Read Talaud REENGANNA 4 Bible Online

REENGANNA 4 - Talaud bible

REENGANNA 4

¹MAWU nandolokki Musa wuṛṛu i Harun

²niapareengngu taumatan Lewi wuassu ṛuanganni Kehat tumuṛṛuttu amonanne sambau-sambau,

³ana see namoṛṛettu arannu anambon esakka apan uukke tallun pul᷊o maddatingngu liman pul᷊o, apan botongnge mammanara su Rasannu MAWU.

⁴Manara mangitou eteudde mallu'adda manga saranapa apan lembon na'ukassa.

⁵MAWU nangonggola si Musa manga atoranna indi: Amungkangngu nia'omante tempone manggohakku paddasananna, i Harun wuṛṛu al᷊aṛṛanangnge ṛinone sumutta su Rasannu MAWU, manossokku pampele su saruannu Wantallu Pa'aire, wuṛṛu manaappu mal᷊aṛṛenessa su Wantalla udde.

⁶Wua'udde, i mangitou ṛinone manaappa apia ringannu sangkul᷊appa pisi al᷊ussa, ana see mamataddu sangkul᷊appa mal᷊aṛṛenessa ma'elomma su wowone, wuṛṛu manuṛṛin alu papasannu Wantalla udde.

⁷I mangitou ṛinone mamataddu sambau mal᷊aṛṛenessa ma'elomma su wowon medda tampan doti ia'imbe su MAWU, wuṛṛu su wowon medda udde ṛinone i mangitou mangandangngu lama'a, baki pangadoannu amania, baki tampan sasamba, wuṛṛu wotolla pangadoannu sasamba ua'e anggore. Roti ia'imbe ṛinone sidutu uarandangnga su medda udde.

⁸I mangitou ṛinone manaappa sarangkanambone udde ringannu sambau mal᷊aṛṛenessa maṛṛamu, ana see mamataddu sangkul᷊appa pisi al᷊ussa su wowone, wuṛṛu manuṛṛin alu papasannu medda udde.

⁹I mangitou ṛinone manganu sambau mal᷊aṛṛenessa ma'elomma wuṛṛu ipanaappa leddan sol᷊o see lai manga sol᷊one, wuṛṛu mamaresi sumbun sol᷊o wuṛṛu panuṛṛianne, wuṛṛu anambon tampan lanan zaitun.

¹⁰Leddan sol᷊o wuṛṛu manga saranapane ṛinone pi'unanni mangitou ringannu sangkul᷊appa pisi al᷊ussa ana see iandangnga su tampa pamasanananne.

¹¹Wua'udde i mangitou ṛinone mamataddu sangkul᷊appa mal᷊aṛṛenessa ma'elomma su wowon mezbah wuassu wul᷊awanna udde, wuṛṛu taapannu sangkul᷊appa pisi al᷊ussa, ana see manuṛṛin alu papasannu mezbah udde.

¹²Al᷊awo'u saranapa apan ipappaatta sulal᷊ummu Wabbo'a Na'ukkassa ṛinone anuanni mangitou wuṛṛu piunannu mal᷊aṛṛenessa ma'elomma. Ana see i mangitou ṛinone manaappu sangkul᷊appa pisi al᷊ussa, wuṛṛu iandangnga su pamasannananna.

¹³I mangitou ṛinone mamaresi mezbah udde wuassu awu, ana see mamataddu mal᷊aṛṛenessa ungu su wowone.

¹⁴Wuṛṛu su wowone udde ṛinone iandangngi mangitou anambon saranapa apan ipappaatta sulal᷊ummu patataṛṛamawu su mezbah udde; tampan putungnga, saṛṛampanga, sasondo, wuṛṛu pangukasanna lima. Ana see i mangitou ṛinone manaapa sarangkanambone udde ringannu sangkul᷊appa pisi al᷊ussa wuṛṛu manuṛṛin alu papasannane.

¹⁵MAWU nabbisara si Musa wuṛṛu si Harun, “Su tempo i yamiu manggohakku paddasananna, i Harun wuṛṛu al᷊aṛṛanangnge ṛinone sumutta sulal᷊ummu Rasang-Ku wuṛṛu manaappa anambon saranapa wuṛṛu aolangnge apan uaraddo isudde. Napawe wua'udde, manga taumatan Kehat wotongngete rumanta mamasanna. Arawe tawe wotongnge i mangitou ma'ellega, mangundani ara'e mangindinga manga saranapa udde, ana waugu buatte niṛṛae huna-U. Amungkangngu udde olaanni mangitou lai, i mangitou sarun mate. Nariaddi tadea'u manga taumatan Kehat udde tawe mapappassa wuassu ṛuanganni Lewi, i Harun wuṛṛu al᷊aṛṛanangnge ṛinone mapamanaran sangkatou-sangkatou su wallati mangitou apan ṛinone iapiddi mangitou. Eteudde manaran taumatan Kehat su tempo Rasang-Ku iingkatta. I Eleazar ana'i Harun, uariaga ahewallu Rasang-Ku, lanan sol᷊o, amania, sasamba gandumma ia'imbe mamiallo, lanan lal᷊aghu wuṛṛu sarangkanambone apan uaraddo sulal᷊ummu Rasangku udde.”

²¹MAWU nandolokki Musa

²²niapareengngu taumatan Lewi wuassu ṛuanganni Gerson tumuṛṛuttu amonannu sambau-sambau.

²³I Musa ṛinone mamoṛṛettu anambon arannu taumata esakka apan uukke tallun pul᷊o maddatingngu liman pul᷊o su tonnane apan botongnge mammanara su Rasannu MAWU.

²⁴I mangitou niapamanara mamasanna manga saranapa indi:

²⁵Mal᷊aṛṛenessa atuppu Rasanna udde ringannu tataamme su wageangngu lal᷊umme wuṛṛu wageangngu liudde wuassu pisi al᷊ussa, mal᷊aṛṛenessa su ngaran Dasanna,

²⁶manga senggota wuṛṛu tal᷊ine ipaatta su panumbal᷊e uapal᷊iwutta Rasanna wuṛṛu pangangadoannu sasamba, mal᷊aṛṛenessa su ngaran panumbal᷊e, wuṛṛu al᷊awo'u aola'a apan ipaatta panuṛṛiannu anambon saranapa udde. I mangitou uariaga su anambon manara apan pia aukka ringannu manga saranapa udde.

²⁷I Musa wuṛṛu i Harun ṛinone uariaga tadea'u manara apan tinantilli Harun wuṛṛu al᷊aṛṛanangnge su manga taumatan Gerson udde manaranna, wuṛṛu anambon saranapa apan iapidda, ṛinone ṛootanna.

²⁸Eteudde manaran manga taumatan Gerson sulal᷊ummu Rasanna; manga manara udde ṛinone manaranna su al᷊ungngu piaṛṛa'i Itamar, ana'i Imam Harun.

²⁹MAWU nandolokki Musa niapareengngu taumatan Lewi wuassu amonanne Merari tumuṛṛuttu amonanna sambau-sambau.

³⁰I Musa ṛinone mamoṛṛettu arannu anambon taumata esakka apan uukke tallun pul᷊o su tonnane maddatingngu liman pul᷊o su tonnane apan botongnge ma'ola'a manara su Rasannu MAWU.

³¹I mangitou niapamanara maṛṛootta manga aola'u Rasanna udde, manga sal᷊aba'une, manga diṛṛine wuṛṛu apampakke.

³²See lai manga diṛṛin rallakka uapal᷊iwutta udde, wuṛṛu apampakke, manga pati'anna wuṛṛu tal᷊ine ringannu al᷊awo'u saranapa apan pappandumanna ipandarisikku Rasanna udde. Suapan taumata niapamanara mangapiddu saranapa apan buatte nitantunna.

³³Eteudde manga manaran amonanni Merari; anambon manaran mangitou su Rasannu MAWU ṛinone olaanna su al᷊ungngu piaṛṛa'i Itamar, ana'i Imam Harun.

³⁴Wuassu parentan MAWU, i Musa, i Harun wuṛṛu manga piaṛṛa'u ṛuanganna na'ola'a pandareengnga su tatallu ṛuanganna sulal᷊ummu ṛuanganni Lewi, eteudde i Kehat, i Gerson, i Merari. I mangitou nandeengnga wuassu amonanna maddatingngu amonanna. I mangitou namoṛṛettu arannu anambon taumata esakka apan uukke tallun pul᷊o maddatingngu liman pul᷊o su tonnane apan ta'e wotongnge mappaamattu manara su Rasannu MAWU. Eteindi reenganne: [Ammonanne] — [Anambone] I Kehat — 2.750 I Gerson — 2.630 I Merari — 3.200 Sarangkanambone: — 8.580

⁴⁹Wuassu parentan MAWU si Musa, suapan taumata iwoṛṛetta wuṛṛu onggol᷊annu manarane sangkatou-sangkatou su ola'u apa apan sarun iimbene ara'e apa apan ṛinone pasannananne.