua domba esakka, wuṛṛu mapul᷊o appata ana'u domba esakka uukke santonna, sambau-sambau tawe sangkule.

²¹Onggol᷊a'e suadio'a ringannu udde anambon manga sasamba waine ere lai pappandumanna su allo paarorone.

²³Su allo aiappanne onggol᷊a'e mapul᷊o sapi esakka saṛṛentumuwo, darua domba esakka, wuṛṛu mapul᷊o appata ana'u domba esakka uukke santonna, sambau-sambau tawe sangkule.

²⁴Suadio'a ringannu udde onggol᷊a'e lai manga sasamba waine ere pappandumanna su allo paarorone.

²⁶Su allo al᷊imane onggol᷊a'e sio sapi esakka saṛṛentumuwo, wuṛṛu domba esakka darua, wuṛṛu mapul᷊o appata domba esakka anangnge uukke santonna, sambau-sambau tawe sangkule.

²⁷Suadio'a ringannu udde onggol᷊a'e lai anambon manga sasamba waine ere pappandumanna su allo paarorone.

²⁹Su allo aiannumme onggol᷊a'e ual᷊u sapi esakka saṛṛentumuwo, darua domba esakka, mapul᷊o appata domba esakka anangnge uukke santonna, sambau-sambau tawe sangkule.

³⁰Suadio'a ringannu udde onggol᷊a'a lai anambon manga sasamba waine ere lai pappandumanna su allo paarorone.

³²Su allo appitune onggol᷊a'a pitu sapi esakka saṛṛentumuwo, darua domba esakka, mapul᷊o appata domba esakka anangnge uukke santona, sambau-sambau tawe sangkule.

³³Suadio'a ringannu udde onggol᷊a'a lai anambon manga sasamba waine ere pappandumanna su allo paarorone.

³⁵Su allo aual᷊une i yamiu ṛinone ma'ola'a ammulu patataṛṛamawu wuṛṛu tawe wotongnge mammanara manara mawakkata.

³⁶Onggol᷊a'e su MAWU sasamba itattambunna eteudde sambau sapi esakka saṛṛentumuwo, sambau domba esakka, wuṛṛu pitu domba esakka anangnge uukke santonna, sambau-sambau tawe sangkule. Hal᷊urun sasamba udde ma'al᷊uassa naungngu MAWU.

³⁷Suadio'a ringannu udde onggol᷊a'a lai anambon manga sasamba waine ere pappandumanna su allo paarorone.

³⁹Eteudde manga atoranna su ola'u sasamba itattambunna, sasamba ia'imbe, sasamba ua'en anggore, see sasamban paddarame apan ṛinone ionggoli yamiu su MAWU su manga rameanu apan buatte nitantunna. Manga sasamba udde maola'a tatambane su manga sasamba apan ionggoli yamiu ipamaekka riandi ara'e sasamba apulun naungnga.

⁴⁰I Musa namasingkatta su walahannu Israel sarangkanambone apan nirolokku MAWU si tou.