Read Talaud REENGANNA 5 Bible Online

REENGANNA 5 - Talaud bible

REENGANNA 5

¹MAWU nabbisara si Musa,

²“Onggol᷊a'e parenta indi su taumatan Israel; Anambon taumata apan pia radangnge su pisi apan ma'al᷊iu, ara'e radda'u esakka, ara'e buatte namita asuangnga, ṛinone iapasabbangnga wuassu paddasanannu taumatan Israel.

³I mangitou ṛinone iapasal᷊iu, tadea'u tawe mamarantinna paddasananna, suapa i Ya'u uatana'a suadio'a ringannu walahanna-Ku.”

⁴Taumatan Israel tinumuṛṛutta parenta udde, wuṛṛu napasabbangngu anambon taumata apan ereudde wuassu paddasananna.

⁵MAWU nangonggola si Musa

⁶manga atoranna indi su taumatan Israel; Amungkangngu sangkatou tawe tumuṛṛutta MAWU ringannu na'ola'a pasasal᷊a su taumata waine,

⁷taumata udde ṛinone manga'u rosane wuṛṛu mamaekka ringannu sara mallunassa, tambannu daruan pul᷊o porsenna lai wuassu aregane, su taumata apan nirugianne.

⁸Arawe amungkangngu taumata apan niarugianne udde natete ara'e tawe tuṛṛangnge marani, ne tatubbussa udde ṛinone ionggola su MAWU, wuṛṛu maola'a wageangngu imam. Tatubbussa udde tawe nasutta domba esakka su ipallaghu pamamappassa rosan taumata apan nassal᷊a udde.

⁹Wuassu al᷊awo'u saranapa apan nionggolu taumatan Israel su MAWU, sasambane apan niṛṛae udde maola'a wageangngu imam apan nanengkamma aonggola udde.

¹⁰Apa apan nionggolu sangkatou su MAWU, maola'a wageangngu taumata udde sassane. Tumba'u apa apan tinantilli tou su sangkatou imam, maola'a wageangngu imam udde.

¹¹MAWU nandolokki Musa

¹²mangonggollu manga atoranna indi su taumatan Israel. Wotongnge mariaddi sangkatou esakka mallu'adda awingnge. I tou massunna manungku awingnge udde tawe tumuṛṛutta si tou wuṛṛu buatte nandal᷊eo watanganne ana waugu natatamban ringannu esakka wal᷊ine. Arawe esakka udde tawe naatantunna, ana waugu inolaanna udde niola'u awingnge ringannu ma'imbuni; tawe matatialane, wuṛṛu i tou tawe niasametanna. Ara'e wotongnge mariaddi sangkatou esakka mallu'adda awingnge, sumbal᷊i awingnge udde maddirin esakka wal᷊ine.

¹⁵Sulal᷊ummu darua inolaana udde, esakka udde ṛinone mangapiddu awingnge ringannu imam. I tou lai ṛinone mangapiddu sasamba hunan pandumma udde, eteudde sangkilo taponnu gandumma. Taponna udde tawe wotongnge lal᷊inannu lanan zaitun ara'e sal᷊iawuṛṛannu amania, ana waugu maola'a sasamban pallal᷊u'adda wuṛṛu pandumanne ipattiala manungku esakka pia naungnga mallu'adda awingnge.

¹⁶Imam ṛinone mandolokku wawine udde su saruannu mezbah wuṛṛu dumarisikka sumaruanna MAWU.

¹⁷Ana see imam ṛinone manganu sambau mangko leta'a wuṛṛu mallal᷊innu addio'a ua'e na'ukkassa sulal᷊umme. Wua'udde i tou ṛinone manganu awu addio'a wuassu apampakku Rasannu MAWU wuṛṛu itaṛṛo sulal᷊ummu ua'e udde.

¹⁸Wua'udde i tou ṛinone mamu'a uta'u wawine udde, wuṛṛu mantaṛṛo taponna sasamba pallal᷊u'adda su limane, wuṛṛu lai imam sassane uaagassa ua'e mapetta apan mandatan awawontoga.

¹⁹Wua'udde imam ṛinone mabbisara sasalu wuṛṛu maddorongnga wawine udde umire. Imam ṛinone mabbisara, “Amungkangngu i'o tawe sinumandaga, i'o tawe aṛṛinoannu wontoga apan niaparantan ua'e indi.

²⁰Arawe amungkangngu i'o buatte sinumandaga,

²¹sal᷊andeanna MAWU ma'ola'a arannu mabbal᷊i sasalun wontoga su wallattu walahannu. Antimanna i Tou ma'ola'a punnu palangngu maaṛṛiunnudda wuṛṛu tiannu maggandalla.

²²Ua'e apan mandantan awawontoga udde sarun sumutta sulal᷊ummu tiannu wuṛṛu mabbal᷊i maggandalla tiannu wuṛṛu punnu palangngu maaṛṛuangkinna.” Wawine udde ṛinone sumimbakka, “I ya'u maapulu, antimanna MAWU ma'ola'a aroddi.”

²³Ana see imam ṛinone mamoṛṛettu wontoga su suratta lal᷊ulunanna wuṛṛu pappasannu ua'e mapetta udde.

²⁴Imam mandolokku wawine udde ma'inumma ua'e mapetta apan mandantan bontoga udde. Napawe inumanna, ua'e udde pendamanna maataddu'a.

²⁵Imam ṛinone manganu sasamba taponna udde, wuṛṛu itoggokka su saruannu MAWU, wua'udde iapidda su mezbah.

²⁶Ana see i tou ṛinone manganu sangkangkumma taponna maola'a tatialane manungku anambon taponna buatte nionggola, ana i tou nanambuna su mezbah. Panginsueanne ua'e udde niapa'inumma su wawine udde.

²⁷Unnu wisara wawine udde buatte sinumandaga, ua'e udde mangke maataddu'a si tou; tianne maggandalla wuṛṛu punnu palangnge maaṛṛuangkinna. Aranne sarun maola'a sasalun bontoga sulal᷊ummu walahanne.

²⁸Arawe unnu wisara i tou tawe nassal᷊a, i tou tawe aṛṛinoannu wontoga wuṛṛu i tou ta'e wotongnge maasomba ana'a.

²⁹Etearoddi atoranne amungkangngu sangkatou esakka mallu'adda pia sunna lal᷊eo manungku awingnge nassal᷊a amatta wuṛṛu nandal᷊eo watanganne. Esakka udde ṛinone mangapiddu awingnge ringannu MAWU wuṛṛu imam ṛinone mangapiddu atoranna udde si tou.

³¹Esakka udde nal᷊iute wuassu pasasal᷊a, arawe awingnge, amungkangngu nasemakke i tou nassal᷊a, ṛinone mamasanna pangillul᷊eanne.