Read Talaud REENGANNA 6 Bible Online

REENGANNA 6 - Talaud bible

REENGANNA 6

¹MAWU nandolokki Musa

²mangonggolu manga atoranna indi su taumatan Israel. Suapan taumata esakka ara'e wawine apan naddiandi mabbiakka hunan MAWU sassane maola'a sangkatou nazir,

³tawe wotongnge ma'inumma ua'e anggore ara'e ua'e maawu'anna apan niola'a wuassu wuan anggore ara'e manga wua waine. I tou tawe wotongnge umanna wuan anggore wakku ara'e mamarate, ara'e sarangkanambone apan niola'a wuassu alu anggore; watune ara'e lal᷊uwone lai tawe wotongnge i tou umanna.

⁵Su al᷊annune tempo pa'airene i tou tawe wotongnge mamol᷊o uta'a ara'e mangiṛṛi. Su al᷊annune udde uta'a wuṛṛu omengnge ṛinone iwalan tou tuttuwo mal᷊o'engnga. I tou aagasannu riandine maddatingngu tempo pananantillu watanganne udde su MAWU mal᷊iudda.

⁶Utangnge udde maola'a sambau tatiala manungku i tou niṛṛae hunan Duata. Su al᷊annune riandine udde, i tou tawe wotongnge mandal᷊eo watanganne; imbaṛṛangnga mangundani winal᷊unanna, salaiwe udde winal᷊unannu iamangnge, inangnge, ara'e tuṛṛangnge.

⁸Su al᷊annune i tou taumata nazir, i tou taumata apan niṛṛae hunan MAWU.

⁹Amungkangngu uta'u sangkatou taumata nazir apan buatte niṛṛae mabbal᷊i ma'arantinna ana waugu ringannu tawe nipattudda i tou maranin taumata nate, ne i tou sarun maṛṛaddo pitu allo al᷊annune; wua'udde i tou ṛinone mangiṛṛi uta'a wuṛṛu omengnge, wakkute udde i tou mabbal᷊i waresi.

¹⁰Su allo aual᷊une i tou ṛinone mangapiddu darua manu'a merpati ara'e darua manu'a bakiangnga ringannu imam su ngaran Dasannu MAWU.

¹¹Manu'a sambau ṛinone ionggolu imam maola'a sasamba aampungnga rosa, wuṛṛu sambau lai maola'a sasamba itattambunna ipamul᷊in alal᷊eone. Su allo udde lai i tou ṛinone maṛṛaen uta'i i tou apia su MAWU

¹²wuṛṛu mallimbakku pananantillu watanganne ere sangkatou taumata nazir. Su al᷊o'engngu tempo apan nal᷊iute tate ireengnga lai ana waugu i tou nabbal᷊ite ma'arantinna. Maola'a sasamba lal᷊anna'a arugianna i tou ṛinone mangonggolu sambau ana'u domba uukke santonna.

¹³Amungkangngu tempo paddariandin sangkatou taumata nazir nasuete, ṛinone olaanna lal᷊aghu indi. Taumata udde ṛinone ehetanna watukku ngaran Dasanna MAWU

¹⁴ringannu mangapidda su MAWU tatallu winatangnga apan tawe sangkulle; sambau ana'u domba esakka uukke santonna maola'a sasamba itattambunna, sambau lai ana'u domba wawine uukke santonna maola'a sasamba aampungnga rosa, wuṛṛu sambau domba esakka maola'a sasamban paddarame.

¹⁵I tou lai ṛinone mangoggolu sangkul᷊a'a roti apan niola'a tawe nappaattu ragi, eteudde roti mal᷊imbulunna apan niola'a wuassu taponna nilo'annu lanan zaitun, wuṛṛu kukisse manipissa apan niwuṛṛannu lanan zaitun. Wal᷊ine wua'udde lai i tou ṛinone mangonggolu sasamba ia'imbe wuṛṛu sasamba a'inumanna.

¹⁶Imam ṛinone mangapiddu sarangkanambone udde su saruannu MAWU, ana see mangonggolu sasamba aampungnga rosa wuṛṛu sasamba itattambunna.

¹⁷Suadio'a ringannu roti sangkul᷊a'a udde, i tou ṛinone mangonggolu domba esakka udde su MAWU maola'a sasamban paddarame. Wuṛṛu lai sasamba ia'imbe wuṛṛu sasamba a'inumanna udde ṛinone ionggoli tou su MAWU.

¹⁸Taumata tembonanne udde ṛinone mangiṛṛi uta'i tou su ngaran Dasannu MAWU, wuṛṛu ituntungnga sulal᷊ummu putungnga tampan sasamban paddarame udde tantal᷊anna tattutunganna.

¹⁹Wua'udde, amungkangngu palangngu monane wuassu domba esakka udde buatte nilaha, imam ṛinone manganu wuṛṛu iandangnga suadio'a ringannu sambau roti mal᷊imbuluna wuṛṛu sambau kukisse manipissa wuassu ul᷊a'a udde, watukku lal᷊ummu lima taumata nazir udde.

²⁰Ana see imam ṛinone mamasingkattu anna udde sambau aonggola apan niṛṛae su MAWU; uddewe wageangnge apan susi apan maola'a wageangngu imam, su liuddu sabba'a wuṛṛu palangngu domba esakka apan tumuṛṛuttu atoranna mabbal᷊i wageangngu imam. Wua'udde taumata tembonanne udde wotongngete ma'inumma ua'e anggore.

²¹Eteudde atorana su taumata nazir; arawe amungkangngu sangkatou tembonanne maddiandin sasamba apan nilumambalanna wuassu atorannu riandine, i tou ṛinone manuungnga ringannu naṛṛino apa apan nipa'irene udde.

²²MAWU nandolokki Musa

²³niapawal᷊o si Harun wuṛṛu al᷊aṛṛanangnge manungku i mangitou ṛinone mallua manga wisara indi su tempo i mangitou mangal᷊amatta walahannu Israel;

²⁴Antimanna MAWU mangal᷊amatta wuṛṛu mappadul᷊i si yamiu.

²⁵Antimanna MAWU umakkanna wuṛṛu tumal᷊antuppi yamiu.

²⁶Antimanna MAWU mandangngu si yamiu wuṛṛu mangonggolu paddarame si yamiu.

²⁷Wuṛṛu MAWU nabbisara, “Su tempo i mangitou managon arang-Ku maola'a al᷊amatta su walahannu Israel, i Ya'u sarun mangal᷊amatta si mangitou.”