Read Talaud MIKHA 2 Bible Online

MIKHA 2 - Talaud bible

MIKHA 2

¹Nasilakate manga taumata apan manggolagu al᷊al᷊eo tantal᷊anna ual᷊allowangnga su tampan tatiil᷊anna sutempo ṛabbi, ana see niola'a sutempo marua allo ana waugu i mangitou pia atatohassa ipa'ola'a udde.

²Amungkangngu i mangitou maapulun sambau wawail᷊anna, i mangitou sarun mangaṛṛo. Amungkangngu i mangitou maapulu sambau wal᷊en, i mangitou manganu wal᷊en udde. Mawae darotongnga ara'e lai amonanna, taweddu matamudda.

³Ana waugu udde MAWU nabbisara, “I Ya'u manggol᷊agu asasilaka si yamiu, ma'oman sara i yamiu taweddu maatal᷊angnga. Sutempo apan dal᷊eo udde i yamiu sarun tawe maamatta lai ringannu mawunga.

⁴Pal᷊addu pabbiaṛṛannu sarun ipaattu taumata maola'a papasendekka, wuṛṛu i mangitou sarun mangarangngu aantarin lal᷊al᷊o indi, ‘MAWU buatte mangaṛṛo wanuan kami indi wuṛṛu nionggolla su taumata apan nanawanna si yami. I yami mangke naṛṛimunsa'e atonna-tonna.’ ”

⁵Ana waugu udde, napawe nia'omante tempone wanua udde iapawelengnga su umattu MAWU, tawe saran sangkatou wuassi yamiu apan sarun manengkamma wageangnge.

⁶Manga taumata mannase si ya'u, wisarane, “Imbaṛṛangnga mannase si yami. Imbaṛṛangnga mannase su ola'u sarangkanambone udde. I yami sarun tawe maasomba asasili.

⁷Imbaṛṛangnga massunna umattu Israel buatte niwontohannu MAWU! MAWU sarun tawe ma'ola'a olangnge aroddi. I Tou saran paassa tawe mawul᷊i asasabbare-Ne. Wal᷊inewe i Tou uahahatto ringannu masaṛṛionto'a su manga taumata apan ma'ola'a apapia?”

⁸MAWU sinumimbakka, “Ete i yamiu apan namangalo uma-U ere seetta. Taumata nawelengnga wuassu pangalo ringannu antimma sarun mapendamma atatamudda su wal᷊ene, wutte'e poiaroddi i yamiu erete ual᷊aṛṛaddo mangaṛṛo wal᷊ene.

⁹Manga wawine suwallattu uma-U nilimbuaṛṛanni yamiu wuassu wal᷊en apan arangnguanne, wuṛṛu niaṛṛon kamiu saran mal᷊annu-l᷊annu al᷊amatta apan Ta'u nionggolla su manga ana'i mangitou.

¹⁰Darisikke wuṛṛu roote; isindi tate lai matammudda. Manga rosanu buatte napaarantan asasilaka apan maata'utta su tampa indi.

¹¹I yamiu mappandumma nabi apan apulune mammahia wuṛṛu mallinga see mammasingkatta manungku i yamiu sarun maatahuanna anggore wuṛṛu ua'e apan maawu'anna nilumambalanna.”

¹²MAWU nabbisara apia, “Ei umattu Israel apan ta'e nallambe! I yamiu sarun Ta'u iammulla wuṛṛu Ta'u iaukka ere domba apan nabbelangnga su tandangnge. Naal᷊ihidda wadda'u nannal᷊o apan napenen domba, aroddi lai wanuanu sarun mapene apia ringannu taumata marasai.

¹³I Ya'u sarun mamu'a lal᷊anna wuṛṛu mangapiddi yamiu sumabbangnga wuassu pamamuanganna. I yamiu sarun manggohakku manga ngara wahewalla wuṛṛu umamatta ringannu tawe singkal᷊one. I Ya'u, MAWU sassane, uddewe Ratunu, wuṛṛu i Ya'u sarun mamiaṛṛa'i yamiu sumabbangnga.”