Read Talaud REENGANNA 35 Bible Online

REENGANNA 35 - Talaud bible

REENGANNA 35

¹Su ratakku Moab, su wiwikku Sal᷊ukku Yordan, maranin soan Yerikho, MAWU nabbisara si Musa,

²“Wal᷊oa'a su walahannu Israel manungku wuassu leta'a pussa'a apan sarun sengkamanni mangitou, manga pira soane ringannu wadda'u nannal᷊o maranine ṛinone ionggoli mangitou su taumatan Lewi tadea'u i mangitou wotongnge matana'a isudde.

³Manga soa udde mabbal᷊i pussa'an taumatan Lewi maola'a tampaa tatanaanni mangitou. Wadda'u nannal᷊o maranine udde maola'a wiakku winatangnga papadul᷊iannanni mangitou.

⁴Wadda'u nannal᷊o udde ahewalle 450 su meterene uawannada watukku al᷊awo'u tampa, niuuṛṛanna wuassu darandungu soa.

⁵Nariaddi wageangngu taumatan Lewi letangnge uataṛṛa wu'u appata, uuṛṛanne 900 su meterene su al᷊o'engngu sandiṛṛanne.

⁶Su taumatan Lewi yamiu ṛinone mangonggolu annumma soa pattillumanna maola'a tampa tatal᷊angannu manga taumata apan ringannu tawe nipatatudda buatte namate taumata waine. Wal᷊ine wua'udde lai taumatan Lewi ṛinone onggol᷊annu appatu pul᷊o dua soa waine lai

⁷ringannu wadda'u nannal᷊one. Nariaddi sarangkanambone pia appatu pul᷊o ual᷊u soa taumatan Lewi.

⁸Reengannu manga soan Lewi sulal᷊ummu wageangngu sambau-sambau ṛuangannu Israel ṛinone itantunna tumuṛṛutu anambon soa wuṛṛu ahewallu leta'a udde.”

⁹MAWU nandolokki Musa

¹⁰niapawal᷊o su walahannu Israel manga wisara indi, “Napawe i yamiu buatte nilumewessa Sal᷊ukku Yordan wuṛṛu sumuttate su wanua Kanaan,

¹¹i yamiu ṛinone manantunnu manga pattillindumanna, tadea'u manga taumata apan ringannu tawe nipattatudda namate taumata waine, wotongnge tumal᷊angnga isudde.

¹²Su manga soa udde taumata sarun matammuda wuassu manga tuṛṛangngu taumata nipate apan ma'apulu mabbal᷊issa. Ana waugu taumata apan niansilanna namate taumata waine tawe wotongnge pateanna amungkangngu hattone taambe niparikisanna su mallaṛṛuungngu awada'alla.

¹³Tantuna'e annumma soa pattillindumanna,

¹⁴tatallu su samba'an da'i Sal᷊ukku Yordan wuṛṛu tatallu lai su leta'u Kanaan.

¹⁵Annumma soa udde mabbal᷊i soa pattillindummanni yamiu, taumatan Israel, wuṛṛu su taumata raho ara'e apan uatana'a suwallati yamiu. Isai-sai apan buatte namate taumata waine ringannu tawe nipattatudda, wotongnge tumal᷊angngu watanganne suwallatu sambau soa udde.

¹⁶Arawe amungkangngu sangkatou nappaattu ahidda atta'a ara'e watu ara'e alu ipamate taumata waine, taumata udde taṛṛa pate; i tou nassal᷊a wuṛṛu ṛinone iṛṛuumanna pateanna.

¹⁹Manga tuṛṛangnga maranine wuassu taumata apan nipate udde wotongnge mapaamattu ṛuumanna pateanna udde. Amungkangngu i tou nasangkala iapa namate udde, i tou wotongnge mamate taumata udde.

²⁰Amungkangngu sangkatou maddantinnu taumata waine, ana see namate taumata udde ringannu niwal᷊atta ara'e nanuntungngu sambau saranapa si tou,

²¹ara'e nango'a taumata udde, ne taumata udde taṛṛa pate; i tou nassal᷊a wuṛṛu ṛinone iṛṛuumanna pateanna. Manga tuṛṛangnge marani wuassu taumata apan niapate udde wotongnge mapaamattu ṛuumannu pamamate udde. Amungkangngu i tou naasangkala taṛṛa pate udde, i tou wotongnge mamate taumata udde.

²²Arawe wotongnge mariaddi sangkatou ringannu tawe nipattatudda namate taumata waine apan tawe ipaddantinne, tanne ringannu namal᷊attu taumata udde ara'e ringannu nanuntungngu sambau saranapa si tou.

²³Ara'e wotongnge mariaddi sangkatou ringannu tawe naasilo, nangema'u sambau watu na'oman sara taumata waine nate arawe taumata udde wal᷊ine seenne, wuṛṛu i tou tawe pandumma lai mandal᷊eo taumata udde.

²⁴Sulal᷊ummu manga hatto ereudde ammul᷊annu ṛuanganna ṛinone makkungngu taumata apan buatte namate, wuṛṛu taumata apan maapulu mabbal᷊issa papaten taumata apan natete.

²⁵Ammul᷊annu ṛuanganna ṛinone manamba'a taumata apan buatte namate ringannu tawe nipattatudda su saruannu wawansagu manga tuṛṛangngu apan nipate. Taumata udde ṛinone iapidda apia watukku soa pattillindumanne, su tampa i tou tinumal᷊angngu watanganne. I tou ṛinone matanaa isudde ma'oman sara taumata apan su tempo udde nabbal᷊i Imam Bahewalla natete; wua'udde i tou wotongngete mapul᷊e watukku ampungnga atatanaanne. Arawe amungkangngu i tou nate su soa pattillindumanna su tampa i tou tinumal᷊angngu watanganne, ana see niasangkal᷊anna wuṛṛu nipaten tuṛṛangngu taumata apan natete, ne ola'u pabbawal᷊issa udde wal᷊inewe pamamate.

²⁹Manga atoranna udde hunane si yamiu wuṛṛu su papapulunnu, su al᷊awo'u tampa i yamiu uatana'a.

³⁰Sulal᷊ummu hatton pamamate, taumata apan niansil᷊anna namate, tumba'u wotongnge iapaasal᷊a wuṛṛu iṛṛuumanna pateanna amungkangngu inolaanna udde wotongnge iapasingkatu ruan katou matatiala ara'e nilumebbe. Sangkatou matatiala taambe apangimananna manungku aansilla udde atonna.

³¹Sangkatou taṛṛa pate ṛinone iṛṛuumanna pateanna. I tou tawe wotongnge maawaekka ṛuumanna udde ringannu roitta.

³²Amungkangngu pia sangkatou tinumal᷊angnga watukku sambau soa pattillindumanna, imbaṛṛangnga mamalan tou mangonggolu roitta tadea'u i tou mapul᷊e su wal᷊ene tantal᷊anna Imam Bahewalla taambe nate.

³³Amungkangngu inolaanni yamiu aroddi, yamiu mandal᷊eo leta'a apan wawanuanni yamiu. Pamamate maal᷊al᷊eo wanua; nariaddi tawe dal᷊anne waine ipamaresi wanua udde tumba'u ringannu manawutta niawan taṛṛa pate udde.

³⁴Ariewe mandal᷊eo leta'a apan wawanuanni yamiu, ana waugu ete i Ya'u MAWU, wuṛṛu i Ya'u uatana'a su pattangngannu walahannu Israel.”